ກອງປະຊຸມຜູ້ບໍລິຫານການສຶກສາ ແລະ ກິລາ ແຂວງອຸດົມໄຊ ປະຈຳປີ 2015, ໄດ້ຈັດຂຶ້ນໃນລະຫວ່າງວັນທີ 13-14 ສິງຫາ 2015 ນີ້, ທີ່ສະໂມສອນຂອງຕົນ ພາຍໃຕ້ການເປັນປະທານຂອງ ທ່ານ ໂອວາດ ຈັນທະວົງ ຄະນະປະຈໍາພັກແຂວງ ຜູ້ຊີ້ນໍາວຽກງານວັດທະນະທໍາ-ສັງຄົມ ຫົວໜ້າພະແນກສຶກສາທິການ ແລະ ກິລາແຂວງອຸດົມໄຊ, ມີບັນດາທ່ານຄະນະພະແນກສຶກສາທິການ ແລະ ກິລາ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 04 ແຂວງອຸດົມໄຊ, ຫົວໜ້າ, ຮອງຫົວໜ້າພະແນກການອ້ອມຂ້າງແຂວງ, ທ່ານຮອງເຈົ້າເມືອງ, ຄະນະປະຈຳພັກເມືອງ, ອົງການສາກົນຕ່າງໆ ປະຈໍາແຂວງ, ຫົວໜ້າຫ້ອງການສຶກສາທິການ ແລະ ກິລາເມືອງ 7 ເມືອງ ພາຍໃນແຂວງ, ຜູ້ອໍານວຍການໂຮງຮຽນພາກລັດ-ເອກະຊົນ, ຫົວໜ້າຂະແໜງ, ຮອງຂະແໜງພະແນກສຶກສາທິການ ແລະ ກິລາ ເຂົ້າຮ່ວມທັງໝົດ 69 ທ່ານ, ຍິງ 10 ທ່ານ.

ພາຍຫຼັງທ່ານປະທານໄດ້ມີຄໍາເຫັນຊີ້ນໍາ ແລະ ກ່າວເປີດກອງປະຊຸມແລ້ວ, ບັນດາຜູ່ແທນກໍໄດ້ຮັບຟັງການຜ່ານເອກະສານຕ່າງໆ ທີ່ສໍາຄັນ ເປັນຕົ້ນແມ່ນ:
– ບົດສະຫຼຸບ ສົກຮຽນ 2014-2015, ແຜນພັດທະນາການສຶກສາ ແລະ ກິລາ ປະຈໍາສົກຮຽນ 2015-2016 ຂອງກະຊວງສຶກສາທິການ ແລະ ກິລາ.
– ແຜນພັດທະນາການສຶກສາ ແລະ ກິລາ 5 ປີ ຄັ້ງທີ VIII ຂອງກະຊວງສຶກສາທິການ ແລະ ກິລາ.
– ບົດສະຫຼຸບ ສົກຮຽນ 2014-2015 ແລະ ແຜນພັດທະນາການສຶກສາ-ກິລາ ປະຈໍາສົກຮຽນ 2015-2016.
– ວິໄສທັດການພັດທະນາການສຶກສາ ແລະ ກິລາ ຮອດປີ 2030, ຍຸດທະສາດຮອດປີ 2025 ແລະ ແຜນພັດທະ ນາການສຶກສາ ແລະ ກິລາ 2016-2020 ຂອງແຂວງ.
ໃນວາລະກອງປະຊຸມຜູ້ແທນ ໄດ້ຄົ້ນຄວ້າ, ສົນທະນາ ປະກອບຄໍາເຫັນໃສ່ຄໍາຖາມເຈາະຈິ້ມຂອງທ່ານປະທານ ເພື່ອຊອກຊ່ອງທາງແກ້ໄຂບັນຫາຕ່າງໆ ຮ່ວມກັນທີ່ກ່ຽວຂ້ອງ ກັບການພັດທະນາການສຶກສາ ແລະ ກິລາ ສົກຮຽນ 2014-2015, ຈາກນັ້ນກໍໄດ້ມີມະຕິຕົກລົງເປັນເອກະພາບຮັບຮອງເອົາ

I. ວິໃສທັດການພັດທະນາການສຶກສາ ແລະ ກິລາ ຮອດປີ 2030
1.1 ສຸມໃສ່ເຮັດໃຫ້ການກໍ່ສ້າງຊັບພະຍາກອນມະນຸດມີຄຸນນະພາບ, ມີສີມື ແລະ ມີຄວາມຊໍານິຊໍານານ ເພື່ອສາມາດຕອບສະໜອງໄດ້ຕາມຄວາມຕ້ອງການຂອງຜູ້ປະກອບການໃນແຕ່ລະໄລຍະ ທັງດ້ານປະລິມານ ແລະ ຄຸນນະ ພາບ.
1.2 ການພັດທະນາການສຶກສາ ແລະ ກິລາຕ້ອງເປັນວຽກງານໃຈກາງ ຂອງການພັດທະນາຊັບພະຍາກອນມະນຸດໃຫ້ໄດ້ຮັບການຂະຫຍາຍຕົວຮອບດ້ານ, ມີຄຸນນະພາບດີຂື້ນ ແລະ ມີໂອກາດຮຽນຮູ້ຕະຫລອດຊີວິດ ເພື່ອພັດທະນາເສດຖະກິດ-ສັງຄົມ ໃຫ້ຍືນຍົງ.
1.3 ການພັດທະນາຊັບພະຍາກອນມະນຸດໃຫ້ໄດ້ຕາມ 3 ລັກສະນະ ແລະ 5 ຫຼັກມູນການສຶກສາ ພ້ອມທັງຮັບປະກັນໃຫ້ມີທັກສະ ແລະ ທັດສະນະຄະຕິດ້ານວິທະຍາສາດເຕັກນິກ, ເຕັກໂນໂລຊີ, ຂໍ້ມູນຂ່າວສານ, ການສື່ສານ ແລະ ພາສາຕ່າງປະເທດຢ່າງເອົາຈິງເອົາຈັງ.
II. ຮັບຮອງເອົາຍຸດທະສາດການພັດທະນາການສຶກສາ ແລະ ກິລາ ຮອດປີ 2025
2.1 ສົ່ງເສີມຄວາມສະເໜີພາບໃນການເຂົ້າເຖິງການສຶກສາທີ່ມີຄຸນນະພາບຢ່າງທົ່ວເຖິງ.
2.2 ນໍາໃຊ້ຫຼັກສູດສ່ວນກາງທຸກລະດັບ ແລະ ເພີ່ມການສະໜອງອຸປະກອນຮັບໃຊ້ການຮຽນ-ການສອນ ພ້ອມທັງປັບປຸງວິທີການສິດສອນ ເພື່ອໃຫ້ຜູ້ທີ່ຮຽນຈົບ ມີຄວາມຮູ້, ທັກສະ ແລະ ມີຄວາມເປັນມືອາຊີບ ໃນວຽກງານທີ່ຕົນເອງຮັບຜິດຊອບ.
2.3 ປັບປຸງ ແລະ ສ້າງຄວາມເຂັ້ມແຂງໃຫ້ແກ່ລະບົບການສຶກສາໃນຂັ້ນພື້ນຖານ ເພື່ອຮັບປະກັນປະລິມານ ແລະ ຄຸນນະພາບຂອງຜູ້ທີ່ຮຽນຈົບ ໃຫ້ສາມາດຕອບສະໜອງໄດ້ຕາມຄວາມຕ້ອງການຂອງຕະຫຼາດແຮງງານ ພ້ອມທັງເປັນການກະກຽມຜູ້ທີ່ຈະສືບຕໍ່ຮຽນໃນລະດັບສູງຂຶ້ນໄປໃຫ້ມີຄຸນນະພາບ.
2.4 ປັບປຸງ, ຍົກລະດັບຄູກ່ອນປະຈຳການ ແລະ ຄູປະຈຳການ ແມ່ນເປັນຍຸດທະສາດຫຼັກ ທີ່ຈະຕ້ອງເອົາໃຈໃສ່.
2.5 ສ້າງຄວາມເຂັ້ມແຂງໃຫ້ແກ່ວຽກງານ ອາຊີວະສຶກສາ ແລະ ຝຶກອົບຮົມວິຊາຊີບ ພ້ອມທັງສືບຕໍ່ຮ່ວມມືກັບພາກສ່ວນເອກະຊົນ ແລະ ຜູ້ປະກອບການຕ່າງໆ. ຍຸດທະສາດທີ່ສຳຄັນແມ່ນຕ້ອງເຮັດວຽກຮ່ວມກັບພາກສ່ວນທີ່ກ່ຽວຂ້ອງໃນການສ້າງລະບົບການຕິດຕາມກຳລັງແຮງງານ ເພື່ອໃຫ້ເຫັນໄດ້ເຖິງແນວໂນ້ມທາງດ້ານຄວາມຕ້ອງການຂອງຕະຫຼາດແຮງງານ. ການຈັດຕັ້ງປະຕິບັດຍຸດທະສາດດັ່ງກ່າວນີ້ ຮຽກຮ້ອງໃຫ້ແຕ່ລະເມືອງຕ້ອງເອົາໃຈໃສ່ຕິດ ຕາມ ຊອກໃຫ້ເຫັນຄວາມຕ້ອງການຕົວຈິງພາຍໃນເມືອງ ແລ້ວຈຶ່ງວາງແຜນກໍ່ສ້າງກຳລັງແຮງງານໃນເມືອງຕົນ. ພ້ອມດຽວກັນນັ້ນ ຍຸດທະສາດນີ້ຍັງຮຽກຮ້ອງໃຫ້ວຽກງານອາຊີວະສຶກສາ ແລະ ຝຶກອົບຮົມວິຊາຊີບ ຕ້ອງເຮັດວຽກຮ່ວມກັນຢ່າງໃກ້ຊິດ.
2.6 ຈັດຕັ້ງປະຕິບັດຍຸດທະສາດການສະໜອງທຶນການສຶກສາໃຫ້ແກ່ນັກຮຽນຈາກຄອບຄົວທຸກຍາກ, ຜູ້ທີ່ດ້ອຍໂອກາດ ເພື່ອໃຫ້ເຂົາເຈົ້າໄດ້ມີໂອກາດສືບຕໍ່ນຳໃຊ້ພອນສະຫວັນ ແລະ ຄວາມສາມາດທີ່ມີໃນການພັດທະນາຕົນເອງ ແລະ ສັງຄົມ.
2.7 ສ້າງນັກກິລາ, ຄູຝຶກ ແລະ ກຳມະການຕັດສິນໃຫ້ມີລະດັບສູງເພື່ອກາຍເປັນມືອາຊີບ ໂດຍມີການຊອກຫາ ແລະ ຄັດເລືອກເອົາເດັກຜູ້ທີ່ມີພອນສະຫວັນ ແລະ ມີຄວາມມັກຮັກໃນກິລາ ເພື່ອສົ່ງໄປຮຽນ ແລະ ຝຶກຊ້ອມໃນໂຮງ ຮຽນ ແລະ ສູນຝຶກຊ້ອມກິລາ. ນອກຈາກນັ້ນ ກໍ່ສະໜອງງົບປະມານ ແລະ ສິ່ງຈູງໃຈໃຫ້ແກ່ນັກກິລາຢ່າງເໝາະສົມ. ນັກກິລາ, ຄູຝຶກ ແລະ ກຳມະການຕັດສິນຕ້ອງມີຄຸນສົມບັດ ແລະ ປະຕິບັດວິໄນຢ່າງເຄັ່ງຄັດ.
III. ຮັບຮອງເອົາຜົນການຕີລາຄາການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ 2001-2015 ແລະ ແຕ່ປີ 2011-2015.
IV. ຮັບຮອງເອົາແຜນພັດທະນາການສຶກສາ ແລະ ກິລາ 5 ປີ ຄັ້ງທີ VIII ( 2016-2020 )
4.1 ພັດທະນາການສຶກສາ ແລະ ກິລາ ຖືເປັນວຽກງານບູລິມະສິດ ແລະ ເປັນໃຈກາງຂອງການພັດທະນາຊັບພະຍາ ກອນມະນຸດ ແລະ ຢຶດໝັ້ນໄປຕາມ 3 ລັກສະນະ ແລະ 5 ຫຼັກມູນຂອງການສຶກສາແຫ່ງຊາດ, ສືບຕໍ່ຜັນຂະຫຍາຍຜົນສຳເລັດຂອງການປະຕິຮູບລະບົບການສຶກສາແຫ່ງຊາດ ໃຫ້ເຂົ້າສູ່ລວງເລິກຢ່າງແຂງແຮງ, ສົ່ງເສີມການຮຽນຮູ້ຕະ ຫຼອດຊີວິດ.
4.2 ສືບຕໍ່ຈັດຕັ້ງປະຕິບັດຄາດໝາຍຕົວຊີ້ວັດ ຂອງເປົ້າໝາຍສະຫັດສະວັດດ້ານການພັດທະນາທີ່ບໍ່ທັນບັນລຸໃນປີ 2015 ໃຫ້ສໍາເລັດຢ່າງມີປະສິດທິພາບ ແລະ ປະສິດທິຜົນ ໂດຍສະເພາະແມ່ນການຈົບຊັ້ນປະຖົມສຶກສາພາກບັງ ຄັບ ແລະ ກ້າວເຂົ້າສູ່ການສຶກສາຊັ້ນມັດທະຍົມຕອນຕົ້ນພາກບັງຄັບ.
4.3 ໂຮງຮຽນສາຍສາມັນການສຶກສາທັງພາກລັດ ແລະ ເອກະຊົນ ຕ້ອງປະຕິບັດຕາມມາດຕະຖານປະກັນຄຸນນະພາບການສຶກສາແຫ່ງຊາດ.
4.4 ສະຖາບັນການສຶກສາສາຍອາຊີວະສຶກສາ ແລະ ການສຶກສາຊັ້ນສູງ ທັງພາກລັດ ແລະ ເອກະຊົນ ທຸກແຫ່ງຕ້ອງໄດ້ຜ່ານການປະເມີນຕາມມາດຕະຖານປະກັນຄຸນນະພາບການສຶກສາແຫ່ງຊາດ.
4.5 ສືບຕໍ່ຜັນຂະຫຍາຍຜົນສຳເລັດຂອງການປັບປຸງວຽກງານກິລາ-ກາຍະກຳໃຫ້ກ້ວາງຂວາງ ນຳເອົາກິລາ-ກາຍະກຳເຂົ້າໄປເຖິງທຸກເຂດ, ທຸກກຸ່ມຄົນ ໂດຍບໍ່ຈຳແນກເຜົ່າ, ເພດ, ອາຍຸ ແລະ ສາສະໜາ ເຮັດໃຫ້ວຽກງານສຶກສາ ແລະ ກິລາ ກໍຄືການພັດທະນາຊັບພະຍາກອນມະນຸດ ມີການຫັນປ່ຽນໂດຍການບຸກທະລຸສູ່ຄຸນນະພາບທີ່ສູງຂຶ້ນ ແລະ ສາມາດເຊື່ອມໂຍງເຂົ້າກັບລະດັບການສຶກສາ ແລະ ກິລາຂອງພາກພຶ້ນ ແລະ ສາກົນ ແນໃສ່ສ້າງຄົນລາວໃຫ້ມີຄຸນສົມບັດ ສິນທຳປະຕິວັດ, ມີຄວາມຮູ້, ມີຄວາມສາມາດ, ມີສຸຂະພາບເຂັ້ມແຂງທາງດ້ານຮ່າງກາຍ, ມີຄວາມສີວິໄລທາງດ້ານຈິດໃຈ ແລະ ສາມາດເຊື່ອມໂຍງກັບປະຊາກອນອາຊຽນ.
V. ຮັບຮອງເອົາແຜນພັດທະນາການສຶກສາ ແລະ ກິລາ ທີ່ເປັນບູລິມະສິດ ສໍາລັບສົກຮຽນ 2015-2016 ມີ:
5.1 ຂະຫຍາຍການສຶກສາກ່ອນໄວຮຽນໃຫ້ກ້ວາງຂວາງ ໂດຍສະເພາະແມ່ນຂະຫຍາຍໂຮງຮຽນອະນຸບານ ແລະ ຫ້ອງ ກຽມປະຖົມ ໃນໂຮງຮຽນປະຖົມສຶກສາ.
5.2 ປັບປຸງ ແລະ ຍົກຄຸນນະພາບການສຶກສາທຸກລະດັບ ໃຫ້ບັນລຸມາດຕະຖານຂອງປະເທດ.
5.3 ຮັບປະກັນໃຫ້ສະຖານການສຶກສາທຸກລະດັບໄດ້ຈັດຕັ້ງປະຕິບັດການຮຽນ-ການສອນພາສາອັງກິດ ໂດຍສະເພາະຢູ່ໂຮງຮຽນສາມັນສຶກສາໃຫ້ເອົາພາສາອັງກິດເປັນວິຊາບັງຄັບ ໂດຍເລີ່ມແຕ່ຊັ້ນປະຖົມສຶກສາປີທີ 3( ປ.3 ).
5.4 ສືບຕໍ່ປັບປຸງກົງຈັກບໍລິຫານ ແລະ ຄຸ້ມຄອງການສຶກສາ ໃຫ້ມີຄຸນນະພາບ.
5.5 ຜັນຂະຫຍາຍແຜນຍຸດທະສາດການພັດທະນາກິລາ-ກາຍະກໍາ ໃຫ້ປະກົດຜົນເປັນຈິງ ໂດຍສະເພາະການພັດທະນາກິລາໃນໂຮງຮຽນ ແລະ ການຝຶກແອບກິລາປະເພດຕ່າງໆ.
5.6 ຮັບຮອງເອົາວຽກງານຈຸດສຸມ ແລະ ມາດຕະການຈັດຕັ້ງປະຕິບັດ ດັ່ງນີ້:
5.6.1 ໃຫ້ຂະແໜງອະນຸບານ ແລະ ປະຖົມສຶກສາ ສົມທົບຫ້ອງການສຶກສາທິການ ແລະ ກິລາເມືອງ:
1) ສ້າງແຜນຂະຫຍາຍໂຮງຮຽນອະນຸບານ ແລະ ຫ້ອງກຽມປະຖົມ ໂດຍການມີສ່ວນຮ່ວມຂອງຊຸມຊົນ ແລະ ເອກະຊົນ.
2) ສໍາຫຼວດຄວາມພ້ອມຂອງໂຮງຮຽນປະຖົມສຶກສາທົ່ວແຂວງ ເພື່ອເປັນຂໍ້ມູນໃຫ້ການປະຕິບັດການສອນພາສາອັງກິດເປັນວິຊາບັງຄັບຢູ່ຂັ້ນ ປ.3
5.6.2 ໃຫ້ຂະແໜງມັດທະຍົມ ສົມທົບພາກສ່ວນທີ່ກ່ຽວຂ້ອງ ປັບປຸງສັບຊ້ອນຄູໃຫ້ຖືກຕາມວິຊາສະເພາະ ແລະ ວຸດທິບັດ; ຮັບປະກັນອັດຕາສ່ວນນັກຮຽນຕໍ່ຄູ, ຕໍ່ຫ້ອງ ລວມທັງຊັ້ນມັດທະຍົມຕອນຕົ້ນ ແລະ ຕອນປາຍ ເຮັດໃຫ້ການຮຽນ-ການສອນ ມີຄຸນນະພາບດີຂຶ້ນ.
5.6.3 ມອບໃຫ້ຂະແໜງ ການສຶກສານອກໂຮງຮຽນ ສົມທົບຫ້ອງການສຶກສາທິການ ແລະ ກິລາເມືອງ, ພາກ ສ່ວນກ່ຽວຂ້ອງ ໃນການຈັດຕັ້ງບໍາລຸງຊັ້ນມັດທະຍົມຕອນຕົ້ນ ສໍາລັບປະຊາຊົນ ແລະ ປະກາດຈົບຊັ້ນມັດ ທະຍົມບໍາລຸງໃຫ້ໄດ້ຕາມລໍາດັບຄື: 1. ເມືອງແບງ 2. ເມືອງຫຼາ.
5.6.4 ສືບຕໍ່ຈັດການແຂ່ງຂັນກິລາປະເພດຕ່າງໆຢູ່ຂັ້ນແຂວງ, ເມືອງ ແລະ ຂັ້ນໂຮງຮຽນ ໂດຍການສົມທົບກັບສະພັນກິລາແຂວງ ເພື່ອເປັນເງື່ອນໄຂໃຫ້ແກ່ການຄັດເລືອກນັກກິລາທີ່ມີພອນສະຫວັນ, ມີຄວາມສາມາດສະເພາະຕົວ ສ້າງເປັນນັກກິລາຂອງແຂວງ ແລະ ຂອງໂຮງຮຽນ.
5.6.5 ໃຫ້ແຕ່ລະພາກສ່ວນເອົາໃຈໃສ່ຄຸ້ມຄອງ, ຈັດຕັ້ງປະຕິບັດໂຄງການພາຍໃນ, ໂຄງການຊ່ວຍເຫຼືອຈາກຕ່າງ ປະເທດ ແລະ ອົງການຈັດຕັ້ງສາກົນໃຫ້ມີຄຸນນະພາບສູງ.
ເພື່ອໃຫ້ມະຕິກອງປະຊຸມໄດ້ຮັບການຈັດຕັ້ງປະຕິບັດ ທ່ານປະທານໄດ້ຮຽກຮ້ອງໃຫ້ຜູ້ບໍລິຫານການສຶກສາ ແລະ ກິລາ, ອໍານາດການປົກຄອງທ້ອງຖິ່ນ, ພາກສ່ວນທີ່ກ່ຽວຂ້ອງ ທຸກຂັ້ນ ຈົ່ງພ້ອມກັນນໍາເອົາເນື້ອໃນຈິດໃຈມະຕິກອງປະຊຸມ ໄປປະຕິບັດຜັນຂະຫຍາຍເປັນແຜນການລະອຽດ ໃຫ້ແທດເໝາະ ແລະ ສອດຄ່ອງກັບສະພາບຕົວຈິງ ໃນແຕ່ລະຂົງເຂດຂອງຕົນຮັບຜິດຊອບໃຫ້ປາກົດຜົນເປັນຈີງ.

ຂ່າວແລະພາບ: ສກຂ ອຸດົມໄຊ