ການແຂ່ງຂັນບານເຕະ AFC Solidarity Cup 2016 ໄດ້ດຳເນີນການແຂ່ງຂັນ ມາຮອດຊ່ວງທ້າຍແລ້ວ ໂດຍທີ່ການແຂ່ງຂັນ ນັດຊີງຊະນະເລີດ ຈະຈັດຂຶ້ນໃນວັນທີ 15 ພະຈິກ 2016 ໂດຍການລົງສະໜາມລະຫວ່າງ ທີມຊາດເນປານ ກັບ ເຂດປົກຄອງພິເສດ ມາເກົ້າ.
ໃນມື້ນີ້ ວັນທີ 14 ພະຈິກ 2016 ທີມຊາດລາວ ໄດ້ລົງສະໜາມ ຮອບຊີງອັນດັບທີ 3 ພົບກັບ ທີມຊາດບຣູໄນ ເວລາ 18:30. ການແຂ່ງຂັນໃນເຄິ່ງເວລທີ 1 ເປັນທາງ ທີມຊາດລາວ ທີ່ຍິງປະຕູຂຶ້ນນຳໄວ ໃນຊ່ວງຕົ້ນເກມ ໃນນາທີ 05 ໂດຍ ແກ້ວວຽງເພັດ ເປັນ 1 ປະຕູຕໍ່ 0, ແຕ່ມາຮອດນາທີທີ 23 ທີມຊາດບຣູໄນ ກໍ່ມາຍິງປະຕູຕີສະເໝີ ເປັນ 1 ປະຕູຕໍ່ 1 ໂດຍ Shahrazen ແລະ ໃນເວລາທີ່ເຫຼືອ ກໍ່ບໍ່ສາມາດຍິງປະຕູກັນໄດ້ ຈົບ 45 ນາທີທຳອິດ ທີມຊາດລາວ 1 -1 ທີມຊາດບຣູໄນ. ເລີ່ມເຂົ້າສູ່ເກມໃນເຄິ່ງເວລາທີ 2 ທີມຊາດລາວ ກໍ່ມາໄດ້ປະຕູຂຶ້ນນຳອີກຄັ້ງ ເປັນ 2 ປະຕູຕໍ່ 1 ຈາກ ສິດທິເດດ ໃນນາທີ 53, ແຕ່ອີກພຽງ 1 ນາທີຕໍ່ມາ ທີມຊາດບຣູໄນ ກໍ່ເລັ່ງເຄື່ອງຍິງຕີສະເໝີເປັນ 2 ປະຕູຕໍ່ 2 ໂດຍ Shahrazen ໃນນາທີທີ 54 ແບບບໍ່ໃຫ້ ທີມຊາດລາວ ທັນຕັ້ງໂຕ ແລະ ໃນຊ່ວງເວລາທີເຫຼືອຢູ່ ເບິ່ງຄືວ່າຈະສະເໝີກັນໃນ 90 ນາທີ ແຕ່ໃນນາທີທີ 82 ໄຊສົງຄາມ ກໍ່ມາຍິງປະຕູໄດ້ ແລະ ເປັນຮີໂຣ ຊ່ວຍໃຫ້ ທີມຊາດລາວ ເອົາຊະນະ ທີມຊາດບຣູໄນ ໄປ 3 ປະຕູຕໍ່ 2 ເຮັດໃຫ້ ທີມຊາດລາວ ຄອງອັນດັບທີ 3 ການແຂ່ງຂັນບານເຕະ AFC Solidarity Cup 2016 ໄດ້ສຳເລັດ.
ກໍ່ຖືວ່າຈົບກັນໄປແລ້ວສຳລັບ ການແຂ່ງຂັນຂອງ ທີມຊາດລາວ ໃນລາຍການ AFC Solidarity Cup 2016 ແລະ ພວກເຂົາກໍ່ທຸ້ມເທ ເຮັດໄດ້ດີທີ່ສຸດແລ້ວ ແລະ ທີມງານ laosportnews ກໍ່ຂໍເປັນກຳລັງໃຫ້ກັບທຸກໆຄົນ.
ຂອບໃຈຂໍ້ມູນ ແລະ ພາບຈາກ the-afc.com
ຂອບໃຈທີ່ມາຂອງຂ່າວຈາກ: 
ຕິດຕາມຂ່າວເສດຖະກິດລາວ ກົດໄລຄ໌ເລີຍ!