ສຳນັກຂ່າວ ບີບີຊີ ລາຍງານວ່າ ຝົນທີ່ຕົກລົງມາຢ່າງໜັກໃນວັນຈັນທີ່ຜ່ານມາ 8 ສິງຫາ 2022 ເຮັດໃຫ້ເກີດນໍ້າຖ້ວມສູງຕາມຖະໜົນຫົນທາງໃນຂົງເຂດກຸງໂຊລ ນອກຈາກນັ້ນ ນໍ້າຍັງໄດ້ໄຫຼເຂົ້າຖ້ວມສະຖານີລົດໄຟໃຕ້ດິນຫຼາຍແຫ່ງ ແລະ ກໍ່ໃຫ້ເກີດໄຟດັບທົ່ວກຸງໂຊລ ລ່າສຸດມີລາຍງານວ່າພົບຜູ້ເສຍຊີວິດເພີ່ມອີກເປັນ 8 ຄົນ ບາດເຈັບອີກ 14 ຄົນ.
ຕາມການລາຍງານຂອງສຳນັກຂ່າວທ້ອງຖິ່ນ ມີໄດ້ຮັບຜູ້ເຄາະຮ້າຍ 3 ຄົນຈົມນໍ້າເສຍຊີວິດພາຍໃນອະພາດເມັ້ນໃຕ້ດິນຂອງພວກເຂົາ, ໂດຍເຈົ້າໜ້າກູ້ໄພ ບໍ່ສາມາດເຂົ້າຊ່ວຍເຫຼືອໄດ້ທັນເວລາ ເນື່ອງຈາກວ່າ ນໍ້າຖ້ວມສູງຮອດລະດັບແອວ ນອກຈາກນັ້ນຍັງມີຜູ້ເສຍຊີວິດຈາກສາເຫດອື່ນໆເຊັ່ນ ໄຟຟ້າຊັອດ ແລະ ດິນເຈື່ອນ.
ຫຼາຍຂົງເຂດກຸງໂຊລ ແລະ ພື້ນທີ່ໃກ້ຄຽງຄືອິນຊອນ ແລະ ຍອງກີ ກໍປະເຊີນກັບຝົນຕົກໜັກ ທີ່ມີປະລິມານນໍ້າສູງຂື້ນ 10cm ຕໍ່ຊົ່ງໂມງ ໃນກາງຄືນຂອງວັນຈັນທີ່ຜ່ານມາ.
ຜົນກະທົບດັ່ງກ່າວໄດ້ເຮັດໃຫ້ປະຊາຊົນໃນກຸງໂຊລຫຼາຍກວ່າ 163 ຄົນຕ້ອງເປັນຄົນບໍ່ມີບ່ອນຢູ່ ແລະ ໄປອາໄສຢູ່ຕາມໂຮງຮຽນ, ຕຶກອາຄານຂອງລັດຖະບານ.
ມາຮອດຕອນນີ້ນໍ້າທີ່ຖ້ວມໃນກຸງໂຊລເລີ່ມຫຼຸດລົງໃກ້ຈະກັບສູ່ສະພາບປົກກະຕິແລ້ວ ແຕ່ກົມອຸຕຸນິຍົມຂອງເກົາຫຼີໃຕ້ຍັງມີຄຳເຕືອນວ່າຈະມີຝົນຕົກໜັກໄປຈົນຮອດວັນພຸດ.