ບໍ່ເຄີຍສູບຢາກໍເປັນມະເຮັງໄດ້, ເພາະຄົນອ້ອມຂ້າງສູບຢາ, ຜົນຮ້າຍຈາກ ”ຄວັນຢາສູບມືສອງ”
ຈາກການແບ່ງປັນເລື່ອງລາວຈາກທ່ານໝໍ ປະຊາ ກັນຍາປຣະສິດ ຈາກໂຮງໝໍຊຽງໃໝ່ຣາມາທິບໍດີ ໄດ້ໂພສວີດີໂອຜ່ານຕິກຕັອກ doctor.pracha_neuro_surg ໝໍປະຊາຜ່າຕັດສະໝອງ (doctor.pracha_neuro_surg หมอประชาผ่าตัดสมอง) ກ່າວເຖິງອາການຂອງຜູ້ປ່ວຍຄົນໜຶ່ງທີ່ໄດ້ຮັບຜົນກະທົບຈາກ ຄວັນຢາສູບມືສອງ ຈົນເຮັດໃຫ້ເປັນມະເຮັງປອດ, ເຊິ່ງມີເນື້ອໃນລາຍລະອຽດວ່າ: ຜູ້ປ່ວຍຄົນດັ່ງກ່າວເປັນເພດຍິງ ອາຍຸ 42 ປີ, ມີອາການເຈັບຫົວເປັນເວລາ 1 ເດືອນ, ພາຍຫຼັງມາກວດສຸຂະພາບພົບເຫັນກ້ອນຂະໜາດໃຫຍ່ໃນສະໝອງ, ຈຶ່ງໄດ້ທຳການຜ່າຕັດເພື່ອເອົາກ້ອນດັ່ງກ່າວໄປກວດ, ຜົນອອກມາເຫັນວ່າເປັນກ້ອນທີ່ລາມມາຈາກການເປັນມະເຮັງປອດ, ຫຼັງຈາກນັ້ນໄດ້ນຳຕົວຜູ້ປ່ວຍໄປກວດກາຢ່າງລະອຽດພົບວ່າ: ຜູ້ປ່ວຍເປັນມະເຮັງປອດໄລຍະສຸດທ້າຍ. ແຕ່ຍັງໂຊກດີທີ່ມະເຮັງຍັງບໍ່ທັນໄດ້ລຸກລາມໄປເຖິງ ຕັບ, ໄຕ ແລະ ມ້າມ, ມີພຽງແຕ່ສະໝອງເທົ່ານັ້ນ.
ຈາກການສອບຖາມປະຫວັດຂອງຜູ້ປ່ວຍຮູ້ວ່າ: ພໍ່ຂອງຜູ້ປ່ວຍເປັນຄົນມັກສູບຢາເປັນປະຈຳ ແລະ ຫຼັງຈາກແຕ່ງງານ ສາມີຂອງຜູ້ປ່ວຍກໍມັກສູບຢາເຊັ່ນດຽວກັນ, ຈຶ່ງໄດ້ຮັບໂທດຂອງຄວັນຢາສູບມືສອງມາຕະຫຼອດຊີວິດ.
ຫຼັງຈາກຜ່າຕັດ, ຜູ້ປ່ວຍຄົນດັ່ງກ່າວຕ້ອງທຳການສາຍແສງ ແລະ ໃສ່ເຄມີບຳບັດ, ເຊິ່ງເຊວມະເຮັງກໍຕອບສະໜອງຕໍ່ກັບການຮັກສາ, ກ້ອນຢູ່ປອດກໍຄ່ອຍໆຫາຍໄປ, ເຊິ່ງທັງນີ້ທ່ານໝໍ ປະຊາ ຍັງໄດ້ເຕືອນວ່າ: ຫາກຮັກຕົວເອງ, ຮັກຄອບຄົວ ຢ່າຄາຍຄວາມຕຶງຄຽດດ້ວຍການສູບຢາ, ແຕ່ຄວນອອກກຳລັງກາຍແທນດີກວ່າ.
ຂ່າວ: Khaosod