ນົກ ກັບ ບຸນ ເປັນໝູ່ເຮັດວຽກນຳກັນທີ່ຫ້າງສັບພະສິນຄ້າແຫ່ງໜຶ່ງ ປີນີ້ກໍ່ເປັນປີທີສາມແລ້ວທີ່ພວກເຂົາເຮັດວຽກນຳກັນ ຍ້ອນທັງສອງມີຄວາມມັກຫຼາຍໆຢ່າງທີ່ຄ້າຍຄືກັນ ສະນັ້ນຈິ່ງເຮັດໃຫ້ທັງສອງຄົນນີ້ສະໜິດສະໜົມຮູ້ໃຈກັນເປັນພິເສດ ມີເລື່ອງຫຍັງກໍ່ຊ່ວຍເຫຼືອກັນ ແລະ ກັນດ້ວຍດີຕະຫຼອດມາ ແຕ່ມີວັນໜຶ່ງຄວາມສຳພັນຂອງທັງສອງຕ້ອງແຕກຫັກລົງຍ້ອນຜູ້ຊາຍພຽງຄົນດຽວ ເລື່ອງມີຢູ່ວ່າ

ໃນລະຫວ່າງຕົ້ນເດືອນມີນາ ປີ 2015 ຕອນແລງຂອງວັນອາທິດກ່ອນທີ່ຕະເວັນຈະລັບຂອບຟ້າທ່າມກາງບັນຍາກາດທີ່ແສນສະບາຍ ໃນຂະນະທີ່ນົກກຳລັງຂັບລົດຈັກກັບເຮືອນຫຼັງຈາກໄປຫຼິ້ນເຮືອນຂອງບຸນມາ ນົກກໍ່ໄດ້ເຫັນຊາຍຄົນໜຶ່ງກຳລັງຈູງລົດຈັກຍ່າງໂດຍມີເດັກນ້ອຍຜູ້ຍິງອາຍຸປະມານ 2-3 ປີນັ່ງຊ້ອນທີ່ເບາະລົດ ນົກຈິ່ງຄ່ອຍໆຂັບລົດເຂົ້າໄປໃກໆ ແລ້ວໄດ້ຮ້ອງຖາມ ແລ້ວນົກກໍ່ໄດ້ຮູ້ວ່າ ລົດຂອງຊາຍຄົນນັ້ນນ້ຳມັນໝົດ ນົກຄິດວ່າຊາຍຄົນນັ້ນຕ້ອງຈູງລົດຍ່າງໄປອີກໄກກວ່າຈະຮອດປ້ຳນ້ຳມັນ ອີກຢ່າງໜຶ່ງກໍ່ຮູ້ສຶກອີ່ຕົນເດັກນ້ອຍທີ່ນັ່ງຢູ່ເບາະລົດ ນົກເລີຍອາສາໄປຊື້ນ້ຳມັນລົດມາໃສ່ ກ່ອນຈະຈາກໄປນົກໄດ້ເວົ້າກັບເດັກນ້ອຍຄົນນັ້ນດ້ວຍສີໜ້າແວວຕາທີ່ອ່ອນໂຍນ ແລະ ນົກກໍ່ເຂົ້າໃຈຜິດວ່າເດັກນ້ອຍຄົນນັ້ນເປັນລູກສາວຂອງຊາຍຄົນນັ້ນກ່ອນທີ່ນົກຈະຈາກໄປ ຊາຍຄົນດັ່ງກ່າວໄດ້ແຕ່ກ່າວຄຳຂອບໃຈແຕ່ກໍ່ລືມແນະນຳຕົວເອງ ແລະ ລືມຖາມຊື່ ໃນໃຈເລິກໆລາວກໍ່ຮູ້ສຶກເສຍດາຍ

ເຊົ້າວັນຈັນມື້ຕໍ່ມາທີ່ຫ້າງສັບພະສິນຄ້າ ໃນຂະນະທີ່ນົກ ກັບ ບຸນ ກຳລັງປະຕິບັດໜ້າທີ່ຢູ່ເຄົາເຕີ້ບ່ອນຊຳລະເງິນ ກໍ່ມີຊາຍໜຸ່ມຮູບງາມແຕ່ງຕົວສະອາດສຸພາບຍ່າງເຂົ້າມາຫານົກດ້ວຍສີໜ້າຍິ້ມແຍ້ມ ເມື່ອນົກແນມເຫັນກໍ່ຍິ້ມທັກທາຍຕອບຕາມມາລະຍາດ ຈາກນັ້ນພວກເຂົາກໍ່ໄດ້ລົມກັນປະມານ 1 ນາທີ ພວກເຂົາທັງສອງໄດ້ແນະນຳຊື່ເຊິ່ງກັນ ແລະ ກັນ ແລ້ວນົກກໍ່ໄດ້ຮູ້ວ່າ ນິໂນ້ເປັນຜູ້ຈັດການຫ້າງສັບພະສິນຄ້າຄົນໃໝ່ ເຊິ່ງເປັນວັນເລີ່ມຕົ້ນເຮັດວຽກມື້ທຳອິດຂອງນິໂນ້ ຕອນທຳອິດທັງນົກ ແລະ ນິໂນ້ກໍ່ຮູ້ສຶກແປກໃຈເລັກໜ້ອຍ ເພາະນີ້ມັນແມ່ນເລື່ອງບັງເອີນ ຫຼື ພົມລິຂິດກັນແທ້ທີ່ຢູ່ດີໆທັງສອງກໍ່ໄດ້ມາພົບກັນອີກຄັ້ງ ແຖມຍັງໄດ້ເຮັດວຽກບ່ອນດຽວກັນອີກ. ນັບຈາກວັນນັ້ນມາພວກເຂົາກໍ່ໄດ້ພົບກັນທຸກມື້ທຸກມື້ ຕອນພັກວຽກນິໂນ້ມັກຈະມາຊວນນົກອອກໄປກິນເຂົ້າທີ່ຮ້ານອາຫານໃກ້ໆກັບຫ້າງ ເຊິ່ງຈະມີບຸນໄປນຳທຸກຄັ້ງ ຜ່ານໄປປະມານ 1 ເດືອນທັງສາມກໍ່ເລີ່ມສະໜິດສະໜົມກັນຫຼາຍຂຶ້ນ ມີຫຼາຍສິ່ງຫຼາຍຢ່າງໃນຕົວຂອງນົກທີ່ເຮັດໃຫ້ນິໂນ້ຮູ້ສຶກປະທັບໃຈ ແລະ ມີຄວາມສຸກເມື່ອເວລາຢູ່ໃຫ້ນົກ ສ່ວນນົກກໍ່ເລີ່ມມີຄວາມຮູ້ສຶກດີໆໃຫ້ກັບນິໂນ້ເຊັ່ນດຽວກັນ ແຕ່ນົກກໍ່ບໍ່ກ້າຄິດໄປໄກເກີນຄຳວ່າໝູ່ເພາະນົກເຂົ້າໃຈຜິດວ່າ ນິໂນ້ມີລູກແລ້ວກໍ່ໝາຍຄວາມວ່າ ນິນິໂນ້ມີເມຍມີຄອບຄົວແລ້ວ ສ່ວນບຸນຍິ່ງຮູ້ຈັກກັບນິໂນ້ຍິ່ງຮູ້ສຶກປະທັບໃຈຈົນກາຍເປັນຄວາມຮັກ ແຕ່ບຸນບໍ່ກ້າສາລະພາບໃຫ້ນິໂນ້ໄດ້ຮູ້ ຈິ່ງໄດ້ປຶກສາກັບເພື່ອນສະໜິດຢ່າງນົກ ເມື່ອນົກຮູ້ວ່າບຸນມີໃຈໃຫ້ກັບນິໂນ້ໃນທາງຊູ້ສາວ ນົກຈິ່ງເລົ່າສິ່ງທີ່ຕົນເອງຮູ້ໃຫ້ບຸນຟັງ ເມື່ອບຸນໄດ້ຮູ້ວ່ານິໂນ້ມີລູກມີຄອບຄົວແລ້ວ ບຸນຈິ່ງຮູ້ສຶກເຈັບ ແລະ ຜິດຫວັງສຸດໆ ດັ່ງນັ້ນ ບຸນຈິ່ງຫ້າມບໍ່ໃຫ້ນົກເຂົ້າໃກ້ນິໂນ້ ທັງບຸນ ແລະ ນົກ ຈິ່ງພະຍາຍາມລີກລ່ຽງການພົບໜ້າກັບນິໂນ້ ເຮັດໂຕຫ່າງເຫີນກັບນິໂນ້ ແຕ່ຄວາມຈິງແລ້ວນົກບໍ່ຢາກເຮັດແບບນີ້ກັບນິໂນ້ ແຕ່ຂັດໃຈບຸນບໍ່ໄດ້ກໍ່ເລີຍຕ້ອງເຮັດຕາມໆກັນ ຜ່ານໄປໜຶ່ງອາທິດ ນິໂນ້ຮູ້ສຶກບໍ່ສະບາຍໃຈແຮງ ຫຼັງເລີກວຽກກ່ອນທີ່ບຸນ ກັບ ນົກກຳລັງສິກັບເຮືອນ ທີ່ຄອກລົດ ນິໂນ້ກໍ່ມາດັກລໍຖ້າລົມກັບສອງສາວ ມາຖາມຫາເຫດຜົນທີ່ທັງສອງປ່ຽນໄປ ເຮັດເສີຍຊາໃສ່ຕົນເອງ ແລະ ກໍ່ໄດ້ຮູ້ຄວາມຈິງ ວ່າທັງສອງເຂົ້າໃຈຜິດຕົນໂດຍສະເພາະນົກ ນິໂນ້ໄດ້ອະທິບາຍວ່າ ເດັກນ້ອຍຜູ້ຍິງທີ່ນົກເຫັນມື້ນັ້ນບໍ່ແມ່ນລູກສາວລາວ ແຕ່ເປັນລູກເອື້ອຍລາວ ມື້ນັ້ນລາວພາຫຼານສາວມາຂີ່ລົດກິນລົມ ແຕ່ບັງເອີນບໍ່ໄດ້ກວດເບິ່ງນ້ຳມັນລົດ ຕອນກັບເຮືອນລົດນ້ຳມັນໝົດ ມື້ນັ້ນລາວພັດລືມເອົາໂທລະສັບມານຳອີກສິໂທຫາຄົນຢູ່ເຮືອນມາຊ່ວຍກໍ່ເຮັດບໍ່ໄດ້ ເມື່ອທັງສອງສາວໄດ້ຍິນແບບນີ້ກໍ່ຮູ້ສຶກໂລ່ງໃຈສະບາຍໃຈ ແລະ ດີໃຈຂຶ້ນຕື່ມ

ນົກເລີ່ມມີຄວາມຫວັງໃນໃຈເລິກໆກັບການພັດທະນາຄວາມສຳພັນກັບນິໂນ້ ເພາະທີ່ຜ່ານມານິໂນ້ມັກຈະສົ່ງຂໍ້ຄວາມຄຳເວົ້າໃນທາງຊູ້ສາວມາຫາຕົນເອງແຕ່ນົກກໍ່ບໍ່ກ້າຕອບຫຍັງຫຼາຍ ເພາະຄິດຢ້ານເລື່ອງສິນທຳ ແຕ່ເມື່ອເລື່ອງລາວມັນເປັນແບບນີ້ແລ້ວ ນົກກໍ່ຄິດວ່າຈະຫາໂອກາດດີໆຈັກມື້ໜຶ່ງບອກຄວາມໃນໃຈໃຫ້ນິໂນ້ໄດ້ຮູ້ ແຕ່ໃນທີ່ສຸດຄວາມຕັ້ງໃຈຂອງນົກກໍ່ຕ້ອງຈົບລົງ ເພາະໝູ່ຮັກຂອງລາວຢ່າງ ບຸນ ກັບມາບອກຄວາມໃນໃຈທີ່ມີຕໍ່ນິໂນ້ໃຫ້ນົກໄດ້ຮູ້ ແລະ ຂໍໃຫ້ນົກເປັນທີ່ປຶກສາ ແລະ ເປັນແມ່ສື່ໃຫ້ກັບຕົນເອງ ເຊິ່ງນົກກໍ່ເຫັນກັບຄວາມສຳພັນທີ່ມີເລີຍຂັດໃຈໝູ່ບໍ່ໄດ້ ນົກຈິ່ງຍອມຮັບດ້ວຍຄວາມອຶດອັດເຈັບຊ້ຳໃນຄວາມໃຈ

ໃນເວລາທີ່ນິໂນ້ຊວນນົກໄປຫຼິ້ນທາງໃດ ນົກກໍ່ມັກຈະຊວນບຸນໄປນຳ ໃນຍາມທີ່ນິໂນ້ໂທມາ ຫຼື ສົ່ງຂໍ້ຄວາມມາຫານົກ ລົມໃນເລື່ອງຄວາມຮັກກັບນົກ ນົກກໍ່ພະຍາຍາມເວົ້າແຕ່ເລື່ອງບຸນສູ່ນິໂນ້ຟັງ ນົກຄອຍເວົ້າເຢີ້ຍເວົ້າເຊຍໃຫ້ທັງສອງຄົນທັງນິໂນ້ ແລະ ບຸນ ເປັນແຟນກັນ ຮອຍຍິ້ມທີ່ນົກສະແດງອອກມານັ້ນມັນແຝງດ້ວຍນ້ຳຕາ ນິໂນ້ເອງກໍ່ຮູ້ສຶກບໍ່ສະບາຍໃຈທີ່ເຫັນນົກເຮັດແບບນີ້ ນິໂນ້ໄດ້ໄປຫານົກຮອດເຮືອນເພື່ອຖາມເຫດຜົນທີ່ນົກເຮັດລົງໄປ ແລະ ໄດ້ບອກຄວາມຮູ້ສຶກທີ່ແທ້ຈິງທີ່ນິໂນ້ຄິດກັບນົກມັນຫຼາຍກວ່າຄຳວ່າເພື່ອນ ສ່ວນບຸນ ນິໂນ້ຄິດແບບເພື່ອນເທົ່ານັ້ນ ແລະ ບໍ່ມີທາງຄິດເປັນຢ່າງອື່ນໄດ້ ແຕ່ທີ່ເຮັດບໍ່ເວົ້າຕອບໂຕ້ ຫຼື ປະຕິເສດຕໍ່ໜ້າບຸນກໍ່ເພື່ອເຮັດໃຫ້ນົກສະບາຍໃຈເທົ່ານັ້ນ ແລະ ນິໂນ້ກໍ່ເຂົ້າໃຈວ່ານົກຄົງຈະໜັກໃຈກັບເລື່ອງນີ້ ເຖິງນົກຈະຮູ້ທຸກຢ່າງດີວ່ານິໂນ້ຄິດກັບຕົນເອງແນວໃດ ແລະ ຕົນເອງກໍ່ຄິດກັບນິໂນ້ແບບແນວໃດ ແຕ່ຍ້ອນຄວາມສຸກຂອງເພື່ອນຮັກຢ່າງບຸນ ນົກຈິ່ງໃຈແຂງແລ້ວຕອບປະຕິ ເສດຄວາມຮັກຂອງນິໂນ້ແບບເສີຍຊາ ເພື່ອຫວັງໃຫ້ນິໂນ້ຕັດໃຈຈາກຕົນແຕ່ກົງກັບຂ້າມ ເພາະຍິ່ງນົກຕ້ອງ ການຫ່າງຕ້ອງການລືມນິໂນ້ຫຼາຍພຽງໃດ ຫົວໃຈກໍ່ຮູ້ສຶກເຈັບຫຼາຍເທົ່ານັ້ນ ບຸນເອງກໍ່ຮູ້ດີວ່ານົກ ແລະ ນີໂນ້ມີໃຈໃຫ້ກັນ ແລະ ກັນ ແຕ່ບຸນບໍ່ສາມາດຮັບຄວາມຈິງໄດ້ ບຸນບໍ່ສາມາດເສຍສະຫຼະຄວາມສຸກຂອງຕົນເອງໃຫ້ຄົນອື່ນໄດ້ເຖິງຈະແມ່ນເພື່ອນສະໜິດຂອງເຂົາກໍ່ຕາມ ຫຼາຍຄັ້ງທີ່ນິໂນ້ເຫັນນົກຕ້ອງຊຶມເສົ້າ ແລະ ແອບໄປມີນ້ຳຕາຢູ່ບ່ອນຢູ່ຄົນດຽວເປັນປະຈຳ ເຊິ່ງເລື່ອງນີ້ມັນໄດ້ສ້າງຄວາມປວດໃຈໃຫ້ນິໂນ້ເຊັ່ນດຽວກັນ ແລະ ລາວຄິດວ່າຈະປ່ອຍໃຫ້ເປັນແບບນີ້ຕໍ່ໄປບໍ່ໄດ້ອີກແລ້ວ ນິໂນ້ບໍ່ສາມາດຢູ່ນິ້ງເສີຍໄດ້ ສະນັ້ນລາວຈິ່ງຕັດສິນໃຈນັດພົບກັບບຸນ ນິໂນ້ໄດ້ໄປພົບບຸນທີ່ເຮືອນ ພວກເຂົາໄດ້ນັ່ງລົມກັນທີ່ໂຕະຫີນໜ້າເຮືອນ ບຸນຮູ້ສຶກດີໃຈຫຼາຍທີ່ນິໂນ້ມາຫາທີ່ເຮືອນ ແລະ ນີ້ກໍ່ເປັນຄັ້ງທຳອິດທີ່ມີຜູ້ບ່າວມາເຮືອນບຸນຈິ່ງຮູ້ສຶກຕື່ນເຕັ້ນເປັນພິເສດ ໃນເບື້ອງຕົ້ນນິໂນ້ກໍ່ບໍ່ຮູ້ຈັກສິເລີ່ມເວົ້າແນວໃດດີ ເພາະລາວກໍ່ຮູ້ສຶກຜິດທີ່ຕ້ອງທຳຮ້າຍຈິດໃຈຂອງບຸນຖ້າເວົ້າຄວາມຈິງອອກໄປ ເພາະບຸນກໍ່ເປັນຄົນທີ່ຕົນເອງຮູ້ຈັກ ທີ່ສຳຄັນນິໂນ້ກໍ່ຢ້ານນົກ ກັບ ບຸນ ມີບັນຫາກັນ ແຕ່ບໍ່ເວົ້າຄວາມຈິງອອກໄປລາວກໍ່ຊ້ຳພັດອຶດອັດໃຈ ແລະ ຮູ້ສຶກບໍ່ສະບາຍໃຈຕະຫຼອດເວລາ ເພື່ອໃຫ້ເລື່ອງນີ້ມັນຈົບນິໂນ້ເລີຍຕັດສິນໃຈ ບອກຄວາມຮູ້ສຶກທີ່ແທ້ຈິງອອກໄປວ່າຕົນເອງຄິດກັບບຸນພຽງເພື່ອນເທົ່ານັ້ນ ເລື່ອງນີ້ມັນໄດ້ທຳຮ້າຍຈິດໃຈບຸນສຸດໆ ບຸນທັງຮູ້ສຶກເສຍໃຈ ແລະ ຮູ້ສຶກເສຍໜ້າຢ່າງແຮງ ການທີ່ນິໂນ້ມາບອກແບບນີ້ກັບບຸນມັນໄດ້ເຮັດໃຫ້ຄວາມສຳພັນການເປັນໝູ່ກັບນົກຕ້ອງຢຸດຕິລົງ ເພາະບຸນບໍ່ສາມາດຮັບຄວາມຈິງທີ່ແສນເຈັບປວດໄດ້ ນັບແຕ່ນັ້ນມາບຸນກໍ່ລາອອກຈາກການເປັນພະນັກງານຫ້າງສັບພະສິດຄ້າ ແລະ ເລີກເປັນເພື່ອນຂອງນົກ ເຊິ່ງເລື່ອງນີ້ມັນໄດ້ເຮັດໃຫ້ນົກເສົ້າໃຈໄປຫຼາຍເດືອນ ແຕ່ມັນກໍ່ເຮັດໃຫ້ນົກຮູ້ເຖິງຈິດໃຈຂອງຄົນໄດ້ເລິກເຊິ່ງຫຼາຍຂຶ້ນ ຮູ້ວ່າໃຜຄືມິດແທ້ ແລະ ໃຜຄືມິດປອມ

ແຕ່ງໂດຍ: ແອັດມິນ ປັອກເລັກ ລາວໂພສຕ໌
ຕິດຕາມເລື່ອງດີດີເພຈຊີວິດແລະຄວາມຮັກ ກົດໄລຄ໌ເລີຍ!