ເສັ້ນທາງປາກມອງ-ອຸດົມໄຊ ພາຍຫລັງ ເລີ່ມເປີດການກໍ່ສ້າງປີ 2014 ມາຮອດປັດຈຸບັນ ໄດ້ສໍາເລັດກ່ອນກໍານົດ 9 ເດືອນ ຕາມສັນຍາແມ່ນເດືອນກຸມພາ 2017. ໂດຍແມ່ນບໍລິສັດ ກຸ່ມສະຖາບັນສໍາຫລວດອອກ-ແບບທາງລົດໄຟເລກ 3 ແລະ ບໍລິສັດຢຸນນານຊັນນີ ເປັນຜູ້ຮັບເໝົາດ້ວຍມູນຄ່າ 82 ລ້ານກວ່າໂດລາສະຫະລັດ.
ທ່ານ ຈັນເພັງ ມະນີວັນ ຮັກສາການຫົວໜ້າໂຄງການ ໄດ້ໃຫ້ສໍາພາດທ້າຍອາທິດຜ່ານມານີ້ວ່າ: ການກໍ່ສ້າງເສັ້ນທາງຫລວງແຫ່ງຊາດ 13 ເໜືອ ແຕ່ສາມແຍກປາກມອງ-ເມືອງໄຊ ພາຍຫລັງຄະນະກໍາມະການ ກວດກາດ້ານເຕັກນິກກົມຂົວທາງ ແລະ ພາກສ່ວນກ່ຽວຂ້ອງ ລົງກວດກາເຫັນວ່າມາຮອດປັດຈຸບັນ ໄດ້ສໍາເລັດ 100% ເຊິ່ງຈະມີພິທີມອບ-ຮັບໃນໄວໆນີ້.
ເສັ້ນທາງດັ່ງກ່າວ ມີຄວາມຍາວທັງໝົດ 81 ກວ່າກິໂລແມັດ ໂດຍຈັດເປັນທາງປະເພດ 3 ໜ້າທາງ ປູດ້ວຍຢາງຂົ້ວ ໜາ 5 ຊັງຕິແມັດ, ຊັ້ນພື້ນທາງປູດ້ວຍຫີນຂົບປະສົມຊີມັງ ສາມາດຮັບນໍ້າໜັກໄດ້ 11 ໂຕນຕໍ່ເພົາ, ໜ້າທາງໃນເຂດພູດອຍທີ່ບໍ່ມີບ້ານຄົນ ກວ້າງ 7,5 ແມັດ, ມີ 2 ຊ່ອງທາງຈາລະຈອນໄປ-ກັບ, ສໍາລັບເຂດຊຸມຊົນ ກວ້າງ 8,5 ແມັດ ມີຈຸດຈອດລົດໂດຍສານ. ສະເພາະໃນເຂດເທດສະບານເມືອງໄຊ ມີດອນກາງໜ້າທາງກວ້າງ 16,60 ແມັດ ມີຮ່ອງລະບາຍນໍ້າສອງຂ້າງທາງ ພ້ອມມີທາງຄົນຍ່າງ ກວ້າງເບື້ອງລະ 90ຊັງຕີແມັດ
ແຫຼ່ງຂ່າວ: ສຳນັກຂ່າວສານປະເທດລາວ