ຄະນະຜູ້ແທນເຈົ້າຄອງນະຄອນຫຼວງອາຊຽນ ໄດ້ເຂົ້າຮ່ວມພິທີເປີດສັນຍາລັກເຄື່ອງດົນຕີອາຊຽນ ແລະ ປູກຕົ້ນໄມ້ທີ່ ສວນປະຕູໄຊພາກຂະຫຍາຍ ໃນວັນທີ 19 ກັນຍາ 2024, ໂດຍການເຂົ້າຮ່ວມຂອງ ທ່ານ ນາງ ນາລີ ສີສຸລິດ, ພັນລະຍາ ທ່ານປະທານປະເທດ ແຫ່ງ ສປປ ລາວ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມດ້ວຍບັນດາທ່ານເອກອັກຄະລັດຖະທູດ ວິສາມັນຜູ້ມີອຳນາດເຕັມ ຂອງປະເທດສະມາຊິກອາຊຽນ.
ທ່ານ ອາດສະພັງທອງ ສີພັນດອນ ກ່າວວ່າ: ກິດຈະກຳປູກຕົ້ນໄມ້ໃນຄັ້ງນີ້ມີຄວາມໝາຍສໍາຄັນເປັນຢ່າງຍິ່ງ ເພື່ອສະແດງຄວາມຂໍ່ານັບຊົມເຊີຍຜົນສໍາເລັດຂອງກອງປະຊຸມເຈົ້າຄອງນະຄອນຫຼວງອາຊຽນ, ກອງປະຊຸມເວທີ ເຈົ້ານະຄອນອາຊຽນ ແລະ ກອງປະຊຸມເຄື່ອຂ່າຍບັນດານະຄອນອາຊີຕາເວັນອອກສຽງໃຕ້ ແລະ ເພື່ອສ້າງສະພາບແວດລ້ອມທີ່ດີ, ເພີ່ມເຂດສີຂຽວໃຫ້ສວນປະຕູໄຊພາກຂະຫຍາຍ ທີ່ຕັ້ງຢູ່ໃຈກາງຕົວເມືອງນະຄອນຫຼວງວຽງຈັນໃຫ້ສວຍສົດງົດງາມ, ທັງເປັນການສືບຕໍ່ປະຕິບັດວຽກງານການປູກຕົ້ນໄມ້ຕາມຂີດໝາຍຂອງປະເທດສະມາຊິກອາຊຽນ ໃນການປະຕິບັດບັນດາມາດຕະການ, ເພື່ອຫຼຸດຜ່ອນການປ່ອຍອາຍພິດກາກບອນ ແລະ ເຮັດໃຫ້ຕົວເມືອງສີຂຽວເພີ່ມຂຶ້ນ.
ສວນປະຕູໄຊພາກຂະຫຍາຍ ໄດ້ເປັນຕົວແທນ ແລະ ຊຸກຍູ້ສົ່ງເສີມການຮ່ວມມື ໃນກອບນະຄອນຫຼວງອາຊຽນ ຊຶ່ງໃນເວທີການສົນທະນາໃນກອງປະຊຸມບັນດາເຈົ້າຄອງ ນະຄອນຫຼວງອາ ຊຽນໃນຄັ້ງນີ້ໄດ້ປິ່ນອ້ອມຄໍາຂວັນ “ ເພີ່ມທະວີການເຊື່ອມຈອດ ແລະ ຄວາມເຂັ້ມແຂງຂອງອາຊຽນ” ໂດຍຜ່ານການປຶກ ສາຫາລືກ່ຽວກັບ 5 ຫົວຂໍ້ຕົ້ນຕໍ ຄື: ການທ່ອງທ່ຽວສີຂຽວ, ການພັດ ທະນາເສດຖະກິດແບບຍືນຍົງ, ຕົວເມືອງທີ່ໜ້າຢູ່ ແລະ ຍືນຍົງ, ຕົວເມືອງທີ່ມີຄວາມຍືນຍົງດ້ານສິ່ງແວດລ້ອມ ແລະ ຄວາມເຂັ້ມແຂງທົນທານຕໍ່ການປ່ຽນແປງດິນຟ້າອາກາດ.
ພິເສດໃນຂອບເຂດສວນປະຕູໄຊ ໄດ້ມີຕົ້ນໄມ້ນ້ອຍ ແລະ ໃຫຍ່ຫຼາຍຊະນິດ ທີ່ເປັນໄມ້ພື້ນເມືອງຂອງ ສປປ ລາວ. ນອກຈາກຕົ້ນໄມ້ແລ້ວໃນ ສວນຍັງມີການສ້າງປະຕິມະກຳ ສັນຍາລັກເຄື່ອງດົນຕຣີປະຈຳຊາດ ຂອງບັນດານະຄອນຫຼວງອາຊຽນ, ຊຶ່ງເປັນການສະແດງໃຫ້ເຫັນເຖິງຄວາມມຸ່ງໝັ້ນເສີມຂະຫຍາຍການຮ່ວມມື ຕາມນະໂຍບາຍຂອງນະຄອນຫຼວງອາຊຽນ ກໍຄື ນະໂຍບາຍຂອງບັນດາປະເທດອາຊຽນ ຕີມໍເລດສະເຕຢ່າງຕັ້ງໜ້າເພື່ອຊຸກຍູ້, ສົ່ງເສີມການພົວພັນມິດຕະພາບທີ່ເປັນມູນເຊື້ອຂອງບັນດານະຄອນຫຼວງອາຊຽນທີ່ມີຈຸດພິເສດດີເດັ່ນແຕກຕ່າງກັນໃຫ້ນັບມື້ແຕກດອກອອກຜົນສວຍສົດງົດງາມຍິ່ງໆຂຶ້ນດັ່ງດອກໄມ້ທີ່ເບັ່ງບານໃນສວນແຫ່ງນີ້.
ຂ່າວ: ວສລ