ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະ ຊວງສາທາລະນະສຸກ ແຈ້ງໃຫ້ຮູ້ໃນວັນທີ 1 ພະຈິກ 2020 ນີ້ວ່າ: ໃນວັນທີ 30 ພະຈິກ 2020 ກວດພົບຜູ້ປ່ວຍໄຂ້ຍຸງລາຍ 10 ກໍລະນີ ແລະ ນັບແຕ່ວັນທີ 1 ມັງກອນ ຫາ 30 ພະຈິກ 2020 ສປປ ລາວ ມີຜູ້ຕິດເຊື້ອພະຍາດໄຂ້ຍຸງລາຍສະສົມທັງໝົດ 7.973 ຄົນ. ໃນນີ້ເສຍຊີວິດແລ້ວ 12 ຄົນ (ຢູ່ນະຄອນຫຼວງວຽງຈັນ 4 ຄົນ, ບໍລິຄຳໄຊ 2 ຄົນ, ຄຳມ່ວນ 2 ຄົນ, ໄຊຍະບູລີ, ຊຽງຂວາງ, ສະຫວັນນະເຂດ ແລະ ຜົ້ງສາລີ ແຂວງລະ 1 ຄົນ).
ທ່ານ ດຣ.ສີສະຫວາດ ສຸດທານີລະໄຊ ກ່າວຕື່ມວ່າ: ສໍາລັບການປ້ອງກັນພະຍາດໄຂ້ຍຸງ ກໍຄືການທຳລາຍແຫຼ່ງເພາະພັນຂອງໜອນນ້ຳຍຸງລາຍ. ສະນັ້ນ, ຈຶ່ງຂໍຮຽກຮ້ອງມາຍັງປະຊາຊົນ, ຊຸມຊົນ ແລະ ອຳນາດການປົກຄອງທຸກຂັ້ນ ຮ່ວມແຮງຮ່ວມໃຈປະຕິບັດ 5ປ ຢ່າງເຄັ່ງຄັດ ແລະ ຖ້າມີອາການໄຂ້ ໃຫ້ຮີບຮ້ອນໄປພົບແພດໝໍ ແລະ ຫ້າມຊື້ຢາມາກິນເອງ ເພື່ອຈະໄດ້ຮັບການປິ່ນປົວຢ່າງທັນການ.
ຮຽບຮຽງຂ່າວ: ພຸດສະດີ