ໃນຕອນເຊົ້າວັນທີ 16 ທັນວາ 2016 ນີ້ ເນື່ອງໃນໂອກາດຄົບຮອບ 41 ປີ ແຫ່ງວັນສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ (2/12/1975-2/12/2016), ຢູ່ຫໍທຳມະສະພາ ວັດພະທາດຫລວງວຽງຈັນ, ການນຳພັກ-ລັດ ນຳໂດຍທ່ານ ບຸນຍັງ ວໍລະຈິດ ປະທານປະເທດ, ທ່ານ ພັນຄຳ ວິພາວັນ ຮອງປະທານປະເທດ, ທ່ານ ທອງລຸນ ສີສຸລິດ ນາຍົກ ລັດຖະມົນຕີ , ມີບັນດາຮອງນາຍົກລັດຖະມົນຕີ, ລັດຖະມົນຕີ, ຮອງລັດຖະມົນຕີ ພ້ອມດ້ວຍຊາວພຸດສາຊະນິກະຊົນ ຮ່ວມຕັກບາດ ຖວາຍສັງຄະທານແດ່ພະສົງ 108 ອົງ ໃນງານບຸນມະຫາສາມັກຄີ ອຸທິດບຸນກຸສົນແດ່ອະດິດການນຳພັກ-ລັດ ແລະ ຜູ້ທີ່ມີຄຸນງາມຄວາມດີຕໍ່ປະເທດຊາດ.
ໃນການຈັດງານບຸນ ແລະ ຮ່ວມຕັກບາດດັ່ງກ່າວ, ກໍເພື່ອສະແດງເຖິງຄວາມກະຕັນຍູຮູ້ບຸນຄຸນຕໍ່ອະດີດການນຳພັກ-ລັດ, ພະນັກງານ, ທະຫານ-ຕຳຫລວດ ແລະ ປະຊາຊົນລາວບັນດາເຜົ່າ ຜູ້ທີ່ມີຄຸນງາມຄວາມດີ ເສຍສະຫລະຊີວິດ, ເລືອດເນື້ອ ຕໍ່ສູ້ຕ້ານຈັກກະພັດຜູ້ຮຸກຮານ ຈົນສາມາດຍາດໄດ້ໄຊຊະນະ ແລະ ສະຖາປານາ ເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຢ່າງສິ້ນເຊິງ, ທັນເປັນການເຮັດໃຫ້ປວງຊົນລາວທັງຊາດ ໄດ້ຮັບຮູ້ວ່າ ຍ້ອນມີພວກເພີ່ນໃນວັນນັ້ນ ຈຶ່ງມີພວກເຮົາໃນວັນນີ້
ຂ່າວ: ສຳນັກຂ່າວສານປະເທດລາວ