ພະແນກແຮງງານ ແລະ ສະຫວັດດີການສັງຄົມ (ຮສສ) ແຂວງອັດຕະປື ໄດ້ຈັດກອງປະຊຸມສະຫລຸບວຽກງານຈຸດບໍລິການຈັດຫາງານພາຍໃນ ແລະ ແກ້ໄຂບັນຫາຂາດແຮງງານຂອງແຂວງອັດຕະປື 6 ເດືອນຕົ້ນປີ 2026 ແລະ ແຜນສືບແກ້ໄຂບັນຫາການຂາດແຄນແຮງງານ ແລະ ຄວາມຕ້ອງການແຮງງານ ໃນວັນທີ 20 ສິງຫາ 2026 ທີ່ ແຂວງອັດຕະປື, ໂດຍການເຂົ້າຮ່ວມຂອງທ່ານ ນາງ ພອນມະນີ ຂຽນໄຊຍະວົງ ກຳມະການພັກແຂວງ ຫົວໜ້າພະແນກ ຮສສ ແຂວງ, ມີບັນດາພະແນກການອ້ອມຂ້າງແຂວງ, ຫົວໜ້າຫ້ອງການ ຮສສ 5 ເມືອງ, ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານນາງ ພອນມະນີ ຂຽນໄຊຍະວົງ ກ່າວວ່າ: ເພື່ອເປັນການເພີ່ມຫຼາຍທາງເລືອກ ໃຫ້ແກ່ຜູ້ໃຊ້ແຮງງານໃນການຊອກຫາບຸກຄະລາກອນທີ່ເໝາະສົມທີ່ສຸດສໍາລັບຕົນເອງ ເພື່ອແນໃສ່ເຮັດໃຫ້ຫົວໜ່ວຍ ແຮງງານ ແລະ ຜູ້ອອກແຮງງານທີ່ວ່າງງານໄດ້ມີວຽກເຮັດງານທຳ, ມີລາຍໄດ້ ແລະ ມີຊີວິດການເປັນຢູ່ທີ່ດີຂຶ້ນ, ປະກອບສ່ວນແກ້ໄຂປະກົດການຫຍໍ້ທໍ້ໃນສັງຄົມ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງ ກໍຄືຂອງປະເທດຊາດ.
ທ່ານ ສຸກສະເໜີ ແສນກັນຍາ ຮອງຫົວໜ້າ ພະແນກ ຮສສ ແຂວງ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານຂອງຈຸດບໍລິການຈັດຫາງານພາຍໃນ ແລະ ການແກ້ໄຂບັນຫາຂາດແຮງງານຂອງແຂວງອັດຕະປື ໃນ 6 ເດືອນຕົ້ນປີ 2026 ໂດຍຍົກໃຫ້ເຫັນວ່າ:
ແຂວງອັດຕະປືມີພົນລະເມືອງທັງໝົດ 169,008 ຄົນ, ຍິງ 83,058 ຄົນ, ມີພົນລະເມືອງ ໃນເກນອາຍຸອອກແຮງງານ 15-60 ປີ ມີ 101,307 ຄົນ, ຍິງ 49,753 ຄົນ. ອັດຕາມີສ່ວນຮ່ວມຂອງກໍາລັງແຮງງານ ກວມເອົາ 46.81% ຫຼື ເທົ່າກັບ 47,420 ຄົນ; ໃນນີ້ ຜູ້ມີວຽກເຮັດງານທໍາ 46,282 ຄົນ.
ການອອກແຮງງານ, ກໍາລັງແຮງງານສ່ວນໃຫຍ່ ເຮັດວຽກຢູ່ໃນ 3 ຂົງເຂດຄື:
- ຂົງເຂດກະສິກຳ 26,315 ຄົນ ກວມເອົາ 56.8%
- ຂົງເຂດ ອຸດສາຫະກຳ 15,242 ຄົນ ກວມເອົາ 32.9%
- ຂົງເຂດບໍລິການ 4,725 ຄົນ ກວມເອົາ 10.2%
ມີອັດຕາວ່າງງານ ຂອງແຮງງານ 2.4% ເທົ່າກັບ 1,138 ຄົນ. ທົ່ວແຂວງມີຫົວໜ່ວຍວິສາຫະກິດທັງໝົດ 2,368 ຫົວໜ່ວຍ; ໃນນັ້ນ ຂັ້ນແຂວງຄຸ້ມຄອງມີ 401 ຫົວໜ່ວຍ ແລະ ຂັ້ນເມືອງ 1,976 ຫົວໜ່ວຍ.
ຈຸດບໍລິການຈັດຫາງານແມ່ນ ວຽກງານໜຶ່ງຂອງຂະແໜງແຮງງານ ເຄື່ອນໄຫວໃນການໃຫ້ບໍລິການແກ່ຜູ້ໃຊ້ແຮງງານ, ນາຍຈ້າງ ແລະ ຜູ້ອອກແຮງງານ, ຜູ້ຊອກວຽກ.
ຜ່ານມາການເຄື່ອນໄຫວວຽກງານ ຈັດຕັ້ງປະຕິບັດໄດ້ເກັບກຳຂໍ້ມູນກ່ຽວກັບ ຜູ້ປະລະການຮຽນ ໃນທົ່ວແຂວງ ຊັ້ນມັດທະຍົມຕອນຕົ້ນ-ມັດທະຍົມຕອນປາຍ ນັບແຕ່ປີ 2022-2026 ມີຈຳນວນທັງໝົດ 5,237 ຄົນ, ຍິງ 2,634 ຄົນ.
ກອງປະຊຸມບັນດາຜູ້ເຂົ້າຮ່ວມໄດ້ຜັດປ່ຽນກັນປະກອບຄໍາເຫັນ ເພື່ອເຮັດໃຫ້ເນື້ອໃນບົດສະຫຼຸບມີ ຄວາມສົມບູນ ແລະ ຖືກຕ້ອງກັບຄວາມເປັນຈິງ ແລະ ເພື່ອເຮັດໃຫ້ທິດທາງແຜນການໃນ 6 ເດືອນທ້າຍປີ 2026 ໃນການຈັດຕັ້ງປະຕິບັດວຽກງານຈຸດບໍລິການຈັດຫາງານພາຍໃນໄດ້ເຂົ້າເຖິງແຮງງານ ແລະ ແກ້ໄຂບັນຫາຂາດແຮງງານຂອງແຂວງອັດຕະປື.
ແຫຼ່ງທີ່ມາ: ຂ່າວສານອອນລາຍ ອັດຕະປື