ສຳນັກຂ່າວຕ່າງປະເທດ ລາຍງານໃຫ້ຮູ້ວ່າ: ເມື່ອບໍ່ດົນມານີ້, ພົບຜູ້ປ່ວຍ 500 ຄົນມາຮັກສາຕົວຢູ່ໂຮງໝໍດ້ວຍອາການອາຫານເປັນພິດ, ຫຼັງຮັບປະທານເມນູບັນໝີ່ ຫຼື ເຂົ້າຈີ່ປັດເຕ້ ທີ່ຮ້ານໜຶ່ງທີ່ຕັ້ງຢູ່ເຂດຊວນບິນ, ເມືອງລອງຄັນ, ແຂວງດົງນາຍ.
ເຈົ້າໜ້າທີ່ໄດ້ລາຍງານໃຫ້ຮູ້ວ່າ: ມີຜູ້ປ່ວຍເຂົ້າຮັບການຮັກສາບາງຄົນສາມາດກັບໄປພັກຜ່ອນຢູ່ເຮືອນໄດ້ແລ້ວ, ແຕ່ກໍຍັງມີຜູ້ປ່ວຍໜັກອີກ 12 ຄົນ ທີ່ທຳການຮັກສາຢູ່ໂຮງໝໍ, ເຊິ່ງກໍລະນີຮ້າຍແຮງສຸດແມ່ນເດັກຊາຍ, ອາຍຸ 6 ປີ ຍັງມີອາການໂຄມາ, ປັດສະວະໜ້ອຍ ແລະ ຍັງຕ້ອງໃຊ້ເຄື່ອງຊ່ວຍຫາຍໃຈ ແລະ ຟອກໝາກໄຂ່ຫຼັງ.
ຫຼັງຈາກເກີດເຫດການຂຶ້ນ, ເຈົ້າໜ້າທີ່ໄດ້ສັ່ງປິດຮ້ານດັ່ງກ່າວຊົ່ວຄາວ, ເພາະຄາດວ່າ: ວັດຖຸດິບທີ່ນຳມາປຸງແຕ່ງອາດມີການເນົ່າ, ບູດ ເນື່ອງຈາກອາກາດຮ້ອນ ແລະ ເບື້ອງຕົ້ນທີ່ເຂົ້າກວດສອບພາຍໃນຮ້າຍຍັງພົບວ່າ ລະບົບການປຸງແຕ່ງແມ່ນບໍ່ຜ່ານຕາມມາດຕະຖານເລື່ອງຄວາມປອດໄພຂອງອາຫານທີ່ໄດ້ກຳນົດໄວ້.
ຂ່າວ: BBC