ຂົວນ້ຳຄານ 3 ເປັນຄວາມຫວັງໜຶ່ງຂອງລັດ ກໍຄືແຂວງຫຼວງພະບາງ ເພື່ອເຊື່ອມຈອດເສັ້ນທາງເວັ້ນຕົວເມືອງ
ທ່ອງທ່ຽວປະຈຸບັນໜ້າວຽກໂດຍລວມໃກ້ສຳເລັດແລ້ວ ແຕ່ກັບມີຫາງສຽງທາງລົບຈາກສັງຄົມ ກ່ຽວບັນຫາການ
ກໍ່ສ້າງຄວາມສາມາດຮັບນ້ຳໜັກ, ເຈົ້າໜ້າທີ່ກ່ຽວຂ້ອງຈິ່ງລົງກວດກາຄືນ ພ້ອມຢືນຢັນວ່າຂົວແຫ່ງນີ້ໄດ້ມາດ
ຕະຖານດີ ທັງຮັບປະກັນຄວາມປອດໄພການໃຊ້ງານ.
ຈາກຫາງສຽງຂອງສັງຄົມຈົ່ມວ່າ ການກໍ່ສ້າງຂົວຂ້າມນ້ຳຄານແຫ່ງທີ 3 ຢູ່ເສັ້ນທາງເວັ້ນຕົວເມືອງຫຼວງພະບາງ
ເຂດບ້ານຜານົມ ໜ່ວຍງານກ່ຽວຂ້ອງຕ່າງໆ ຈິ່ງໄດ້ລົງພື້ນທີ່ສຳຫຼວດຕົວຈິງຂອງການກໍ່ສ້າງໃນວັນທີ 18 ຕຸລາ
2014 ຜ່ານມານີ້ ເພື່ອວິເຄາະເບິ່ງສາເຫດຕົວຈິງຮ່ວມກັບ ບໍລິສັດ ຜູ້ຮັບເໝົາກໍ່ສ້າງ ລວມທັງຜູ້ອອກແບບໂຄງ
ການ.
ທ່ານ ບຼົ່ງວ່າງ ຫວ່າງເຈ່ຍຊາ ຫົວໜ້າຂະແຫນງຄຸ້ມຄອງທາງບົກພະແນກໂຍທາທິການ ແລະ ຂົນສົ່ງ (ຍທຂ)
ແຂວງຫຼວງພະບາງ ທັງເປັນຫົວໜ້າຮັບຜິດຊອບໂຄງການກໍ່ສ້າງເສັ້ນທາງເວັ້ນຕົວເມືອງຫຼວງພະບາງ ແຕ່ບ້ານ
ກົກງີ້ວ ຫາບ້ານພອນໄຊ ໄດ້ໃຫ້ສຳພາດຕໍ່ສື່ຂ່າວເສດຖະກິດ-ສັງຄົມໃນຕອນບ່າຍຂອງວັນດຽວກັນຮູ້ວ່າ: ຂົວຂ້າມ
ນ້ຳຄານ ແຫ່ງທີ 3 ທີ່ນອນຢູ່ໃນເສັ້ນທາງເລກ 13 ເໜືອ ເສັ້ນທາງເວັ້ນຕົວເມືອງຫຼວງພະບາງ ຕາມຄວາມເປັນຈິງ
ຂົວແຫ່ງດັ່ງກ່າວ ແມ່ນໄດ້ປະຕິບັດຕາມມາດຕະຖານການອອກແບບ AASHTO ທີ່ນຳໃຊ້ໃນທົ່ວໂລກ ແລະ ໄດ້ປະ
ຕິບັດຕາມຂັ້ນຕອນຂອງວິຊາການຄືໄດ້ເລີ່ມຕົ້ນຈາກການວ່າຈ້າງບໍລິສັດສຳຫຼວດອອກແບບ (ສະເພາະຂົວແມ່ນ
ໄດ້ຈ້າງຜູ້ຊ່ຽວຊານທີ່ມີປະສົບການຈາກຕ່າງປະເທດເປັນຜູ້ອອກແບບ), ມີການສຳຫຼວດສ່ອງກ້ອງເອົາຄ່າລະດັບ,
ແລວນ້ຳ, ຄວາມກວ້າງ, ລະດັບນ້ຳຕ່ຳສຸດ-ສູງສຸດ, ມີການຊີເຈາະຊັ້ນດິນທໍລະນີສາດໃນທຸກໆເສົາ ແລະ ເອົາໄປວິ
ເຄາະວິໄຈເພື່ອຄຳນວນຄວາມສາມາດຮັບນ້ຳໜັກຂອງດິນມາ ອອກແບບເປັນຮາກຖານເສົາໃຫ້ຮັບປະກັນ ແລະ
ປະຢັດ. ມີການຄິດໄລ່ນ້ຳໜັກຄົງທີ່, ນ້ຳໜັກຈອນ, ແຮງນ້ຳແຮງລົມ ແລະ ແຜ່ນດິນໄຫວເປັນຢ່າງດີ.
ທ່ານ ເຈີລີ່ ຊ່ຽວຊານໃນການອອກແບບ ແລະ ຄິດໄລ່ໂຄງສ້າງຂົວນ້ຳຄານແຫ່ງທີ 3 ຂອງໂຄງການທາງເວັ້ນຕົວ
ເມືອງຫຼວງພະບາງຈາກປະເທດຟີລິບປິນ ໄດ້ຢືນຢັນຕໍ່ສື່ມວນຊົນວ່າ: ຂົວແຫ່ງນີ້ແມ່ນຕົນເອງເປັນຜູ້ອອກແບບ
ແລະ ຄິດໄລ່ຮັບຮອງວ່າໄດ້ມາດຕະຖານດີ ພາຍຫຼັງຜ່ານປະສົບການຫລາຍປີ ທີ່ໄດ້ອອກແບບ ແລະ ຄິດໄລ່ສ້າງຂົວ
ຂ້າມນ້ຳຫຼາຍແຫ່ງໃນທົ່ວປະເທດລາວນັບ ແຕ່ປີ 1992 ຈົນເຖິງປະຈຸບັນ ໂດຍສະເພາະຢູ່ຫຼວງພະບາງມີ: ຂົວນ້ຳມິ່ງ,
ຂົວນ້ຳຄານ 2 ທີ່ໃຊ້ໃນທຸກມື້ນີ້, ຂົວນ້ຳເຊືອງ, ນ້ຳອູ ແລະ ຍັງອີກຫຼາຍໆແຫ່ງຕື່ມອີກ ທີ່ຍັງໃຊ້ໄດ້ເຖິງທຸກມື້ນີ້ ແລະ
ຂົວນ້ຳຄານແຫ່ງທີ 3 ກໍເຊັ່ນດຽວກັນເຊື່ອວ່າການອອກແບບໄດ້ຕາມມາດຕະຖານ ແລະ ນຳໃຊ້ໄດ້ບໍ່ມີບັນຫາຫຍັງ.
ທາງດ້ານ ທ່ານ ບຸນລັດ ທະນູສິນ ຫົວໜ້າວິຊາການບໍລິສັດພູສີຍັງໄດ້ກ່າວຢ້ຳວ່າ: ຂົວແຫ່ງນີ້ທາງວິຊາການຂອງ
ບໍລິສັດພູສີກໍ່ສ້າງຂົວທາງ ຈຳກັດ ແມ່ນໄດ້ປະຕິບັດຕາມຂັ້ນຕອນທຸກຢ່າງຂອງການອອກແບບ ຊຶ່ງມີບໍລິສັດວຽງ
ຈັນ ທີ່ປຶກສາເປັນຜູ້ສຳຫຼວດອອກແບບ, ຫຼັງຈາກນັ້ນ ບໍລິສັດພູສີເປັນຜູ້ຮັບເໝົາລົງທຶນກ່ອນ, ໃນມູນຄ່າ 22,9
ລ້ານໂດລາສະຫະລັດ, ເສັ້ນທາງມີຄວາມຍາວ 18,4 ກິໂລແມັດ ແລະ ພະແນກ ຍທຂ ໄດ້ຄັດເລືອກໃຫ້ບໍລິສັດວາທະ
ລິນທີ່ປຶກສາເປັນຜູ້ຄຸມງານການກໍ່ສ້າງ ຊຶ່ງລົງມືຈັດຕັ້ງປະຕິບັດນັບແຕ່ວັນທີ 27 ມິຖຸນາ 2011 ເປັນຕົ້ນມາ, ມາ
ຮອດປະຈຸບັນ ປະຕິບັດໄດ້ 93% ແລ້ວ ແລະ ກຽມພ້ອມເປີດໃຊ້ໃນຕົ້ນປີ 2015 ນີ້ດ້ວຍຄຸນນະພາບທີ່ໄດ້ມາດຕະ
ຖານແນ່ນອນ.
ທາງຄະນະທີ່ລົງສຳຫຼວດເທື່ອນີ້ຍັງ ກ່າວຢືນຢືນວ່າຂົວແຫ່ງນີ້ໄດ້ດຳເນີນການຢ່າງເຄັ່ງຄັດທາງດ້ານມາດຖານການ
ກໍ່ສ້າງຈິ່ງເຊື່ອວ່າຈະສາມາດຮັບປະກັນໄດ້ຄວາມປອດໄພຂອງການໃຊ້ງານ ຊຶ່ງກົງກັນຂ້າມກັບຫາງສຽງທີ່ວ່າ ຂົວນີ້
ບໍ່ໄດ້ຄຸນນະພາບ ໂດຍສະເພາະແມ່ນລົດບັນທຸກໜັກອັນໄດ້ສົ່ງຜົນເສຍຫາຍຕໍ່ພະແນກ ຍທຂ, ຜູ້ອອກແບບ, ບໍລິ
ສັດທີ່ປຶກສາຄຸມງານ ແລະ ບໍລິສັດຮັບເໝົາກໍ່ສ້າງ ຕະຫຼອດເຖິງນັກວິສະວະກອນໂຍທາທີ່ກ່ຽວຂ້ອງ.
ນຳໜ້າພາທາງຄະນະລົງພື້ນທີ່ສຳຫຼວດຕົວຈິງຄັ້ງນີ້ໂດຍ ທ່ານ ບຼົ່ງວ່າງ ຫວ່າງເຈ່ຍຊາ ຫົວໜ້າຂະແໜງຄຸ້ມຄອງ
ທາງບົກພະແນກ ຍທຂ ແຂວງຫຼວງພະບາງ ທັງເປັນຫົວໜ້າຮັບຜິດຊອບໂຄງການກໍ່ສ້າງເສັ້ນທາງເວັ້ນຕົວເມືອງ
ຫຼວງພະບາງ, ມີທ່ານ ເຈີລີ່ ຈາກປະເທດຟີລິບປິນຊ່ຽວຊານໃນການອອກແບບ ແລະ ຄິດໄລ່ໂຄງສ້າງຂົວນ້ຳຄານ
ແຫ່ງທີ 3 ຂອງໂຄງການທາງເວັ້ນຕົວເມືອງຫຼວງພະບາງ, ມີທ່ານ ບຸນລັດ ທະນູສິນ ຫົວໜ້າວິຊາການບໍລິສັດພູສີກໍ່
ສ້າງ, ມີທ່ານ ສົມລິດ ບຸບຜາປັນຍາ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ທັງເປັນຜູ້
ຊີ້ນຳວຽກງານສື່ມວນຊົນແຂວງຫຼວງພະບາງ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມເປັນພະຍານໃນການສຳ
ຫຼວດ.
ແຫລ່ງຂ່າວ: ເສດຖະກິດ – ສັງຄົມ