ວິທະຍຸກະຈາຍສຽງ ແຂວງສະຫວັນນະເຂດ ລາຍງານ ໃນວັນທີ 19 ຕຸລາ 2020 ນີ້, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມພັນລະຍາ ແລະ ບັນດາພະແນກການຕ່າງໆນໍາເອົາເຄື່ອງຊ່ວຍເຫຼືອມາມອບໃຫ້ຜູ້ປະສົບໄພນໍ້າຖ້ວມທີ່ເມືອງເຊໂປນ ແຂວງສະຫວັນນະເຂດ, ໂດຍການຕ້ອນຮັບຂອງ ທ່ານ ວົງສະຫວັນ ວຽງມະນີ ເຈົ້າເມືອງເຊໂປນ ພ້ອມຄະນະ ຕະຫຼອດຮອດອົງການປົກຄອງບ້ານ ແລະ ພໍ່ແມ່ປະຊາຊົນ ໃນໂອກາດດັ່ງກ່າວ, ທ່ານ ກໍ່ໄດ້ນໍາເອົາເຄື່ອງບັນເທົາທຸກຈໍານວນໜຶ່ງຈາກພະ ແນກແຮງງານ ແລະ ສະຫວັດດີການສັງຄົມມາຊ່ວຍເຫຼືອເຊັນ: ນໍ້າດື່ມ ຈໍານວນ 500 ແພັກ, ເຕັ້ນ 10 ດາງ, ເຂົ້າສານ 300 ສອບເທົ່າກັບ1.5ໂຕນ, ຜ້າຫົ່ມນອນ, ມຸ້ງ,ເຄື່ອງນຸ່ງຫົ່ມ 150 ຊຸດ, ໝີ່ສໍາເລັດຮູບ 10 ແກັດ, ປາກະປ໋ອງ 10 ແກັດ.
ສະຖານະການຫຼ້າສຸດ ສະພາບນ້ຳຖ້ວມຢູ່ເມືອງສອງຄອນ ໃນຕອນເຊົ້າວັນທີ 20 ຕຸລາ 2020 ເວລາ 5:30 ໂມງ, ລະດັບເຊບັງຫຽງ ສູງເຖິງ 17,80 ແມັດ ແລະ ຍັງຄົງຈະເພີ່ມຢ່າງຕ່ໍເນື່ອງ, ເພາະມວນນ້ຳທາງຕອນເໜືອ ຍັງໄຫຼລົງສົມທົບກັບມວນນ້ຳເຊບັງຫຽງ. ໃນຂະນະນີ້, ຫຼາຍພື້ນທີ່ຂອງເມືອງສອງຄອນ ລຽບເຊບັງຫຽງ ພວມໄດ້ຮັບຜົນກະທົບໜັກຂຶ້ນຕ່ໍເນື່ອງ ເຮືອນຊານຂອງປະຊາຊົນ ຫຼາຍບ້ານ ຖືກນ້ຳຖ້ວມຂັງ.
ບ້ານທີ່ຖືກຕັດກະແສໄຟຟ້າມີ: ບ້ານລະຫານ້ຳ, ທ່າຂາມລຽນ, ຫົວຫາດ, ແກ້ງໂດນ, ສີງທ່າ, ຫ້ວຍຄໍ້, ດອນຂຽວ, ນາກະຫລຶງ, ນາສະໂນ, ຫ້ວຍໄຂ່ ແລະ ບ້ານນາທັງ.
ຮຽບຮຽງຂ່າວ: ພຸດສະດີ