ຫຼາຍຄົນອາດຄິດບໍ່ເຖິງວ່າ ການໃຊ້ເຄື່ອງໃຊ້ຮ່ວມກັນເຊັ່ນ: ຫຼອດທໍ່ດູດຮ່ວມກັນ, ໃຊ້ບ່ວງ ຫຼືດື່ມນໍ້າຈອກດຽວກັນກັບໝູ່ເພື່ອນ ຈະນຳພະຍາດຕິດຕໍ່ທາງນໍ້າລາຍມາໄດ້ຫຼາຍພະຍາດ ແລະບາງພະຍາດກໍເປັນອັນຕະລາຍເຖິງຊີິວິດ, ເຊິ່ງເລື່ອງນີ້ຄວນລະວັງກັນໃຫ້ດີ ຢ່າໃຊ້ທໍ່ດູດຮ່ວມກັນກັບໃຜ ເພາະເຮົາບໍ່ຮູ້ວ່າ ເຂົາ ຫຼືເຮົາອາດມີເຊື້ອພະຍາດບາງຢ່າງຢູ່ໃນຕົວ ປ້ອງກັນໄວ້ຈະດີກວ່າ
- ໄຂ້ຫວັດ: ເປັນພະຍາດທີ່ຕິດຕໍ່ໄດ້ງ່າຍ ພຽງແຕ່ຢູ່ໃກ້ກັບຄົນເປັນຫວັດ ຫຼືດື່ມນໍ້າແກ້ວດຽວກັນ, ໃຊ້ທໍ່ດູດຮ່ວມກັນ ເຮົາກໍມີສິດຮັບເຊື້ອໄຂ້ຫວັດເຂົ້າສູ່ຮ່າງກາຍໄດ້
- ຄໍອັກເສບ: ເປັນພະຍາດໜຶ່ງທີ່ພົບໄດ້ຕະຫຼອດ ຫາກເຮົາໃຊ້ທໍ່ດູດ ຫຼືດື່ມນໍ້າຈອກດຽວກັນກັບຄົນທີ່ມີເຊື້ອແບັກທີເລຍກຣຸບເອ ສະເຕຣບໂຕຄອກຄັສ ໃນນໍ້າລາຍ ຫຼືອາດເປື້ອນຈາກນໍ້າມູກ ຫຼືຂີ້ກະເທິ ເຊິ່ງຖ້າເຮົາໄດ້ຮັບເຊື້ອເຂົ້າສູ່ຮ່າງກາຍ ຈະເປັນໄຂ້ຂຶ້ນສູງ, ເຈັບຫົວ, ໜາວ, ເບື່ອອາຫານ ແລະເຈັບຄໍຫຼາຍຂຶ້ນ
- ໄວຣັສຕັບອັກເສບ: ເຊິ່ງມີຫຼາຍສາຍພັນ ມີທັງໄວຣັສຕັບອັກເສບເອ, ບີ, ຊີ ໄປຈົນຮອດ ໄວຣັສຕັບອັກເສບ ຈີ ແຕ່ໄວຣັສຕັບທີ່ຕິດຕໍ່ກັນໄດ້ທາງອາຫານ ແລະເຄື່ອງດື່ມແມ່ນໄວຣັສຕັບອັກເສບເອ, ອີ ເຊິ່ງຖ້າເປັນພະຍາດນີ້ຈະມີອາການເປັນໄຂ້, ຕົວຮ້ອນ, ເບື່ອອາຫານ, ເຈັບຫົວ, ປວດຮາກ, ເຈັບທ້ອງ, ນໍ້າປັດສະວະເລີ່ມມີສີເຫຼືືອງເຂັ້ມ, ແລະຕົນຕົວເຫຼືອງ
- ຄໍຕີບ: ຈະມີອາການໄຂ້ເລັກໜ້ອຍ, ເຈັບຄໍ, ເບື່ອອາຫານ ເຊິ່ງຖ້າມີອາການນີ້ອາດເປັນພະຍາດຄໍຕີບ ເຊິ່ງມີອາການໄອສຽງດັງ, ກືນລຳບາກ, ເຊິ່ງພະຍາດນີ້ສາມາດແຜ່ສູ່ຄົນອື່ນດ້ວຍການໄອ, ຈາມ, ການໃຊ້ເຄື່ອງໃຊ້ຮ່ວມກັນ ຫຼືສຳຜັດກັບຂີ້ກະເທິຂອງຄົນທີ່ເປັນພະຍາດນີ້
- ເຍື່ອຫຸ້ມສະໝອງອັກເສບ: ພະຍາດນີ້ຫາກຮຸນແຮງຈະເຖິງຂັ້ນຫູໜວກ, ຕາບອດ, ເປັນອຳມະພາດ ຈົນເຖິງຂັ້ນເສຍຊີວິດລົງໄດ້ ເຊິ່ງຖ້າຫາກເຮົາໄປສຳຜັດ ແລະໃຊ້ເຄື່ອງໃຊ້ຮ່ວມກັນກັບຄົນເປັນພະຍາດເຊັ່ນ: ທໍ່ດູດ, ຈອກນໍ້າ, ບ່ວງ, ເຊິ່ງພະຍາດນີ້ເກີດຈາກການຕິດເຊື້ອແບັກທີເລຍ, ໄວຮັສ ແລະເຊື້ອລາ ເມື່ອຕິດເຊື້ອຈະມີໄຂ້ຂຶ້ນສູງ, ເຈັບຫົວ, ເຈັບຄໍ, ປວດຮາກ, ເຊິ່ງຖ້າປິ່ນປົວບໍ່ທັນຈະມີອາການຮຸນແຮງດັ່ງທີ່ບອກໄວ້ຂ້າງເທິງນັ້ນ