spot_img
Home​ຂ່າວບັນເທິງສຸດອາໄລ ຄຳພູ ທະວີວັນ ລາຊາເພງບ້ານນາລາວ

ສຸດອາໄລ ຄຳພູ ທະວີວັນ ລາຊາເພງບ້ານນາລາວ

Published on

ປະຫວັດຂອງອາຈານ ຄຳພູ ທະວີວັນ
…………………
ຄຳພູ ທະວີວັນ ເກີດເມື່ອວັນທີ 8 ມັງກອນ 1942 ທີ່ບ້ານຄັນເກິ່ງ ເມືອງປາກເຊ ແຂວງຈຳປາສັກ ເສຍຊີວິດໃນວັນທີ 5 ກຸມພາ 2016 ທີ່ບ້ານເວີນຄຳ ເມືອງໄຊທານີ ນະຄອນຫຼວງວຽງຈັນ, ລວມອາຍຸໄດ້ 74 ປີ.

ຄຳພູທະວີວັນເກີດໃນຄອບຄົວເຊິ່ງພໍ່ເປັນຊ່າງໄຟຟ້າ…ຄາວຍັງເປັນເດັກນ້ອຍມີພອນສະຫວັນໃນການອ່ານບົດກອນ ແລະ ບົດສູດເທດດ້ວຍນ້ຳສຽງທີ່ອອນຊອນໃຫ້ຜູ້ເຖົ້າໃນບ້ານຟັງຈົນກາຍເປັນຄວາມຊິນເຄີຍແລະຊຶມຊັບມໍລະດົກທາງສິລະປະວັນນະຄະດີເຂົ້າໃນສາຍເລືອດ…
…………………….
ປີ 1959 ຄຳພູ ທະວີວັນ ກ້າວເຂົ້າສູ່ວົງການເພງດ້ວຍການເປັນນັກຮ້ອງສະໝັກຫຼິ້ນ ສັງກັດກົມແຜນທີ່ແຫ່ງຊາດ ເປັນການເປີດແລວທາງສິລະປະຕາມທີ່ຕົນເອງໄຝ່ຝັນ…
……………………………
ປີ1961 ມີການເສັງເພງທີ່ປາກເຊ ຄຳພູ ທະວີວັນ ເຊິ່ງເວລານັ້ນສັງກັດ ວົງດົນຕຣີ ກອງທັບພາກ 4 ເຂົ້າແຂ່ງຂັນ ແຕ່ຍັງບໍ່ທັນໄດ້ແຕ່ງເພງເອງ ເພງທີ່ນຳເຂົ້າແຂ່ງຂັນມີຊື່ວ່າ “ແຄນແສນແສບ”ແຕ່ງໂດຍ ອາຈານ ມໍລະດົກເຊິ່ງໄດ້ຮັບລາງວັນຊະນະເລີດໃນງານນັ້ນ…ສິ່ງນັ້ນເປັນກຳລັງໃຈອັນແຮງກ້າໃຫ້ ຄຳພູ ທະວີວັນ ເດີນໜ້າໃນສາຍທາງເພງ , ການເສັງເພງປີຕໍ່ມາ (1962) ເພິ່ນຈຶ່ງສືບຕໍ່ເຂົ້າແຂ່ງຂັນອີກ ແລະ ໄດ້ແຕ່ງເພງເອງເປັນເພງທຳອິດໃນຊີວິດ ມີຊື່ເພງວ່າ “ທະນີນາງຄວນ” ແລະກໍ່ຄວ້າລາງວັນຊະນະເລີດເປັນປີທີ 2 ຈາກລາງວັນດັ່ງກ່າວຈາກນັກຮ້ອງທຳມະດາເພິ່ນຈຶ່ງໄດ້ຖືກແຕ່ງຕັ້ງໃຫ້ເປັນຫົວໜ້າວົງດົນຕຣີ ກອງທັບພາກ 4 ໃນເວລາຕໍ່ມາ
…………………
ລະຫວ່າງປີ 1963 -65 ຄຳພູ ທະວີວັນໄດ້ເຂົ້າຮຽນທີ່ ໂຮງຮຽນ ນາຍຮ້ອຍສຳຮອງ (ຮຸ່ນທີ 7 )ທີ່ຈຳປາສັກ ຈາກຜົນງານແລະຊື່ສຽງທີ່ສ້າງມາເຂົາກໍ່ຖືກມອບໝາຍໃຫ້ເປັນຮອງຫົວໜ້າວົງດົນຕຣີ “ຍຸດທະການພາກໃຕ້” (ປະຈຳການທີ່ສະຫວັນນະເຂດ) ແລະເປັນໄລຍະທີ່ເຂົາໄດ້ຮູ້ຈັກຮັກແພງກັບ “ຈຳປາ ຣັຕນະສະຫວັນ” (ສຸລິວັດ)ນັກແຕ່ງເພງຊັ້ນອາຈານອີກຄົນໜຶ່ງຊຶ່ງເປັນຫົວໜ້າວົງ.
………………………..
ຈາກນັ້ນ 2 ປີ ຄຳພູ ທະວີວັນ ຖືກຍົກຍ້າຍຂື້ນມາປະຈຳການຢູ່ໂພນເຄັງ ນະຄອນຫຼວງວຽງຈັນມາຮັບໜ້າທີ່ຫົວໜ້າວົງດົນຕຣີກົມຈິດຕະວິທິຍາ ເພິ່ນເລົ່າວ່າໄລຍະມາປະຈຳການຢູ່ວຽງຈັນທຳອິດແມ່ນຖືກໄປປະຈຳການເວນຍາມຢູ່ແຄມນ້ຳຂອງ ຍ່ານບໍ່ໂອ – ແກ້ງຍາງ ການໄກບ້ານໄກຄົນຮັກມາຈຶ່ງເກີດມາຣົມຂຽນເພງ “ສຽງແຄນ” ອອກມາ …ແລະການປະຈຳການທີ່ຄ້າຍແບບບໍ່ໄດ້ເງິນເດືອນກໍ່ແມ່ນອີກອາຣົມໜຶ່ງທີ່ພາໃຫ້ມີເພງ “ຫິວ”…ຈາກນັ້ນກໍ່ມີອີກຫຼາຍເພງທີ່ເຂົາແຕ່ງຕາມມາຕິດໆ ເຊັ່ນ “ຮັກສາວວຽງຈັນ” “ຈົດໜາຍນ້ອຍ”
…………………………….
ນະຄອນວຽງຈັນເວລານັ້ນເວົ້າໄດ້ວ່າຕົກຢູ່ໃນໃຕ້ອິດທິພົນຂອງວັດທະນະທຳຕາເວັນຕົກເຂົາຈຶ່ງແຕ່ງເພງເຍາະເຍີ້ຍສຽດສີແມ່ຍິງທີ່ຫຼົງໄຫຼນຳແຟຊັນແລະຄວາມທັນສະໄໝ ເຊັ່ນເພງ “ໄກ້ຍາມຍ້ອນຂົນ ຄົນງາມຍ້ອນແຕ່ງ” ເພງ “ຄົນຫຼືຜີ”..ດັ່ງນີ້ເປັນຕົ້ນ
…………………………
ດ້ວຍອາຣົມສິລປ໌ ທີ່ຫຼາກຫຼາຍ..ຍາມເຮຮາເບົາສະໝອງເຂົາກໍ່ແຕ່ງເພງ “ພໍ່ຕູ້ເຜີຍ”ອອກມາ (ເປັນເພງແຕ່ງຢອກເຍີ້ອຍໝູ່ຮັກໝູ່ແພງທຳມະດາ ແຕ່ດັງທົ່ວບ້ານທົ່ວເມືອງ)
…………………………
ປີ 1969 ຄຳພູ ທະວີວັນ ໄດ້ອັດແຜ່ນສຽງ 2 ຊຸດ(ລວມ 24 ເພງ) ຄືຊຸດ “ຊາຍພະເນຈອນ” ແລະ “ນ້ຳຕາພໍ່” ນອກຈາກແຕ່ງເພງ-ຮ້ອງເພງເອງແລ້ວເຂົາຍັງແຕ່ງເພງໃຫ້ນັກຮ້ອງຜູ້ອື່ນໆອີກເຊັ່ນ : ຄຳແພງ ຈຸນລະມະນີ (ເພງ “ສາມສາວ”) ໃຫ້ ສຸພັດ ເພງ “ອອກພັນສາແຄ້ນໃຈ” ແຕ່ງໃຫ້ ນາງສາວ ນວນສີ ເພງ “ນ້ຳຕາແມ່” ໃຫ້ ນາງສາວ ນາຣຽມ ແກ້ວປະຊາ ເພງ “ວັນຊື່ນຄືນສຸກ” ໃຫ້ ເທບພອນ ເທບພິທັກ ແລະຜູ້ອື່ນໆຫຼາຍເຕີບ!…ນອກຈາກນີ້ຍັງໄດ້ແຕ່ງເພງປະກອບຮູບເງົາຫຼາຍເລື່ອງ ເຊັ່ນ : “ສາຍນ້ຳດົງໂຈນ” “ບ້ານນາປ່າສະຫວັນ” “ສາຍເລືອດດຽວກັນ” ແລະເພງປະກອບລະຄອນເວທີຂອງກົມຈິດຕະວິທະຍາທັງໝົດ!
…………………………………
ເມື່ອປະເທດຊາດໄດ້ຮັບການປົດປ່ອຍ ເວລານັ້ນ ຄຳພູ ທະວີວັນມີຍົດຮ້ອຍໂທ ຖືກຊັບຊ້ອນເຂົ້າກົມການເມືອງກອງທັບປົດປ່ອຍປະຊາຊົນລາວ
ສັງກັດກອງສິລະປະກອນກອງທັບມີໜ້າທີ່ເປັນນັກແຕ່ງເພງ ແລະ ນັກຮ້ອງໄປພ້ອມຈາກຜົນງານທີ່ສະໝ່ຳມ້ເໝີ ເຂົາກໍ່ໄດ້ເປັນຫົວໜ້າວົງດົນຕຣີກອງທັບອາກາດ ໃນປີ 1979 ໄລຍະນີ້ມີເພງໃໝ່ໆອອກມາໃຫ້ໄດ້ຟັງກັນຫຼາຍເພງເຊັ່ນ : “ຊີວິດຄູ” “6 ປີແຫ່ງຄວາມຫຼັງ” “ອວຍພອນພັກ” “ນ້ຳງຶ່ມສາຍໃຈ”
……………………………
ປີ 1983 ຄຳພູ ທະວີວັນ ໄດ້ອຳລາຊີວິດຊຸດຂຽວ (ກອງທັບ) ແລະຄິດວ່າຈະວາງມືຈາກອາຊີບນັກຮ້ອງ…ຂ່າວຄາວຂອງເຂົາຫາຍງຽບໄປໃນສັງຄົມຈົນແຟນເພງເຂົ້າໃຈວ່າເຂົາໂຕນໜີໄປອາເມຣິກາຂ່າວນີ້ແຜ່ກະຈາຍໄປທົ່ວສັງຄົມ..ຈົນຮອດປີ 1989 ຄຳພູ ທະວີວັນ ອົດບໍ່ໄດ້ຕໍ່ຂ່າວຄາວອັນບໍ່ເພິ່ງປາຖະໜາຄືດັ່ງກ່າວ ຈຶ່ງຕັດສິນໃຈກັບຄືນສູ່ວົງການເພງ ແລະໄດ້ອອກອັລບັ້ມຊຸດ “ແກ້ຂ່າວ “…ເຊິ່ງມີເນື້ອເພງຫຍໍ້ໆວ່າ ” ຫຼາຍຄົນກ່າວວ່າເຮົານັ້ນຈາກໄປແລ້ວ..ໜີແນວໄປຫາກິນແກ່ວແຖວໃໝ່..ບັງຄົນກໍ່ວ່າເຮົາໜີໄປຢູ່ເມືອງໄທຍ ຍັງມີຫຼາຍໆກໍ່ວ່າໄປຢູ່ອາເມຣິກາ…ຫຼາຍຄົນກ່າວວ່າເຮົາລືມພີ່ລືມນ້ອງ ລືມພວກພ້ອງບໍ່ຫວັງປອງເຫັນໜ້າ ປານນີ້ຄົງຢູ່ອາເມຣິກອກ ອາເມຣິກາ ຫຼາຍຄົນກໍ່ວ່າຍັງຄ້າງຄາຢູ່ເມືອງໄທ” ເພງນີ້ສ້າງກະແສຮືຮາທີ່ສຸດພ້ອມໆກັບການປາກົດຕົວເທິງເວທີຄອນເສີດຄັ້ງໃໝ່ ຂອງຄຳພູ ທະວີວັນ…
………………………..
ໃນຍຸກການເສີມສ້າງສາຍພົວພັນຄັ້ງໃໝ່ລະຫວ່າງສອງຊາດ ລາວ – ໄທຍ ພາຍຫຼັງເກີດການເກາະຜິດກັນມາເປັນໄລຍະ…ຄຳພູ ທະວີວັນ ກໍ່ມີເພງ “ປູ່ຈັນ” ອອກມາສ້າງຈິດສຳນຶກ ເຖິງຄວາມເປັນເຊື້ອສາຍລາຍລ່ອງອັນດຽວຂອງຄົນສອງຝັ່ງນ້ຳໄດ້ຢ່າງດູດດື່ມ ແລະ ປະທັບໃຈ..
……………………….
ຈາກນັ້ນເຂົາກໍ່ເດີນໜ້າສ້າງສັນເພງອອກມາເລື້ອຍ ເພງ “ສາວຮ້ານນ້ອຍ ” ໃນຊຸດຕໍ່ມາກໍ່ໂດ່ງດັງບໍ່ຢອກ ຮ້ອງໄດ້ກັນທົ່ວບ້ານທົ່ວເມືອງ
ຕະຫຼອດຊີວິດເທົ່າທີ່ຈື່ໄດ້ ຄຳພູ ທະວີວັນ ບອກວ່າແຕ່ງເພງມາແລ້ວບໍ່ຕ່ຳກວ່າ 1000 ເພງ ທັງທີ່ໄດ້ບັນທຶກສຽງ ແລະ ຍັງ…ສຸດທ້າຍຂອງຊີວິດ ເພງ “ຫົກໂມງເຄິ່ງ “(6,30 ນ) ຂອງເຂົາກໍ່ໂດ່ງດັງທົ່ວບ້ານທົ່ວເມືອງ ແລະ ຍັງດັງຢູ່ທຸກວັນນີ້
…………………………
ຄຳພູ ທະວີວັນ ກາຍເປັນຕຳນານເພງບ້ານນາຜູ້ຍິ່ງໃຫຍ່ຄົນໜຶ່ງຂອງແຜ່ນດິນລາວ ມີຮູບແບບກການແຕ່ງເພງທີ່ມີເອກລັກສະເພາະທີ່ບໍ່ຄືໃຜ…ນອກຈາກແຕ່ງເພງທົ່ວໄປ ຍັງຮ່ວມແຕ່ງເພງຮັບໃຊ້ໜ້າທີ່ການເມືອງຂອງອົງການຈັດຕັ້ງພັກ-ລັດບໍ່ໄດ້ຂາດຈົນໄດ້ຮັບການມອບນາມມະຍົດໃຫ້ເປັນສິລະປິນແຫ່ງຊາດ ສາຂາສິລະປະການສະແດງ ເມື່ອ ປີ 2012
…………………..
ວັນນີ້ສິ້ນແລ້ວສິລະປິນຜູ້ຍິ່ງໃຫຍ່ຂໍແຜ່ນດິນ ດ້ວຍຈິດຄາຣະວະຂໍໃຫ້ດວງວິນຍານຂອງທ່ານ ຈົ່ງໄປສູ່ສຸຂຕິເຖີດ ..ຊື່ສຽງແລະຜົນງານຈະຟູ່ເຟື້ອງຄຸ່ແຜ່ນດິນ ແລະ ລູກຫຼານສິລະປິນຕາບນານແສນນາມອັນເປັນນິຣັນ.

ທີ່ມາ:  ແນວໂຮມຄົນລູກທົ່ງບ້ານນາລາວ

ບົດຄວາມຫຼ້າສຸດ

ມະຕິກອງປະຊຸມສະພາແຫ່ງຊາດກ່ຽວກັບການຮັບຮອງເອົາກົດໝາຍວ່າດ້ວຍການປົກຄອງທ້ອງຖິ່ນ (ສະບັບປັບປຸງ)

ມະຕິກອງປະຊຸມສະພາແຫ່ງຊາດກ່ຽວກັບການຮັບຮອງເອົາກົດໝາຍວ່າດ້ວຍການປົກຄອງທ້ອງຖິ່ນ (ສະບັບປັບປຸງ) ມີລາຍລະອຽດດັ່ງນີ້:

ຕັ້ງໃຈ ຫຼື ອຸບັດຕິເຫດ! ເປີດເຜີຍສາເຫດເຮືອບິນ ແອອິນເດຍ ປະສົບອຸບັດຕິເຫດຕົກ

ເປີດເຜີຍສາເຫດເຮືອບິນ ແອອິນເດຍ ປະສົບອຸບັດຕິເຫດຕົກ ເຮັດໃຫ້ມີຜູ້ເສຍຊີວິດເປັນຈຳນວນຫຼາຍ. ສຳນັກຂ່າວຕ່າງປະເທດລາຍງານໃນວັນທີ 12 ກໍລະກົດ 2025, ໜ່ວຍງານສອບສວນອຸບັດຕິເຫດທາງອາກາດອິນເດຍ (AAIB) ໄດ້ເຜີຍແຜ່ລາຍງານເບື້ອງຕົ້ນກ່ຽວກັບສາເຫດທີ່ເຮັດໃຫ້ເຮືອບິນສາຍການບິນແອອິນເດຍ (Air India) ຖ້ຽວບິນທີ AI171...

ສຕລ ປະກາດລາຍຊື່ນັກກິລາທີມຊາດລາວ ຍູ 23 ເຂົ້າຮ່ວມການແຂ່ງຂັນບານເຕະ ຊາຍຊິງແຊ້ມອາຊຽນ ຮຸ່ນອາຍຸບໍ່ເກີນ 23 ປີ ທີ່ປະເທດອິນໂດເນເຊຍ.

ປະກາດ 23 ລາຍຊື່ນັກກິລາທີມຊາດລາວ ຮ່ວມການແຂ່ງຂັນບານເຕະ ຊາຍຊິງແຊ້ມອາຊຽນ ຮຸ່ນອາຍຸບໍ່ເກີນ 23 ປີ ທີ່ປະເທດອິນໂດເນເຊຍ. ໃນວັນທີ 11 ກໍລະກົດ 2025 ສະຫະພັນບານເຕະແຫ່ງຊາດລາວ (ສຕລ)...

ດາວດວງໃໝ່! ສາຍແສງໃນເວທີສາກົນ ອອດສະກ້າ ນັກກິລາໜຸ່ມນ້ອຍລາວ ອອກເດີນທາງຮ່ວມຝຶກຊ້ອມກັບສະໂມສອນ ຄອນເນຢາ

ນ້ອງ ອອດສະກ້າ ອາຍຸ 11 ປີ ໜຸ່ມນ້ອຍແຄ່ງລູກເຂົ້າໜຽວ ອອກເດີນທາງຮ່ວມຝຶກຊ້ອມກັບສະໂມສອນ ຄອນເນຢາ ທີ່ປະເທດແອັດສະປາຍ. ກາຍເປັນອີກຂ່າວດີຂອງວົງການກິລາບານເຕະເຍົາວະຊົນລາວ ອີກໜຶ່ງຜົນງານໃນເວທີສາກົນ ທ້າວ ສີນໄຊ ຫຼວງບຸນເຮືອງ ຫຼື...