ຕາມ​ຂ່າວ​ຕ່າງປະ​ເທດ, ວັນ​ທີ 14​ ມັງກອນ, ຟອນ​ເທຍຣາ “Fonterra“ ຜູ້​ຜະລິດ​ນົມ​ຂະໜາດ​ໃຫຍ່​ຂອງນິວຊີແລນ ທີ່ກວມຕະຫລາດນົມ ສົ່ງອອກເຖິງ 1/3 ຂອງໂລກ ໄດ້ເອີ້ນຄືນສິນຄ້າ “ປະເພດຄີມສົດ“ ຈຳນວນເກືອບ 9 ພັນແກ້ວ ຫລັງຈາກ ກວດພົບການປົນ​ເປື້ອນ​ເຊື້ອ​ອີ​ໂຄ​ໄລ ທີ່​ເຮັດ​ໃຫ້​ເກີດ​ອາການ​ຖອກທ້ອງ ຖືເປັນ​ຄັ້ງທຳ​ອິດ​ໃນ​ຮອບ 18 ປີ ທີ່​ຜະລິດ​ຕະພັນ​ຂອງຟອນ​ເທຍຣາ ຖືກ​ກວດ​ພົບ​ເຊື້ອ​ດັ່ງກ່າວທີ່ເປັນ​ແບ​ດທີ​ເຣຍ ​ເຊິ່ງ​ພົບ​​ໃນ​ອາຈົມ​ຂອງ​ມະນຸດ​,​ ສັດ ອັນ​ຈະ​ເຮັດ​ໃຫ້​ຜູ້​ບໍລິ​ໂພ​ກ​ເກີດ​ການ​ຕິດ​ເຊື້ອ ​ແລະ ມີ​ອາການ​ຄ້າຍຄື​ອາຫານເປັນ​ພິດ. ຂະນະ​ດຽວ​ກັນ ​ເມື່ອ​ປີ 2008 ຜ່ານ​ມາ, ບໍລິສັດ​ນົມ​ໃນ​ຈີນ ​ເຊິ່ງ​ຟອນ​ເທຍຣາ ຖື​ຮຸ້ນ​ຢູ່​ບາງ​ສ່ວນ ໄດ້ກວດ​ພົບ​ສານ​ເມລາ​ມິນ ໃນ​ນົມ​ສຳ​ລັບ​ເດັກ​ ອັນ​ເຮ​ັດ​ໃຫ້​ມີ​ເດັກ​ຊາວ​ຈີນ ເສຍ​ຊີວິດ​ໄປ 6​ ຄົນ ​ແລະ​ ເຈັບ​​ປາວ​ຍ​ອີກ 3 ​ແສນ​ຄົນ.
ຜູ້ອຳນວຍການ​ຝ່າຍ​ບໍລິຫານ​ຂອງ Fonterra ແຈ້ງວ່າ: ສາ​ເຫດ​ຂອງ​ການ​ປົນ​ເປື້ອນ​ເຊື້ອອີ​ໂຄ​ໄລນີ້ ບໍ່​ໄດ້ເກີດ​ຈາກ​ນົມງົວ​ທີ່​ຜະລິດ​ໃນ​ຟາ​ມ ​ແລະ ເປັນ​ໄປ​ບໍ່​ໄດ້​ທີ່​ຈະ​ເປັນ​ການ​ເຮັດ​ໂດຍ​ເຈຕະນາ, ສຳລັບ ​ຜະລິດ​ຕະພັນ​ທີ່​ຖືກ​ເອີ້ນ​ຄືນ​ນີ້ ລວມມີ​ຄີມ​ສົດ​ຍີ່​ຫຍໍ້ “Anchor “ ​ແລະ “ Pams “ ທີ່​ວາງ​ຂາຍ​ເທິງ​ເກາະ​​ເໜືອ​ຂອງ​ນິວຊີ​ແລນ ​ທີ່ເຮັດ​ໃຫ້ Fonterra ສູນ​ເສຍ​ລາຍ​ຮັບ​ຈຳນວນ 300 ລ້ານ​ເອີ​ໂຣ.

ທີ່ມາ http://www.kpl.net.la/lao/world/world1.htm