ສຳນັກຂ່າວຕ່າງປະເທດ ລາຍງານໃນວັນທີ 8 ກຸມພານີ້ວ່າ ທ່ານ ໂດນັນ ທຣັມ ປະທານາທິບໍດີ ສະຫະລັດອາເມຣິກາ ໄດ້ອອກມາປະກາດ ຈະບໍ່ຍອມຫັນກັບມາຍົກເລີກ ຄຳສັ່ງຫ້າມຊາວມຸດສະລິມຈາກ 7 ປະເທດ ເຂົ້າສະຫະລັດອາເມຣິກາ ໂດຍທ່ານໄດ້ຢືນຢັນວ່າ ຈະດຳເນີນການຕໍ່ສູ້ທາງຂະບວນການຂອງກົດໝາຍຈົນເຖິງທີ່ສຸດ.

ທັງນີ້ ກະຊວງຍຸຕິທຳຂອງອາເມຣິກາໄດ້ລະບຸວ່າ ຄຳສັ່ງຂອງປະທານາທິບໍດີ ໂດນັນ ທຣັມ ເປັນຄຳສັ່ງບໍລິຫານ ໃຊ້ອຳນາດຕາມກົດໝາຍ ບໍ່ໄດ້ເປັນການສັ່ງຫ້າມຊາວມຸດສະລິມ ຈຶ່ງຮຽກຮ້ອງໃຫ້ສານດຳເນີນການອຸທອນ ຄຳຕັດສິນຂອງສານນະຄອນຊີແອດໂຕ ເພື່ອຜົນປະໂຫຍດຕໍ່ຄວາມໝັ້ນຄົງຂອງຊາດ.

ທ່ານ ໂດນັນ ທຣັມ ໄດ້ອອກຄຳສັ່ງເມື່ອວັນທີ 27 ມັງກອນຜ່ານມາ ຫ້າມພົນລະເມືອງ 7 ຊາດມຸດສະລິມ ໄດ້ແກ່ ອີຣ່ານ, ອີຣັກ, ລີບີ, ໂຊມາລີ, ຊູດັງ, ຊີຣີ ແລະ ເຢແມນ ເດີນທາງເຂົ້າສະຫະລັດອາເມຣິກາ ເປັນການຊົ່ວຄາວ, ແຕ່ຄຳສັ່ງດັ່ງກ່າວ ໄດ້ຖືກສານນະຄອນຊີແອດໂຕ ພິພາກສາໃຫ້ລະງັບໄວ້ ຕັ້ງແຕ່ວັນທີ 3 ກຸມພາທີ່ຜ່ານມາ.