ຄຸນສົມບັດ ເປັນສ່ວນປະກອບທີ່ສໍາຄັນຂອງມະນຸດໂດຍທົ່ວໄປ ແມ່ນບັນດາທັດສະນະຄະຕິ ແລະອຸດົມການທີ່ເປັນມາດຖານມີລັກສະນະໃນຕົວ ແລະນອກຕົວທີ່ສະແດງອອກທາງກາຍ, ວາຈາ ແລະຈິດໃຈອັນເປັນທີ່ຍອມຮັບຂອງສັງຄົມໃດໜຶ່ງ.
- ຄຸນສົມບັດທາງກາຍ ເປັນການສະແດງອອກດ້ວຍການປະພຶດ, ປະຕິບັດໃຫ້ສອດຄ່ອງກັບ ຮີດຄອງປະເພນີພ້ອມທັງມີກິລິຍາມາລະຍາດດີ ເຊິ່ງແຕ່ລະບຸກຄົນໄດ້ສະແດງອອກດ້ວຍການກະທຳຕ່າງໆ ທີ່ບົ່ງບອກເຖິງບຸກຄະລິກ, ລັກສະນະທ່າທີອັນດີງາມ ໃຫ້ມີຄວາມສຸພາບຮຽບຮ້ອຍເປັນຕົ້ນແມ່ນ ການນຸ່ງຖືຂອງຄົນລາວສະແດງອອກພົ້ນເດັ່ນແມ່ນເພດຍິງ ເຖິງແມ່ນວ່າບໍ່ງາມກໍໃຫ້ຮຽບຮ້ອຍ ແຕ່ບໍໍ່ແມ່ນແຕ່ງກາຍຈົນເກີນໄປ ເຮັດໃຫ້ເປັນເປົ້າສາຍຕາຂອງຄົນອ້ອມຂ້າງ, ການຍ່າງກໍຄວນຍ່າງດ້ວຍຄວາມລະມັດລະວັງ, ການກິນຕ້ອງຄ່ອຍກິນ ກິນດ້ວຍຄວາມສຸພາບຮຽບຮ້ອຍ, ການນອນກໍຄວນມີສະຕິຄ່ຽມຄົມ.
- ຄຸນສົມບັດທາງດ້ານວາຈາ ເປັນການສະແດງອອກດ້ວຍການປາກເວົ້າໂດຍສະເພາະ ແມ່ນເວົ້າຈາປາໄສ ໃຫ້ມີຄວາມສຸພາບນິ້ມນວນອ່ອນຫວານ, ເວົ້າດ້ວຍສັດຈະຄວາມຈິງ ບໍ່ຕົວະຕົ້ມຫຼອກລວງ, ສໍານຽງສຽງເວົ້າຂອງເຮົາເຮັດໃຫ້ເປັນຕາໜ້າເຊື່ອຖື ເຮັດໃຫ້ຄົນອ້ອມຂ້າງສົນໃຈ ແລະຮັກແພງ.
- ຄຸນສົມບັດທາງດ້ານຈິດໃຈ ແມ່ນຄວາມຄິດຈິດສຳນຶກ ຢູ່ໃນສ່ວນຂອງບຸກຄົນທີ່ຄິດສ້າງແຕ່ຄວາມດີມີປະໂຫຍດ ເຊິ່ງຄົນອື່ນບໍ່ສາມາດເຫັນໄດ້ ແຕ່ສຳຜັດໄດ້ດ້ວຍຄວາມຮູ້ສຶກ, ດ້ວຍການມີນໍ້າໃຈ ມີຈິດໃຈທີ່ດີງາມ, ມີຄວາມເອື້ອເຟື້ອເຜື້ອແຜ່ ແລະຊ່ວຍເຫຼືອຄົນອື່ນໃນຍາມທີ່ຕົກທຸກໄດ້ຍາກໂດຍບໍ່ຫວັງຜົນຕອບແທນ.
ພາບປະກອບບົດ: ນາງສາວລາວປີ 2013