ສະຫະພັນເທັນນິສແຫ່ງຊາດລາວ ຈະຈັດການແຂ່ງຂັນເທັນນິສເຍົາວະຊົນທົ່ວປະເທດ ຄັ້ງທີ 1 ຂຶ້ນໃນວັນທີ 26-27 ທັນວາ 2015 ນີ້ໂດຍໃຊ້ສະໜາມກີລາແຫ່ງຊາດ ຫຼັກ 16 ບ້ານດົງສ້າງຫີນ ເມືອງໄຊທານີ ນະຄອນຫຼວງວຽງຈັນ ເປັນສະຖານທີ່ແຂ່ງຂັນ ພາຍໃຕ້ການອຸປະຖໍາຫຼັກຂອງ ຜະລິດຕະພັນນໍ້າດື່ມກາຫົວເສືອ ຂອງບໍລິສັດເບຍລາວຈໍາກັດ.

ຫຼ້າສຸດ ທ່ານ ດາວວອນ ພະຈັນທະວົງ ປະທານ ສະຫະພັນເທັນນິສແຫ່ງຊາດລາວ ໄດ້ຖະແຫຼງຕໍ່ຜູ້ສື່ຂ່າວ ໃນຕອນແລງຂອງວັນ 11 ທັນວາ 2015 ທີ່ສະຫະພັນເທັນນິສແຫ່ງຊາດລາວ ເຊິ່ງທ່ານໄດ້ໃຫ້ຮູ້ວ່າ ການແຂ່ງຂັນເທັນນິສ ຄັ້ງທີ 1 ນີ້ ສໍາລັບຜູ້ຮຽນຫຼິ້ນເທັນນິສໃໝ່ ແລະ ຜູ້ທີຊໍານິຊໍານານແລ້ວ ຖືວ່າຈັດເປັນລາຍການໃຫຽ່ເທື່ອທໍາອິດ ໂດຍເປີດກວ້າງໃຫ້ເຍົາວະຊົນ-ຊາວໜຸ່ມ ໄວໜຸ່ມທົ່ວປະເທດ ທີ່ມີອາຍຸລະຫວ່າງ 8-18 ປີ ສະໝັກເຂົ້າຮ່ວມແຂ່ງຂັນ ສໍາລັບລາຍການແຂ່ງຂັນປະກອບມີ ປະເພດ ຍິງ-ຊາຍດ່ຽວ ອາຍຸບໍ່ເກີນ 8 ປີ ປະເພດ ຍິງ-ຊາຍດ່ຽວ ອາຍຸບໍ່ເກີນ 10 ປີ ປະເພດ ຍິງ-ຊາຍດ່ຽວ ອາຍຸບໍ່ເກີນ 12 ປີ ປະເພດ ຍິງ-ຊາຍດ່ຽວ ອາຍຸບໍ່ເກີນ 14 ປີ ປະເພດ ຍິງ-ຊາຍດ່ຽວ ອາຍຸບໍ່ເກີນ 16 ປີ ປະເພດຍິງ-ຊາຍດ່ຽວອາຍຸບໍ່ເກີນ 18 ປີ ນອກນີ້ ຍັງມີປະເພດອາຍຸທົ່ວໄປ ທັງນີ້ ກໍເພື່ອເປັນການປຸກລະດົມຊາວໜຸ່ມ ໄວໜຸ່ມ ເຍົາວະຊົນ ຫັນມາສ້າງກິດຈະກໍາ ຫຼິ້ນກີລາເພື່ອສຸຂະພາບ ເອົາຕົນຫ່າງໄກຈາກສິ່ງເສບຕິດ ທັງເປັນການເຝິກແອບທັກສະ ຄວາມສາມາດ ແລະ ປະສົບການຫຼິ້ນເທັນນິສ ໃຫ້ມີຄວາມຄ່ອງແຄ້ວ ວ່ອງໄວ ນອກນີ້ ຍັງເປັນການຄັດເລືອກເອົານັກກີລາທີ່ມີພອນສະຫວັນດີເດັ່ນ ເຂົ້າສັງກັດທີມຊາດ ເພື່ອເຂົ້າຮ່ວມແຂ່ງຂັນໃນລາຍການຕ່າງໆທັງລະດັບພາກພື້ນ ແລະ ສາກົນ.

ໃນວາລະດຽວກັນນີ້ ທ່ານ ດາວວອນ ພະຈັນທະວົງ ປະທານສະຫະພັນເທັນນິສແຫ່ງຊາດລາວ ຍັງໄດ້ມອບໃບຍ້ອງຍໍ ແລະ ເງິນສະໜັບສະໜູນຈໍານວນ 500.000 ກີບໃຫ້ແກ່ນ້ອງ ອາລິຍາ ວົງດາລາ (ນ້ອງປູເປ້) ແຊັມເທັນນິສຍິງດ່ຽວ 10 ປີ ແລະ ນ້ອງ ທິບພະສອນ ປານສີວົງໄຊ ແຊັມເທັນນິສຍິງດ່ຽວ 8 ປີ ເປັນສອງນັກກິລາເຍົາວະຊົນເທັນນິສຈາກ ສປປ.ລາວ ຄົນທຳອິດສ້າງປະຫວັດສາດໃຫ້ແກ່ວົງການເທັນນິສລາວໂດຍການຍາດໄດ້ຂັນຊະນະເລີດອັນດັບທີນຶ່ງ ຈາກການແຂ່ງຂັນເທັນນິສ ລາຍການ 100 PLUS ລອນເທັນນິສພັດທະນາສີມື ຮອບມາສເຕີ ທີ່ບາງກອກ ປະເທດໄທ ລະຫວ່າງວັນທີ 27 ພະຈິກ-ວັນທີ 02 ທັນວາ 2015 ຜ່ານມາ.

ແຫລ່ງຂ່າວ: