ເວັບໄຊສ໌ The Sun ລາຍງານຜົນການສຶກສາໃຫມ່ຂອງ ສາສະດາຈານດ້ານທໍລະນີວິທະຍາຂອງສະຫະລັດ ປະຈຳມະຫາວິທະຍາໄລ ວິສຄອນຊິນ ເມດິສັນ, ທ່ານ ສະຕິເຟ່ນ ເມເຢີຣ໌ ເຜີຍວ່າພົບດວງຈັນດາວບໍລິວານຂອງຫນ່ວຍໂລກກຳລັງເຄື່ອນຕົວອອກຫ່າງຈາກໂລກເຮົາໄປເລື້ອຍໆ ສະເລ່ຍແລ້ວໄລຍະເວລາຂອງການອອກຫ່າງແມ່ນໃນ 1 ປີຈະຍັບອອກໄປປະມານ 3.82 ຊັງຕີແມັດ ຊື່ງຈະສົ່ງຜົນເຮັດໃຫ້ເວລາໃນຫນື່ງມື້ເທີງໂລກເຮົາແມ່ນມີຄວາມດົນນານຂື້ນ.
ຂະນະດຽວກັນຜົນການສຶກສາໄດ້ລະງັບຄວາມກັງວົນຂອງຜູ້ຄົນໃນໂລກນີ້ວ່າບໍ່ຕ້ອງເປັນຫ່ວງເຖີງວ່າເວລາໃນແຕ່ລະມື້ຈະດົນຂື້ນ ເພາະວ່າການທີ່ເວລາເທີງໂລກດົນຂື້ນອີກ 1 ຊົ່ວໂມງນັ້ນຕ້ອງໃຊ້ເວລາຍາວນານເຖີງ 200ລ້ານປີ, ຈາກການສຶກສາຂອງນັກທໍລະນີວິທະຍາທີມນີ້ຍັງລະບຸວ່າ ເມື່ອ 1.4 ພັນລ້ານປີທີ່ແລ້ວ ເວລາ 1 ມື້ເທີງໂລກແມ່ນມີພຽງແຕ່ 18 ຊົ່ວໂມງເທົ່ານັ້ນ ອັນເປັນຜົນມາຈາກ ຍ້ອນໂລກໂຄຈອນຮອບຕົວເອງໄວກວ່າປະຈຸບັນ ແລະ ດວງຈັນໂຄຈອນໃກ້ໂລກຫລາຍກວ່ານີ້ ເຮັດໃຫ້ມີຜົນຕໍ່ການໂຄຈອນຮອບຕົວເອງຂອງໂລກ.
ທັງນີ້ ປະຈຸບັນດວງເດືອນເຄື່ອນຮອບຫນ່ວຍໂລກຈາກຕາເວັນຕົກໄປຕາເວັນອອກໃນທິດທາງດຽວກັບການຫມຸນຮອບຕົວຂອງໂລກ ດວງເດືອນແມ່ນເຄື່ອນທີ່ອ້ອມໂຕຮອບໂລກ 1 ຮອບ ມີລັກສະນະການຫມຸນເປັນ 360 ອົງສາ ແລະ ໃຊ້ເວລາ 27.3 ມື້.
ແຫລ່ງຂ່າວຕ່າງປະເທດ: TRN