ການດຳເນີນການແຂ່ງຂັນກິລາບານເຕະຊາຍ ຊີງຂັນ ທ່ານຫົວໜ້າພະແນກສຶກສາທິການ ແລະ ກິລາ ແຂວງຫົວພັນ ຂໍ່ານັບຮັບຕ້ອນວັນຄູແຫ່ງຊາດ 7 ຕຸລາ ຄົບຮອບ 21 ປີ ປະຈຳປີ 2015 ໄດ້ປິດສາກລົງເປັນທີ່ຮຽບຮ້ອຍແລ້ວຢູ່ທີ່ ສະໜາມກິລາ ແຂວງຫົວພັນ
ໂດຍການເຂົ້າຮ່ວມຂອງ ທ່ານ ເພີດ ມາປັນຍາ ຫົວໜ້າພະແນກສຶກສາທິການ ແລະ ກິລາ ແຂວງຫົວພັນ ພ້ອມດ້ວຍຄະນະ, ພາກສ່ວນທີ່ກ່ຽວຂ້ອງ ແລະ ນັກກິລາເຂົ້າຮ່ວມ ພາຍຫຼັງທີ່ໄດ້ດຳເນີນທຳການແຂ່ງຂັນເມື່ອທ້າຍອາທິດທີ່ຜ່ານມາຂອງການເຂົ້າຮ່ວມຈາກ 8 ພາກສ່ວນຢູ່ໃນຂົງເຂດພະນັກງານ, ຄູອຈານ, ພະແນກການກ່ຽວຂ້ອງ ແລະ ໂຮງຮຽນອ້ອມຂ້າງເທດສະບານແຂວງຄື: ທີມພະແນກສຶກສາທິການ ແລະ ກິລາແຂວງ ເຈົ້າພາບ, ທະນາຄານພັດທະນາລາວເຈົ້າພາບຮ່ວມ, ໂຮງຮຽນ ມສ ພັນລາ, ໂຮງຮຽນ ມສ ພັນຊຳ, ໂຮງຮຽນມໍປາຍຕົວແບບ, ຫ້ອງວ່າການປົກຄອງແຂວງ, ວິທະຍາໄລທຸລະກິດສະ ໄໝຮຸ່ງເຮືອງ ແລະ ຫ້ອງການສຶກສາທິການ ແລະ ກິລາເມືອງຊຳເໜືອ ໂດຍການຈັດການແຂ່ງຂັນແບບປັດເຂ່ຍ ( ເສຍແລ້ວຕົກຮອບເລີຍ )
ຜ່ານການດຳເນີນການແຂ່ງຂັນໃນນັດ ທີ 1 ນັບແຕ່ ວັນທີ 1 ຕຸລາ 2015 ທີມ ພະແນກ ສຶກສາທິການ ແລະ ກິລາແຂວງ ສາມາດເອົາຊະນະ ທີມ ໂຮງຮຽນ ມສ ພັນຊຳ 3-2 ປະຕູ, ມາຮອດວັນທີ 5 ຕຸລາ 2015 ສາມາດເອົາຊະນະທີມໂຮງຮຽນ ມສ ພັນລາ ດ້ວຍການຍິງຖະຫຼົ່ມຢ່າງມີປະສິດທິພາບ ແລະ ຄວາມຄົມເຂັ້ມຂອງກອງໜ້າໂຕເກງໝາຍເລກ 9 ທອງວັນ ບຸນທະວົງ ຫົວໜ້າທີມຍິງ ເໝົາໄປດ້ວຍ 6-0 ປະຕູ ຜ່ານເຂົ້າຮອບຊີງຊະນະເລີດ ໄປພົບກັບທີມຫ້ອງການສຶກສາທິການ ແລະ ກິລາ ເມືອງຊຳເໜືອ ນ້ອງໃໝ່ມາແຮງແຊງທາງໂຄ້ງມາມືດສາມາດເອົາຊະນະທີມຫ້ອງວ່າການແຂວງດ້ວຍການຍິງຈຸດໂທດ 5-4 ປະຕູ, ທ່ານ ວັນສີ ສຸກສະຫວັນ ຄູເຝິກທີມ ພະແນກສຶກສາທິການ ແລະ ກິລາແຂວງ ໄດ້ໃຫ້ຮູ້ອີກຕື່ມວ່າ ຜ່ານການແຂ່ງຂັນໃນ 2 ນັດທີ່ຜ່ານມາເຫັນວ່ານັກກິລາແຕ່ລະຄົນຫຼິ້ນໄດ້ແບບສະບາຍບໍ່ມີຄວາມກົດດັນສະນັ້ນຈິ່ງໄດ້ສ້າງຄວາມໝັ້ນໃຈສູງໃຫ້ແກ່ນັກກິລາພາຍໃນທີມຂອງຕົນກ້າວເຂົ້າສູ່ການເປັນແຊ້ມຫຼາຍຂຶ້ນ
ມາຮອດຕອນແລງວັນທີ 7 ຕຸລາ 2015 ໄດ້ມີການແຂ່ງຂັນນັດຊີງຊະນະເລີດ ພົບກັນລະຫວ່າງ ທີມພະແນກສຶກສາທິການ ແລະ ກິລາ ແຂວງຫົວພັນ ພົບກັບ ທີມຫ້ອງການສຶກສາທິການ ແລະ ກິລາ ເມືອງຊຳເໜືອ ຜ່ານການແຂ່ງຂັນປະກົດວ່າ ທີມພະແນກສຶກສາທິການ ແລະ ກິລາ ແຂວງຫົວພັນ ໂຊຟອມດ້ວຍຄວາມແຂງແກ່ນ ແລະ ທົນທານກ່ວາ ຍິງປະຕູໄດ້ພາຍໃນ 1 ນາທີທຳອິດ ຈາກລູກຍິງໄກປະມານ 30 ແມັດ ຂອງ ເວີນສິງ ວິໄລພັນ ໝາຍເລກ 13 ມາຮອດນາທີທີ່ 5 ບຸນແກ້ວ ຄະລືສີ ນັກກິລາສຳຮອງທີ່ບໍ່ເຄີຍໄດ້ລົງສະໜາມໃນການແຂ່ງຂັນຊຸດຍິງເຂົ້າອີກ 1 ປະຕູ ເຮັດໃຫ້ຂຶ້ນນຳເປັນ 2 ປະຕູຈົບການແຂ່ງຂັນ 90 ນາທີ ພະແນກສຶກສາທິການ ແລະ ກິລາແຂວງ ຊະນະ 2-0 ປະຕູ ເປັນແຊ້ມໃນການແຂ່ງຂັນກິລາບານເຕະຊາຍ ຊີງຂັນ ທ່ານຫົວໜ້າ ພະແນກສຶກສາທິການ ແລະ ກິລາ ແຂວງຫົວພັນ ໄດ້ສຳເລັດ
ໃນທ້າຍພິທີ ທ່ານ ເພີດ ມາປັນຍາ ຫົວໜ້າ ພະແນກສຶກສາທິການ ແລະ ກິລາແຂວງ ໄດ້ມອບຂັນຊະນະເລີດ ພ້ອມດ້ວຍເງິນສົດ 1.000.000 ກີບໃຫ້ແກ່ ທີມພະແນກສຶກສາທິການ ແລະ ກິລາ ແຂວງ ທີ I ລາງວັນທີ II ໄດ້ແກ່ ທີມຫ້ອງການສຶກສາທິການ ແລະ ກິລາ ເມືອງຊຳເໜືອ ເງິນສົດ 7.00.000 ກີບ ແລະ ທີ III ໄດ້ແກ່ ທີມໂຮງຮຽນ ມສ ພັນລາ ເງິນສົດ 5.00.000 ກີບ