ເມື່ອເວົ້າເຖິງແຫຼ່ງທ່ອງທ່ຽວຍອດນິຍົມຂອງອິນເດຍ ທຸກຄົນຕ້ອງເອີ່ຍເຖິງ ທັຊມາຮາລ ແນ່ນອນ ແຕ່ຈາກການຈັດອັນດັບຫຼ້າສຸດໂດຍເວັບໄຊ TripAdvisor ປາກົດວ່າ ທັຊມາຮາລບໍ່ໄດ້ດຶງດູດນັກທ່ອງທ່ຽວຫຼາຍທີ່ສຸດອີກຕໍ່ໄປ ເພາະວ່າກິດຈະກຳທີ່ນັກທ່ອງທ່ຽວຫັນປ່ຽນມາໃຫ້ຄວາມສົນໃຈ ແລະ ໄດ້ຮັບຄວາມນິຍົມທີ່ສຸດໃນຂະນະນີ້ກໍຄື ຊຸມຊົນທາຣາວີ ໃນນະຄອນມຸມໄບນັ້ນເອງ.
ຈາກການຈັດອັນດັບ Traveller’s Choice ປະຈຳປີ 2019 ພົບວ່າ ການໄປທ່ຽວຊຸມຊົນທາຣາວີແບບເປັນກຸ່ມນ້ອຍໆ ຫຼື ທີ່ເອີ້ນວ່າ Dharavi Slum Small-Group Tour in Mumbai ເປັນກິດຈະກຳທີ່ໄດ້ຮັບການແນະນຳໃຫ້ເຮັດຫຼາຍທີ່ສຸດ ຊຶ່ງຊຸມຊົນແຫ່ງນີ້ມີຊື່ສຽງໂດ່ງດັງໄປທົ່ວໂລກຈາກການເປັນໜຶ່ງໃນສາກຖ່າຍທຳຂອງຮູບເງົາເລື່ອງ Slumdog Millionaire.
ຂະນະທີ່ TripAdvisor ໄດ້ໃຫ້ເຫດຜົນວ່າ ການທີ່ນັກທ່ອງທ່ຽວຕ້ອງໄປທ່ຽວຊົມຊຸມຊົນໃນມຸມໄບ ແລະ ທົວຊຸມຊົນທາຣາວີຖືເປັນການເປີດປະຕູບານໃໝ່ໃຫ້ເຂົ້າເຖິງວິຖີຊີວິດຂອງຊົນຊັ້ນແຮງງານໃນເມືອງມຸມໄບ ຊຶ່ງໃນທົວດັ່ງກ່າວຈະເປີດໂອກາດໃຫ້ສຳຫຼວດທຸກຊອກທຸກມຸມທີ່ແອອັດຍັດຢຽດໄປດ້ວຍສະຖານທີ່ພັກເຊົາຊົ່ວຄາວ ສະຖານທີ່ເຮັດວຽກ ແລະ ໄດ້ພົບກັບຄົນໃນທ້ອງຖິ່ນ ທັງຮຽນຮູ້ວິຖີການໃຊ້ຊີວິດຂອງເຂົາເຈົ້າ ແລະ ທີ່ສຳຄັນກໍຄືການມອບລາຍໄດ້ກັບໄປສູ່ຊຸມຊົນນັ້ນເອງ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday