ພະ​ແນກ​ຊັບພະຍາກອນ​ທຳມະ​ຊາດ ແລະ ສິ່ງແວດລ້ອມ ນະຄອນ​ຫຼວງ​ວຽງ​ຈັນ ນວ ຈະ​ເລັ່ງແກ້​ໄຂ​ບັນຫາ​ການ​ລັກລອບ​ປອມແປງ​ເອກະສານ ແລະ ການ​ອອກໃບ​ຕາດິນ​ປອມ​ຂອງ​ບັນດາ 7 ຕົວເມືອງ​ໃນ ນວ ຄື: ເມືອງ​ສີ​ສັດຕະນາກ ສີ​ໂຄດ​ຕະບອງ ນາ​ຊາຍທອງ ຈັນທະ​ບູ​ລີ ໄຊ​ທານີ ແລະ ເມືອງ​ຫາດ​ຊາຍ​ຟອງ ໂດຍ​ໄວ ພາຍຫຼັງ​ເມື່ອ​ພົບ​ເຫັນ​ການ​ປອມແປງ​ເອກະສານ​ການ​ອອກ​ໃບ​ຕາດິນ​ປອມ​ທັງ 36 ໃບຂອງ​ບັນດາເມືອງ​ດັ່ງກ່າວ​ໃນ​ໄລຍະ​ຜ່ານ​ມາ ແລະ ສ້າງ​ຄວາມ​ເສຍ​ຫາຍ​ຢ່າງຫຼວງຫຼາຍ​ຕໍ່​ປະຊາຊົນ ແລະ ພາກ​ລັດ.

ວັນ​ທີ 16 ມິຖຸນາ 2015 ທ່ານ ບຸນ​ໂຮມ ເຮືອງ​ສະ​ຫວັດ ຫົວໜ້າພະ​ແນກ​ຊັບພະຍາກອນ ທຳ​ມະຊາດ ແລະ ສິ່ງແວດລ້ອມ ນວ ໄດ້​ໃຫ້​ສຳພາດ​ວ່າ: ໃນ​ທ້າຍເດືອນ​ກຸມພາ​ທີ່​ຜ່ານ​ມາ​ນີ້ ໄດ້​ມີປາກົດການ​ກ່ຽວ​ກັບ​ບັນຫາ​ການປອມ​ແປງ​ໃບ​ຕາດິນ​ໃນ ນວ ເຊິ່ງມີ​ຄວາມ​ຮຸນ​ແຮງ​ຫຼາຍ​ພໍ​ສົມຄວນ​ຂອງ​ການ​ປອມ​ແປງ​ໃບ​ຕາດິນ​ໃນ 7 ຕົວ​ເມືອງ ສ່ວນ​ເມືອງທີ່​ບໍ່​ມີ​ການ​ປອມ​ແປງ​ຕາດິນ​ມີພຽງ​ເມືອງ​ປາກ​ງື່ມ ແລະ ເມືອງສັງ​ທອງ ເທົ່າ​ນັ້ນ ມີ​ຜູ້​ເສຍ​ຫາຍທັງ​ໝົດ 17 ຄົນ ລວມ​ມູນ​ຄ່າ​ເສຍຫາຍ​ເຖິງ 3 ຕື້​ກວ່າ​ກີບ ຕໍ່​ບັນຫາປາກົດການ​ຫຍໍ້ທໍ້​ດັ່ງກ່າວ​ນີ້​ ທາງການ​ນຳ ນວ ໂດຍ​ສະເພາະກໍ່ແມ່ນ​ທ່ານ​ເຈົ້າ​ຄອງ ນວ ກໍ່​ໄດ້ເອົາໃຈໃສ່​ຊີ້​ນຳ-ນຳພາ ແລະ ຫາ​ວິທີ​ການ​ປັບປຸງ ແກ້​ໄຂ​ ສະກັດກັ້ນ ​ເພື່ອ​ບໍ່​ໃຫ້​ບັນຫາ​ການ​ລັກລອບ​ປອມ​ແປງ​ເອກະສານ​ທາງລັດ​ຖະ​ການ​ຕ່າງໆ ແຜ່​ລາມ​ໄປຕື່ມ​ອີກ.

ດັ່ງນັ້ນ ຈຶ່ງ​ສະເໜີ ແລະ ຮຽກຮ້ອງ​ໃຫ້​ບັນດາ​ປະຊາຊົນ ຫຼື ຜູ້​ຊື້-ຂາຍ​ທີ່​ດິນ​ຕ່າງໆ ກ່ອນ​ຈະ​ມີ​ການຊວດ​ຈຳ​ທີ່​ດິນ​ຂອງ​ທ່ານ ​ແມ່ນຕ້ອງ​ໃຫ້​ໄດ້​ມີ​ການ​ຜ່ານ​ຂະ​ບວນການ​ຂັ້ນ​ຕອນ​ທີ່​ຖືກຕ້ອງ​ຕາມ​ລະບຽບ​ ການ ​ທີ່​ທາງ​ພະ​ແນກ​ຊັບ​ພະຍາ​ທຳ​ມະ​ຊາດ ແລະ ສິ່ງ​ແວດລ້ອມ ນວ ວາງ​ອອກ​ຢ່າງ​ຄັກແນ່ ເພື່ອ​ຈະ​ບໍ່​ຕົກ​ເປັນ​ຜູ້​ເສຍ​ຫາຍ​ຄືດັ່ງກ່າວ.

ແຫລ່ງຂ່າວ: ວຽງຈັນໃໝ່