ຂປລ. ໂດຍຕອບສະໜອງ ຕາມຄຳເຊີນຂອງ ທ່ານນາງ ຫງວຽນ ທິ ຢວານ, ຮອງປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ທ່ານ ບຸນຍັງ ວໍລະຈິດ ຮອງປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະຜູ້ແທນຂັ້ນສູງ ໄດ້ເດີນທາງໄປຢ້ຽມຢາມ ຢ່າງເປັນທາງການ ຢູ່ ສາທາລະນະລັດ ສັງຄົມນິຍົມ ຫວຽດນາມ ແຕ່ວັນທີ 6-8 ກໍລະກົດ 2015. ເພື່ອສຶບຕໍ່ເພີ່ມທະວີ ຮັດແໜ້ນສາຍພົວ ພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງທີ່ມີມູນເຊື້ອ ມາແຕ່ບູຮານນະການ ໃຫ້ນັບມື້ມີຄວາມແໜ້ນແຟ້ນ ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.
ພິທີ ສົ່ງຮອງປະທານປະເທດ ພ້ອມຄະນະ ໄດ້ຈັດຂຶ້ນໃນຕອນບ່າຍຂອງວັນທີ 6 ກໍລະກົດ 2015 ຢູ່ສະໜາມບິນສາກົນວັດໄຕ ນະຄອນຫລວງວຽງຈັນ ໂດຍການເຂົ້າຮ່ວມ ຂອງທ່ານ ເຈີ ຍີ່ວ່າງ ຮອງຫົວໜ້າ ຫ້ອງວ່າການປະທານປະເທດ ພ້ອມຄະນະ ແລະ ທ່ານ ຮ່ວາງ ຊວນ ຫາຍ (Hoay Xuan Hai) ອຸປະທູດ ສາທາລະນະລັດ ສັງຄົມນິຍົມ ຫວຽດນາມ ປະຈຳ ສປປ ລາວ ພ້ອມຄະນະ.
ແຫລ່ງຂ່າວ: ສຳນັກຂ່າວສານປະເທດລາວ