ສຳນັກຂ່າວຕ່າງປະເທດ ລາຍງານໃນວັນທີ 4 ພຶດສະພານີ້ວ່າ ກຸ່ມສັງເກດການເພື່ອສິດທິມະນຸດໃນຊີຣີ ຫລື SOHR ໄດ້ລະບຸວ່າ ຝ່າຍຕໍ່ຕ້ານລັດຖະບານຊີຣີ ທີ່ຍຶດຄອງບາງພື້ນທີ່ຂອງເມືອງອະເລບໂປ ໄດ້ຍິງລູກສອນໄຟໂຈມຕີ ໃສ່ພື້ນທີ່ເມືອງອະເລບໂປ ທີ່ລັດຖະບານສາມາດປົດປ່ອຍໄດ້ ໃນວັນອັງຄານທີ 3 ພຶດສະພາຜ່ານມານີ້ ສົ່ງຜົນເຮັດໃຫ້ມີຜູ້ເສຍຊີວິດ 19 ຄົນ ແລະ ມີໂຮງໝໍໃນເຂດມູຮາຟາຊາ ໄດ້ຮັບຄວາມເສຍຫາຍໜັກໜ່ວງ ຊຶ່ງໃນນັ້ນ ໄດ້ເຮັດໃຫ້ຄົນເຈັບ 3 ຄົນເສຍຊີວິດ ແລະ ບາດເຈັບອີກ 17 ຄົນ.
ດ້ານກອງທັບຊີຣີ ໄດ້ອອກມາຖະແຫລງວ່າ ການໂຈມຕີຂອງຝ່າຍຕໍ່ຕ້ານ ໄດ້ເກີດຂຶ້ນໃນຂະນະທີ່ເຈົ້າໜ້າທີ່ສາກົນ ແລະ ເຈົ້າໜ້າທີ່ໃນທ້ອງຖິ່ນ ກຳລັງມຸ່ງໜ້າສ້າງຄວາມເຂັ້ມແຂງ ໃຫ້ແກ່ຂໍ້ຕົກລົງຢຸດຍິງ ເພື່ອຢຸຕິການເປັນສັດຕູກັນ ໃຫ້ມີຜົນສັກສິດບັງຄັບໃຊ້.
ທັງນີ້ SOHR ໄດ້ເປີດເຜີຍວ່າ ນັບຕັ້ງແຕ່ເກີດການໂຈມຕີໃນເມືອງອະເລບໂປ ເມື່ອວັນທີ 22 ເມສາ 2016 ເປັນຕົ້ນມາ ໄດ້ເຮັດໃຫ້ພົນລະເຮືອນຊີຣີ ເສຍຊີວິດແລ້ວ 279 ຄົນ ຊຶ່ງໃນຈຳນວນນີ້ 155 ຄົນ ແມ່ນຢູ່ໃນເຂດຝ່າຍຕໍ່ຕ້ານຍຶດຄອງ ແລະ ອີກ 124 ຄົນ ແມ່ນຢູ່ໃນພື້ນທີ່ເຂດປົດປ່ອຍຂອງລັດຖະບານຊີຣີ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!