ໃນໄລຍະການພະຍາດຂອງພະຍາດໂຄວິດ-19 ການໄປຕະຫຼາດກໍຕ້ອງໄດ້ລະມັດລະວັງ

ໃນໄລຍະທີ່ມີການລະບາດໃນຊຸມຊົນການໄປຊື້ເຄື່ອງຢູ່ຕະຫຼາດ, ຮ້ານມິນິມາກ ຫຼື ຊຸບເປີມາເກັດເປັນອີກຈຸດສ່ຽງໜຶ່ງທີ່ທ່ານຕ້ອງພິຈາລະນາກ່ອນເຂົ້າໄປໃນສະຖານທີ່ນີ້ຄື: ຖ້າຕະຫຼາດແຫ່ງໃດມີຄົນແອອັດ, ຄົນຊື້-ຄົນຂາຍຫຼາຍ ຈົນບໍ່ສາມາດແຍກຫ່າງເກີນ 1 ແມັດໄດ້ ຫຼື ຖ້າເປັນຮ້ານມິນິມາກ ຫຼື ຊຸບເປີມາເກັດແບບປິດປະຕູເປີດແອ ກໍ່ເປັນຈຸດສ່ຽງໜຶ່ງທີ່ທ່ານຄວນຫຼີກເວັ້ນ ເນື່ອງຈາກອາກາດໃນສະຖານທີ່ແຫ່ງນັ້ນບໍ່ໄຫຼວຽນ ກໍ່ໃຫ້ເກີດຄວາມສ່ຽງສູງໃນການຕິດເຊື້ອໄດ້ ເມື່ອທ່ານໝັ້ນໃຈວ່າສາມາດປ້ອງກັນໄດ້ດີໃນຈຸດຊື້ຂາຍແຫ່ງນີ້ຂໍໃຫ້ທ່ານປະຕິບັດເຊັ່ນນີ້:

  1. ລ້າງມືໃຫ້ສະອາດໃສ່ຜ້າປິດປາກ-ດັງ ຈາກນັ້ນກຽມເງິນໃນມືຂອງທ່ານໃຫ້ພ້ອມເພື່ອຫຼີກເວັ້ນການຢິບຈັບເຄື່ອງແລ້ວມາຈັບກະເປົາເງິນໃນຖົງ ຫຼື ໃນກະເປົາເງິນອີກ
  2. ຖ້າທ່ານຕ້ອງໃຊ້ເງິນແບບໂອນຈ່າຍຜ່ານບັດເອທີເອັມ ຫຼື ລະບົບ One pay ໃນໂທລະສັບທ່ານຄວນຕຽມບັດ ຫຼື ໂທລະສັບໃນມືຂອງທ່ານໃຫ້ພ້ອມ ໂທລະສັບຄວນໃສ່ຖົງຢາງໃສ ເພື່ອຫຼີກເວັ້ນການສໍາຜັດໂທລະສັບໂດຍກົງ
  3. ການເລືອກຊື້ເຄື່ອງຄວນຫຼີກເວັ້ນການສໍາຜັດຈັບບາຍເຄື່ອງທຸກຢ່າງ ແຕ່ຈົ່ງເລືອກຈັບບາຍແຕ່ສິ່ງທີ່ທ່ານມັກທີ່ສຸດ
  4. ຮັບປະກັນຢູ່ຫ່າງຈາກຜູ້ຂາຍ ຫຼື ລູກຄ້າຄົນອື່ນໆ ຢ່າງໜ້ອຍ 1 ແມັດຂຶ້ນໄປ ຫຼື ຈຸດທີ່ທ່ານຢາກຊື້ຍັງມີຄົນຫຼາຍກໍ່ຄວນລໍຖ້າເພື່ອຮັບປະກັນຕໍ່ສຸຂະພາບຂອງທ່ານເອງ ແລະ ຄົນອື່ນດ້ວຍ
  5. ດີທີ່ສຸດຄວນກຽມຖົງໃສ່ເຄື່ອງຂອງຕົນເອງມາແຕ່ເຮືອນ ແຕ່ຖ້າຕ້ອງເອົາຖົງຢາງມາຈາກຮ້ານຄ້າ ຫຼື ຕະຫຼາດ ທ່ານຄວນຂ້າເຊື້ອທີ່ຈຸດຫູຫິ້ວຂອງຖົງ ດ້ວຍການພົ່ນເຫຼົ້າຂ້າເຊື້ອກ່ອນເອົາເຂົ້າເຮືອນ ແຕ່ຄວນລະວັງບໍ່ໃຫ້ການສີດພົ່ນຂ້າເຊື້ອຖືກອາຫານໂດຍກົງ
  6. ເມື່ອເກັບມ້ຽນອາຫານທີ່ຊື້ມາແລ້ວ ຄວນໄດ້ລ້າງມືໃສ່ສະບູໃຫ້ສະອາດອີກຄັ້ງ
  7. ສ່ວນອາຫານທີ່ຊື້ມາຈາກຕະຫຼາດຄວນປຸງແຕ່ງໃຫ້ສຸກດີ ຫຼື ອຸ່ນຮ້ອນກ່ອນຈຶ່ງກິນ