ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ຄະນະຜູ້ແທນຄະນະກຳມະການສາສະໜາ ແຫ່ງ ລັດຖະບານ ສສ ຫວຽດນາມ ນຳໂດຍ ສະຫາຍ ເຢືອງງອກເຕີ້ນ ຮອງຫົວໜ້າຄະນະກຳມະການສາສະໜາ ແຫ່ງ ລັດຖະບານ ສສ ຫວຽດນາມ ເມື່ອວັນທີ 12 ທັນວານີ້ ທີ່ຫ້ອງຮັບແຂກສູນກາງແນວລາວສ້າງຊາດ. ໂອກາດນີ້, ສະຫາຍປະທານສູນກາງແນວລາວສ້າງຊາດ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງ ຕໍ່ການມາຢ້ຽມຢາມລາວໃນຄັ້ງນີ້ຂອງ ສະຫາຍ ເຢືອງງອກເຕີ້ນ ແລະ ຄະນະໃນຄັ້ງນີ້ ຊຶ່ງເປັນການເສີມສ້າງສາຍພົວພັນມິດຕະພາບ ແລະ ການ ຮ່ວມມືຮອບດ້ານລະຫວ່າງ ລາວ-ຫວຽດນາມ ທີ່ມີມາແລ້ວ ນັ້ນໃຫ້ແໜ້ນແຟ້ນຍິ່ງໆຂຶ້ນ.
ສະຫາຍ ເຢືອງງອກເຕີ້ນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ແຈ້ງຜົນຂອງການເຄື່ອນໄຫວຢ້ຽມຢາມລາວໃຫ້ ສະຫາຍປະທານ ສນຊ ຊາບ. ໃນວັນດຽວກັນນີ້ ກໍໄດ້ພົບປະສອງຝ່າຍລະຫວ່າງ ຄະນະກຳມະການສູນກາງແນວລາວສ້າງຊາດ ນຳໂດຍ ສະຫາຍ ນາງ ຄຳຈັນ ພົມແສງສະຫວັນ ຮອງປະທານ ສນຊ ແລະ ຄະນະກຳມະການສາສະໜາ ແຫ່ງ ລັດຖະບານຫວຽດນາມ ນຳໂດຍ ສະຫາຍ ເຢືອງງອກເຕີ້ນ. ໃນການພົບປະຄັ້ງນີ້ ທັງສອງຝ່າຍໄດ້ແຈ້ງສະພາບການເຄື່ອນໄຫວ ວຽກງານສາສະໜາຂອງແຕ່ລະປະເທດໃຫ້ກັນຊາບ ແລະ ປຶກສາຫາລື ສືບຕໍ່ການຮ່ວມມືໃນດ້ານຕ່າງໆ ໂດຍສະເພາະທັງສອງຝ່າຍ ຈະຊຸກຍູ້ສົ່ງເສີມໃຫ້ອົງການພຸດທະສາສະໜາຂອງສອງປະເທດ ມີການພົວພັນຮ່ວມມືກັນຢ່າງແໜ້ນແຟ້ນ ເພື່ອເສີມຂະຫຍາຍມູນເຊື້ອສາຍພົວພັນລະ ຫວ່າງ ອົງການພຸດທະສາສະໜາສຳພັນລາວ ແລະ ອົງການພຸດທະສາສະໜາ ສສ ຫວຽດນາມ ກໍຄືພະສົງຂອງສອງປະເທດ, ແນໃສ່ຊຸກຍູ້ການເຄື່ອນໄຫວຂອງສອງອົງການພຸດທະສາສະໜາລາວ-ຫວຽດນາມ, ຫວຽດນາມ-ລາວ ໃນຂົງເຂດ, ພາກພື້ນ ແລະ ໃນໂລກໃຫ້ມີປະສິດທິຜົນສູງກວ່າເກົ່າ. ນອກຈາກນັ້ນ ກໍສືບຕໍ່ຮ່ວມມືລະຫວ່າງ ສູນກາງແນວລາວສ້າງຊາດ ກັບຄະນະກຳມະການສາສະໜາແຫ່ງ ລັດຖະບານ ສສ ຫວຽດນາມ, ຊຸກຍູ້ສາສະໜາຕ່າງໆຂອງສອງປະເທດ ມີການພົວພັນຮ່ວມມືກັນຢ່າງແໜ້ນແຟ້ນ ປະກອບສ່ວນເຂົ້າໃນການຮັດແໜ້ນສາຍພົວພັນມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ- ສອງລັດ ແລະ ປະຊາຊົນສອງຊາດພວກເຮົາ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!