ເພື່ອເປັນການປະຕິບັດຕາມແນວທາງຂອງພັກ ແລະ ລັດຖະບານ ໃນການປະຕິບັດນະໂຍບາຍໃຫ້ແກ່ພະ ນັກງານບຳນານ ແລະ ນັກຮົບແຂ່ງຂັນທີ່ມີຄຸນງາມ ຄວາມດີຕໍ່ພາລະກິດປະຕິວັດ ແລະ ປົກປັກຮັກສາ-ສ້າງສາພັດທະນາປະເທດຊາດ. ດັ່ງນັ້ນ, ໃນຕອນແລງວັນທີ 3 ເມສາຜ່ານມາ ທີ່ຫ້ອງວ່າການລັດຖະບານ(ຫລບ) ໄດ້ມີພິທີມອບເງິນນະໂຍບາຍໃຫ້ແກ່ ທ່ານນາງ ກອງສີ ແກ້ວກິນນາລີ ພະນັກງານບຳນານອາວຸໂສ ແລະ ທ່ານ ພັນໂທ ບົວສອນ ຂັນມະນີ ທີ່ໄດ້ຮັບນາມມະຍົດ ນັກຮົບແຂ່ງຂັນ ໂດຍເປັນກຽດມອບ ທ່ານ ສອນໄຊ ສີພັນດອນ ລັດຖະມົນຕີ, ຫົວໜ້າຫ້ອງວ່າການລັດຖະບານ.
ໃນການມອບເງິນນະໂຍບາຍຄັ້ງນີ້ ແມ່ນໄດ້ປະຕິບັດຕາມດຳລັດ 343 ຂອງນາຍົກລັດຖະມົນຕີ ສຳລັບພະນັກ ງານປະຕິວັດອາວຸໂສ ທີ່ເຂົ້າການປະຕິວັດ ນັບແຕ່ປີ 1954 ຄືນຫຼັງ. ໃນນັ້ນ, ທ່ານນາງ ກອງສີ ແກ້ວກິນນາລີ ແມ່ນໄດ້ເລີ່ມເຂົ້າການປະຕິວັດໃນເດືອນຕຸລາ 1954 ແລະ ຕົກລົງຮັບບຳນານ ໃນເດືອນຕຸລາ 1987, ທ່ານ ພັນໂທ ບົວສອນ ຂັນມະນີ ໄດ້ເລີ່ມເຂົ້າຮ່ວມການປະຕິວັດໃນປີ 1950 ແລະ ຮັບເບັ້ຍບຳນານ ໃນເດືອນທັນວາ 1991 ເຊິ່ງທັງສອງທ່ານ ຕ່າງກໍ່ໄດ້ປະກອບສ່ວນຢ່າງຕັ້ງໜ້າເຂົ້າໃນພາລະກິດຕໍ່ສູ້ກູ້ຊາດ ຈົນປະເທດຊາດໄດ້ຮັບການປົດປ່ອຍ ກໍ່ຍັງສືບຕໍ່ປະຕິບັດໜ້າທີ່ຂອງຕົນໃນ
ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມການມອບໝາຍໜ້າທີ່ວຽກງານຈາກ ພັກ-ລັດ. ດັ່ງນັ້ນ, ພັກ ແລະ ລັດຖະບານ ຈຶ່ງໄດ້ມອບເງິນນະໂຍບາຍ ສົກປີ 2014-2015 ໃຫ້ແກ່ ທ່ານນາງ ກອງສີ ແກ້ວກິນນາລີ ຈຳນວນ 99 ລ້ານກວ່າກີບ ແລະ ຈຳນວນ 10 ລ້ານກີບ ໃຫ້ແກ່ ທ່ານ ພັນໂທ ບົວສອນ ຂັນມະນີ ທີ່ໄດ້ຮັບນາມມະຍົດນັກຮົບແຂ່ງຂັນ ສຳລັບສົກປີ 2014-2015. ໃນໂອກາດດັ່ງກ່າວ ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍ ຕໍ່ບັນດາໝາກຜົນ ແລະ ຜົນງານຂອງທັງສອງທ່ານ ທີ່ໄດ້ປະກອບສ່ວນຕໍ່ການປະຕິວັດໃນເມື່ອກ່ອນ ແລະ ການປະຕິບັດສອງໜ້າທີ່ຍຸດທະສາດ ພາຍຫຼັງປະເທດຊາດໄດ້ຮັບການປົດປ່ອຍ. ອັນເປັນການເອກອ້າງ ແລະ ສະແດງເຖິງກຽດສັກສີຂອງກົມກອງ ທີ່ໄດ້ມີພະນັກງານດີເດັ່ນ-ຫ້າວຫັນ. ພ້ອມທັງ ເຊື່ອໝັ້ນວ່າ ບັນດາທ່ານ ທີ່ໄດ້ພັກ ຜ່ອນຮັບເບັ້ຍບຳນານໄປນັ້ນ ຈະສືບຕໍ່ເປັນກຳລັງແຮງສຶກສາອົບຮົມພະນັກງານ, ລູກຫຼານ ປະຊາຊົນ ທີ່ຕົນສັງກັດຢູ່ຮາກຖານທ້ອງຖິ່ນນັ້ນ ເຮັດໃຫ້ເຂົາເຈົ້າກາຍເປັນຮຸ່ນສືບທອດ ແລະ ເປັນກຳລັງແຮງອັນສຳຄັນ ໃນການປະກອບສ່ວນເຂົ້າໃນພາລະກິດຂອງຊາດໃນໄລຍະໃໝ່.
ແຫລ່ງຂ່າວ: ລາວພັດທະນາ