ຫົວໃຈຂອງຄົນເຮົາມີ 4 ຫ້ອງ ແບ່ງອອກເປັນເບື້ອງຊ້າຍ-ຂວາ ໂດຍຜະໜັງຂອງກ້າມຊີ້ນຫົວໃຈ ແລະ ແບ່ງອອກເປັນຫ້ອງເທິງ-ລຸ່ມໂດຍລີ້ນຫົວໃຈ ຂະນະທີ່ໃນແຕ່ລະວັນຫົວໃຈຈະເຕັ້ນປະມານ 100.000 ຄັ້ງ ທັງນີ້ ພະຍາດຫົວໃຈຖືເປັນພະຍາດທີ່ເກີດຂຶ້ນຢ່າງແຜ່ຫຼາຍດ້ວຍຫຼາຍສາເຫດ ແຕ່ພະຍາດດັ່ງກ່າວກໍສາມາດປ້ອງກັນໄດ້ ແລະ ໜຶ່ງໃນວິທີປ້ອງກັນກໍຄື ການໃຫ້ຄວາມສຳຄັນກັບການເລືອກຮັບປະທານອາຫານການກິນ ເລືອກກິນສິ່ງທີ່ມີປະໂຫຍດ ໝັ່ນອອກກຳລັງກາຍ ພັກຜ່ອນໃຫ້ພຽງພໍ ດື່ມສະອາດໃຫ້ໄດ້ຢ່າງໜ້ອຍວັນລະ 7-8 ຈອກ ລວມເຖິງລະວັງບໍ່ໃຫ້ເກີດຄວາມຄຽດຫຼາຍເກີນໄປ ນອກຈາກນີ້ ກໍມີອາຫານທີ່ຊ່ວຍບຳລຸງຫົວໃຈເພື່ອໃຫ້ຫຼອດເລືອດ ແລະ ຫົວໃຈແຂງແຮງ ຊຶ່ງຈະມີຫຍັງແດ່ນັ້ນເຮົາມາຮູ້ໄປພ້ອມໆກັນເລີຍ.
ປາ ໂດຍສະເພາະປາທະເລເຊັ່ນ ປາທູ ປາທູນ້າ ປາແຊລມອນ ປາຊາດີນ ຊຶ່ງຄວນກິນຢ່າງໜ້ອຍອາທິດລະ 2 ຄັ້ງ ເພາະວ່ານ້ຳມັນຈາກປາທະເລສາມາດຊ່ວຍຫຼຸດລະດັບໄຕຣກລີເຊີໄຣໃນເລືອດ ແລະ ຊ່ວຍປ້ອງກັນການເກີດພະຍາດຫົວໃຈໄດ້.
ໝາກໄມ້ທີ່ມີລົດຊາດຫວານຈັດ ບໍ່ວ່າຈະເປັນໝາກກ້ຽງ ກີວີ ແກ້ວມັງກອນ ກ້ວຍ ແອັບເປິລ ລະແຊັງ ໝາກຫຸ່ງ ໝາກນັດ ເນື່ອງຈາກໝາກໄມ້ເຫຼົ່ານີ້ມີເສັ້ນໃຍອາຫານ ວິຕາມິນ ແລະ ແຮ່ທາດສູງ ຊຶ່ງຈະຊ່ວຍບຳລຸງຮ່າງກາຍ ແລະ ຊ່ວຍຫຼຸດໄຂມັນໃນເລືອດເນື່ອງຈາກວ່າມີລະດັບນ້ຳຕານບໍ່ສູງ.
ພືດຕະກູນຖົ່ວ ສາມາດຊ່ວຍຫຼຸດລະດັບຄໍເລສຕໍຣອລ ແລະ ປ້ອງກັນພະຍາດຫົວໃຈໄດ້ເຊັ່ນກັນ.
ໝາກເລັ່ນ ຊ່ວຍຫຼຸດປະລິມານຄໍເລສຕໍຣອລ ແລະ ຄວາມສ່ຽງໃນການເກີດພະຍາດຫົວໃຈ.
ຜັກໃບຂຽວ ໂດຍສະເພາະຜັກກາດນາ ຜັກໂຂມ ບລ໋ອກໂຄລີ ລວມເຖິງຜັກໃບຂຽວຊະນິດອື່ນໆລ້ວນມີວິຕາມິນ ແລະ ແຮ່ທາດທີ່ຊ່ວຍບຳລຸງຫົວໃຈ.
ໝາກພິລາ ມີສານຕ້ານອະນຸມູນອິດສະຫຼະຢ່າງຫຼວງຫຼາຍ ຈິ່ງຊ່ວຍຫຼຸດຄວາມສ່ຽງຕໍ່ການເປັນພະຍາດຫົວໃຈ.
ອາຫານໄຂມັນຕ່ຳ ເນື່ອງຈາກອາຫານໄຂມັນສູງຖືເປັນສາເຫດທີ່ກໍ່ໃຫ້ເກີດໄຂມັນສະສົມ ໃນກະແສເລືອດຈົນໄປເກາະຢູ່ຕາມຜະໜັງຫຼອດເລືອດ ແລະ ເຮັດໃຫ້ມີຄວາມດັນເລືອດສູງ ຊຶ່ງເປັນສາເຫດຫຼັກທີ່ເຮັດໃຫ້ເກີດພະຍາດຫົວໃຈ ດັ່ງນັ້ນ ຈິ່ງຄວນເລືອກກິນອາ ຫານໄຂມັນຕ່ຳເຊັ່ນ ປາ ແລະ ຊີ້ນສັດທີ່ບໍ່ຕິດໜັງ-ຕິດມັນແທນຈະດີກວ່າ.
ປະເພດອາຫານທີ່ມີສານຕ້ານອະນຸມູນອິດສະຫຼະ ແຫຼ່ງສຳຄັນຂອງອາຫານທີ່ມີສານຕ້ານອະນຸມູນອິດສະຫຼະຄື ວິຕາມິນ A (ແຄໂຣທີນ) ວິຕາມິນ E ແລະ C ຊຶ່ງມີຢູ່ໃນກາລົດ ໝາກອຶ ໝາກມ່ວງ ຜັກໂຂມ ແຄນຕາລູບ ລູກພີຊ ບລ໋ອກໂຄລີ ຜັກບົ້ງ ນ້ຳມັນຖົ່ວເຫຼືອງ ໝາກສີດາ ກີວີ ໝາກກ້ຽງ ກະລ່ຳ ໝາກເຜັດ ໝາກນາວ ແລະ ອື່ນໆ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: iStock