ບ່າຍວັນທີ 16 ກຸມພານີ້, ຢູ່ທີ່ຫໍພະແກ້ວ ນະຄອນຫລວງວຽງຈັນ, ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫລວງວຽງຈັນ ໄດ້ຖະແຫລງຕໍ່ສື່ມວນຊົນ ກ່ຽວກັບຜົນສຳເລັດຂອງ ການປະຕິສັງຂອນຫໍພະແກ້ວ ໄລຍະທຳອິດວ່າ: ພາຍຫລັງໄດ້ເລີ່ມປະຕິສັງ ຂອນຫໍພະແກ້ວ ຄັ້ງທຳອິດ ມາແຕ່ຕົ້ນເດືອນມັງກອນ 2015 ແລະ ມາຮອດປັດຈຸບັນ ການປະຕິສັງຂອນດັ່ງກ່າວ ໄດ້ສຳເລັດຕາມລະດັບຄາດໝາຍທີ່ວາງໄວ້ເຊັ່ນ: ການສ້ອມແປງໂຄງຫລັງຄາ, ສ້ອມແປງຕົວອາຄານ ແລະ ສ້ອມແປງພື້ນຫໍ ໂດຍໃຊ້ງົບປະມານຫລາຍກວ່າ 5 ຕື້ກີບ ແລະ ຮັບວ່າການປະຕິສັງຂອນບູຮານສະຖານດັ່ງກ່າວ ແມ່ນມີຄວາມຫຍຸ້ງຍາກຫລາຍຢ່າງ ເພື່ອສາມາດຮັກສາຮູບຊົງເດີມ ແລະ ລວດລາຍລະອຽດຕ່າງໆຂອງມັນໄວ້ໄດ້ ແລະ ເພື່ອເປັນການສະຫລຸບ ແລະ ຕີລາຄາຜົນສຳເລັດຂອງການປະຕິສັງຂອນດັ່ງກ່າວ, ໃນວັນທີ 21 ກຸມພານີ້, ທາງຄະນະຮັບຜິດຊອບ ຈະໄດ້ຈັດງານບຸນຄົບງັນ ແລະ ໃສ່ບາດຕາມປະເພນີ ພ້ອມທັງເຊີນຊວນຊາວນະຄອນຫລວງວຽງຈັນ ກໍຄືຊາວພຸດທະສາສະນິກະຊົນທັງຫລາຍ ພ້ອມຜູ້ໃຫ້ການສະໜັບສະໜູນທຶນໃນຜ່ານມາ ໄດ້ມາຮ່ວມຊົມຫໍພະແກ້ວ ພາຍຫລັງປະຕິສັງຂອນໄລຍະທີໜຶ່ງວ່າ ຖືກຕ້ອງຕາມລາຍລະອຽດຕ່າງໆແລ້ວ ຫລື ບໍ່. ກ່ອນຈະມີການປະຕິສັງຂອນໄລຍະທີ 2 ແລະ 3 ຕໍ່ໄປ ແລະ ກໍຂໍເຊີນຊວນຜູ້ມີຈິດໃຈສັດທາທັງຫລາຍ ເຂົ້າຮ່ວມບໍລິຈາກປັດໄຈ ເພື່ອປະກອບສ່ວນ ເຂົ້າໃນການບູລະນະຮັກສາ ມໍລະດົກອັນລ້ຳຄ່າດັ່ງກ່າວ ໄວ້ຢູ່ຄູ່ບ້ານຄູ່ເມືອງລາວເຮົາ ຕະຫລອດໄປ.
ຫໍພະແກ້ວສ້າງ ຂຶ້ນໃນປີ ພສ 2108 (ຄສ 1565) ໃນສະໄໝລາຊະການພະເຈົ້າໄຊເສດຖາທິລາດ ເພື່ອເປັນທີ່ປະດິດສະຖານຂອງ ພະແກ້ວມໍລະກົດ ອົງດຽວເທົ່ານັ້ນ, ຖືວ່າແມ່ນສິ່ງສັກສິດຄູ່ບ້ານຄູ່ເມືອງ, ເປັນເຄື່ອງໝາຍ ແລະ ສັນຍາລັກທີ່ຕິດພັນກັບຄວາມອຸດົມສົມບູນ, ຄວາມເຊື່ອຖື, ຄວາມສັກກາລະບູຊາຂອງຊາວລາວເຮົາ ເຊິ່ງຫໍພະແກ້ວເດີມນັ້ນ ໄດ້ຖືກພວກສັກດີນາສະຫຍາມເຂົ້າມາຮຸກຮານ ແລະ ທຳລາຍລົງ ພ້ອມກັບຕົວເມືອງວຽງຈັນເຖິງ 2 ຄັ້ງ ຄືຄັ້ງທີໜຶ່ງແມ່ນເມື່ອປີ ຄສ 1779 ພວກສັກດີນາສະຫຍາມ ໄດ້ທຳການຮຸກຮານອານາຈັກລ້ານຊ້າງ ດ້ວຍການມ້າງເພທຳລາຍຕົວເມືອງວຽງຈັນ ແລະ ຫໍພະແກ້ວ.ນອກຈາກນີ້ ພວກເຂົາຍັງໄດ້ນຳເອົາພະແກ້ວ ໄປປະດິດສະຖານຢູ່ທີ່ບາງກອກ. ຄັ້ງທີ 2 ໃນປີ ຄສ 1826-29 ຫໍພະແກ້ວ ໄດ້ຖືກພວກສັກດີນາສະຫຍາມ ເຂົ້າມາຮຸກຮານອາຈາຈັກລາວລ້ານຊ້າງ ທຳການຈູດເຜົາ ແລະ ມ້າງເພທຳລາຍລົງ ພ້ອມນະຄອນຫລວງວຽງຈັນລົງອີກ ເຊິ່ງການທຳລາຍໃນຄັ້ງນີ້ ໄດ້ເຮັດໃຫ້ຕົວເມືອງວຽງຈັນ ທີ່ເຕັມໄປດ້ວຍວັດວາອາຮາມທີ່ສວຍສົດງົດງາມ ຕ້ອງພັງພິນາດລົງຢ່າງຮາບກ້ຽງ.
ແຫລ່ງຂ່າວ:
