spot_img
Homeມຸມຂ່າວ AECສປປ ລາວ ປະທານອາຊຽນ ຈະຈັດກອງປະຊຸມສຸດຍອດອາຊຽນ 2 ຄັ້ງ ຄຽງຄູ່ກັນ

ສປປ ລາວ ປະທານອາຊຽນ ຈະຈັດກອງປະຊຸມສຸດຍອດອາຊຽນ 2 ຄັ້ງ ຄຽງຄູ່ກັນ

Published on

20150429125652

ທ່ານ ອາ​ລຸນ​ແກ້ວ ກິດ​ຕິ​ຄຸນ ລັດຖະມົນຕີ​ຊ່ວຍ​ວ່າການ​ກະຊວງການ​ຕ່າງປະເທດ ທັງ​ເປັນ​ຫົວໜ້າ​ເຈົ້າ​ໜ້າທີ່​ອາວຸໂສ​ອາ​ຊຽນຂອງ ​ສປປ ລາວ ໄດ້​ໃຫ້​ສຳພາດໃນ​ວັນ​ທີ 28 ເມສາ 2015 ກ່ຽວກັບ​ຜົນ​ຂອງ​ກອງ​ປະຊຸມ​ສຸດ​ຍອດອາ​ຊຽນ ​ຄັ້ງ​ທີ 26 ເຊິ່ງ​ໄດ້​ຈັດ​ຂຶ້ນໃນ​ວັນ​ທີ 27 ເມສາ 2015 ທີ່ກົວລາ​ລຳ​ເປີ ແລະ ລັງກາ​ວີ ປະເທດມາ​ເລ​ເຊຍ.

ທ່ານ​ລັດຖະມົນຕີ​ຊ່ວຍ ໄດ້ກ່າວ​ວ່າ: ກອງ​ປະຊຸມ​ສຸດ​ຍອດ​ອາຊຽນ ​ຄັ້ງ​ທີ 26 ໄດ້​ມີ​ຜົນສຳເລັດອັນ​ຈົບງາມ ເຊິ່ງ​ບັນດາ​ຜູ້ນຳ​ອາຊຽນ ໄດ້​ປຶກສາ​ຫາລື​ບັນຫາ​ການເມືອງ-ຄວາມ​ໝັ້ນຄົງ ເສດຖະກິດ ແລະ ວັດທະນະທຳ-ສັງຄົມ ແລະ ໄດ້​ຮັບຮອງ​ເອົາ​ເອກະສານ​ທີ່​ສຳຄັນ​ຈຳນວນ​ໜຶ່ງ ໃນ​ນີ້​ລວມ​ທັງ​ຂໍ້ລິ​ເລີ່ມ​ຂອງ ​ສປປ ລາວ ທ່ານ​ລັດຖະມົນຕີ​ຊ່ວຍ​ວ່າການ ໄດ້​ກ່າວຕື່ມ​ວ່າ: ກອງ​ປະຊຸມລັດຖະມົນຕີຕ່າງປະເທດ​ອາ​ຊຽນ ຈັດ​ຂຶ້ນ​ໃນວັນ​ທີ 26 ເມສາ 2015 ໄດ້​ປຶກສາ​ຫາລື​ຫຼາຍ​ບັນຫາ ເຊິ່ງ​ລວມທັງ “ການ​ປັບປຸງ​ບັນດາ​ກອງ​ປະຊຸມ​ອາ​ຊຽນ” ພາຍ​ໃຕ້​ຫົວຂໍ້​ດັ່ງກ່າວ ທ່ານ ທອງ​ລຸນ ສີ​ສຸ​ລິດ ຮອງ​ນາຍົກລັດຖະມົນຕີ ລັດ​ຖະມົນຕີ​ວ່າການ​ກະຊວງ​ການ​ຕ່າງປະເທດ ແຫ່ງ ​ສປປ ລາວ ໄດ້ສະເໜີຈັດ​ກອງ​ປະຊຸມ​ສຸດ​ຍອດອາ​ຊຽນ 2 ຄັ້ງຄຽງ​ຄູ່​ກັນ​ໃນເດືອນ​ພະຈິກ 2016 ໃນ​ໄລຍະ​ທີ່ ​ສປປ ລາວ ເປັນ​ປະທານ​ອາ​ຊຽນຄື: ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 28 ຈະ​ເນັ້ນ​ໃສ່​ປຶກສາ​ຫາລືບັນດາ​ບັນຫາ​ທີ່​ກ່ຽວຂ້ອງ​ກັບ​ອາຊຽນ ສ່ວນ​ກອງ​ປະຊຸມ​ສຸດ​ຍອດອາ​ຊຽນ​ຄັ້ງ​ທີ 29 ຈະ​ປຶກສາ​ຫາລືກ່ຽວ​ກັບ​ການ​ພົວພັນ​ພາຍ​ນອກ ແລກປ່ຽນ​ທັດສະນະ​ກ່ຽວ​ກັບ​ບັນຫາ​ພາກ​ພື້ນ ແລະ ສາກົນ ແລະ ບັນຫາ​ອື່ນໆ.

ໃນ​ກອງ​ປະຊຸມ​ລັດຖະມົນຕີຕ່າງປະເທດ​ອາ​ຊຽນ​ດັ່ງກ່າວ ບັນດາ​ລັດຖະມົນຕີ​ຕ່າງປະເທດ​ອາຊຽນ ໄດ້​ເຫັນ​ດີ​ຢ່າງ​ເປັນ​ເອກະສັນຕໍ່​ຂໍ້​ສະເໜີ​ຂອງ ​ສປປ ລາວ ບົນພື້ນຖານ​ຜົນ​ຂອງ​ກອງ​ປະຊຸມ ລັດຖະ​ມົນຕີ​ຕ່າງປະເທດ​ອາ​ຊຽນ ທ່ານ ທອງ​ສິງ ທຳ​ມະ​ວົງ ນາຍົກລັດຖະມົນຕີ ແຫ່ງ ​ສປປ ລາວ ໃນ​ນາມ​ປະທານ​ອາ​ຊຽນ ໃນ​ປີ 2016 ໄດ້​ແຈ້ງ​ໃຫ້​ກອງ​ປະຊຸມ​ສຸດຍອດ​ອາ​ຊຽນ ຄັ້ງ​ທີ 26 ຊາບ​ວ່າ: ​ສປປ ລາວ ຈະ​ຈັດ​ກອງ​ປະຊຸມສຸດ​ຍອດ​ອາ​ຊຽນ ​ຄັ້ງ​ທີ 28 ຄຽງຄູ່​ກັບ​ກອງ​ປະຊຸມ​ສຸດ​ຍອດ​ອາຊຽນ ​ຄັ້ງ​ທີ 29 ໃນ​ເດືອນພະຈິກ 2016 ບັນດາ​ຜູ້ນຳ​ອາ​ຊຽນ ໄດ້​ສະໜັບ​ສະ​ໜູນ​ການ​ຈັດ 2 ກອງ​ປະຊຸມ​ສຸດ​ຍອດ​ອາ​ຊຽນ​ແບບ​ຄຽງຄູ່​ກັນ​ດັ່ງກ່າວຂອງ ​ສປປ ລາວ.

 

ແຫລ່ງ​ຂ່າວ: ວຽງ​ຈັນ​ໃໝ່

ບົດຄວາມຫຼ້າສຸດ

ປິດລົງຢ່າງເປັນທາງການ ກອງປະຊຸມສະມັດຊາໃຫຍ່ ໄອປາ ຄັ້ງທີ 45

ກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45 ພາຍໃຕ້ຄຳຂວັນ: “ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ” ໄດ້ອັດລົງດ້ວຍຜົນສຳເລັດຢ່າງຈົບງາມ ໃນຕອນບ່າຍ ວັນທີ...

ພິທີເຊັນສັນຍາໂຄງການປັບປຸງເສັ້ນທາງເທດສະບານເມືອງວັງວຽງ

ໂຄງການປັບປຸງເສັ້ນທາງພາຍໃນເທດສະບານຄືນໃຫມ່ເມືອງວັງວຽງ ແຂວງວຽງຈັນ ແມ່ນໂຄງການຫນຶ່ງໃນຈໍານວນ 4 ໂຄງການຍ່ອຍ ທີ່ຈັດຕັ້ງປະຕິບັດຢູ່ແຂວງວຽງຈັນ ພາຍໃຕ້ການສະຫນັບສະຫນູນຈາກໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວ ອະນຸພາກພື້ນແມ່ນໍ້າຂອງ ໄລຍະ 2. ໃນວັນທີ 17 ຕຸລາ 2024 ທີ່ເມືອງວັງວຽງ,...

ອຸດົມໄຊລົງກວດ ອາຫານແຊ່ແຂງທີ່ໝົດອາຍຸ ແລະ ພືດ-ຜັກ ຫ້າມນໍາເຂົ້າຈາກຕ່າງປະເທດ

ວັນທີ 16 ຕຸລາ 2024 ພະແນກອຸດສາຫະກໍາ ແລະ ການຄ້ານໍາພາໂດຍ ທ່ານ ສອນເພັດ ບຸນທະຈິດຫົວໜ້າຂະແໜງການຄ້າພາຍໃນ ພະແນກອຸດສາຫະກໍາ ແລະ ການຄ້າ ສົມທົບກັບພະແນກກະສິກໍາ...

ການພົບປະ ລະຫວ່າງ ສະພາແຫ່ງຊາດລາວ-ລັດຖະສະພາໄທ

ໃນວັນທີ 21 ຕຸລາ 2024 ນີ້, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ວັນມູຫະມັດນໍ...