Home ຂ່າວພາຍ​ໃນ ພຽງສອງເດືອນ ທພລ ຫລວງພະບາງ ອອກສິນເຊື່ອໄດ້ 200 ກວ່າຕື້

ພຽງສອງເດືອນ ທພລ ຫລວງພະບາງ ອອກສິນເຊື່ອໄດ້ 200 ກວ່າຕື້

ຈາກ​ການ​ຕອບ​ຮັບ​ທີ່​ນັບ​ມື້​ເພີ່ມ​ຂຶ້ນຂອງ​ລູກ​ຄ້າ ແລະ ຜົນ​ປະກອບ​ການ​ທຸລະກິດ​ປີ 2013 ພຽງ 2 ເດືອນ​ທະນາຄານພັດທະນາ​ລາວ (​ທພລ) ສາຂາ​ແຂວງຫລວງ​ພະບາງ ມີ​ຍອດ​ສິນ​ເຊື່ອ​ປ່ອຍ​ແລ້ວ 266 ຕື້​ກີບ, ຂະນະ​ທີ່​ຍອດ​ເງິນ​ຝາກ​ມີ 299 ຕື້, ເຊື່ອ​ຫມົດ​ປີ​ນີ້​ຈະ​ມີ​ຜົນ​ກຳໄລ 2 ຕື້​ກວ່າ​ກີບ.

ທ່ານ ສົມ​ຈັນ ສົມບູນ​ສີ ຫົວຫນ້າ​ທະນາ​ຄານ​ພັດທະນາ​ລາວ​ສາຂາ​ແຂວງຫລວງ​ພະ​ບາງ​ໄດ້​ໃຫ້​ສຳພາດ​ຕໍ່​ທີມ​ຂ່າວ ເສດຖະກິດ​ຫວ່າງ​ບໍ່​ດົນ​ວ່າ: ​ທພລ ນັບແຕ່​ເລີ່ມ​ເປີດ​ສາຂາ​ໃຫ້​ບໍລິການ​ໃນ​ປີ 2003 ມີ​ລູກ​ຄ້າ​ເຂົ້າ​ໃຊ້​ບໍລິການ​ເພີ່ມຂຶ້ນ​ໃນ​ແຕ່​ລະ​ປີ​ປະມານ 10%, ເຊິ່ງ​ໄດ້ປະກອບສ່ວນ​ໃຫ້​ທາງ ​ທພລ ເຕີບ​ໂຕຢ່າງ​ວ່ອງໄວ ໂດຍ​ສະເພາະ​ແມ່ນ​ສາຂາ ຢູ່​ແຂວງ​ຫລວງ​ພະ​ບາງ​ທີ່​ມີ​ບໍລິການຫລາກ​ຫລາຍ​ບໍ່​ວ່າ​ຈະ​ເປັນ​ເງິນ​ຝາກ​ກະແສ​ລາຍ​ວັນ, ຝາກ​ປະຢັດ ແລະ ເງິນ​ຝາກ ປະຈຳ 24 ເດືອນ, 36 ເດືອນ, 48 ເດືອນ, 60 ເດືອນ ພ້ອມ​ທັງ​ບໍລິການໂອນ​ເງິນ​ທາງໄກ.

ທ່ານ​ຫົວຫນ້າ ​ທພລ ກ່າວ​ອີ​ກວ່າ: ​ທພລ ບໍລິການ​ສິນ​ເຊື່ອ​ຂອງ​ທະນາຄານພັດທະນາ​ລາວ ໂດຍ​ສ່ວນ​ໃຫຍ່​ແມ່ນ​ເນັ້ນໃສ່​ສົ່ງເສີມ ແລະ ພັດທະນາ​ວິ​ສາ​ຫະ​ກິດຂະຫນາດ​ນ້ອຍ ແລະ ຂະຫນາດ​ກາງ (SME) ໃນ​ທຸກ​ຂະແຫນງການ​ເພື່ອເປັນ​ການ​ປະກອບສ່ວນ​ໃນ​ການ​ພັດ​ທະນາ​ເສດຖະກິດ-ສັງຄົມ ແລະ ແກ້​ໄຂ​ຄວາມທຸກ​ຍາກ​ຕາມ​ທິດ​ທາງ​ແຜນການ​ຂອງ​ພັກ-ລັດຖະບານ​ວາງ​ອອກ.

ສຳລັບ​ປີ 2013 ໃນ 2 ເດືອນ​ຜ່ານ​ມາ​ນີ້ ​ທພລ ສາຂາ​ຫລວງ​ພະ​ບາງ​ມີ​ສິນ​ເຊື່ອ​ທີ່​ປ່ອຍ​ອອກ​ແລ້ວທັງ​ຫມົດ 266 ຕື້​ກີບ, ທຽບໃສ່ແຜນການ​ປີ​ທີ່​ວາງ​ໄວ້ 321,25 ຕື້​ກີບປະຕິບັດ​ໄດ້ 98% ໃນ​ນັ້ນ ມີຂະແຫນງ​ຫັດຖະກຳ ແລະ ອຸດ​ສາຫະ​ກຳ 15%, ກໍ່ສ້າງ ແລະ ວັດຖຸ 46%, ກະສິກຳ 4%, ສ່ວນ​ຂະແຫນງ​ການ​ຄ້າ ແລະ ບໍລິການກວມ 35% ຂອງ​ຈຳນວນ​ສິນ ເຊື່ອ​ທັງ​ຫມົດ, ກ່ຽວ​ກັບ​ຍອດ​ເງິນຝາກ​ບັນລຸ 299 ຕື້​ກີບ, ປະຕິບັດໄດ້​ແລ້ວ 98% ຂອງ​ແຜນການ​ປີ.

ທະນາຄານ​ພັດທະນາ​ລາວສາຂາ​ຫລວງ​ພະ​ບາງ ມາ​ຮອດ​ປະຈຸ​ບັນ ມີ​ຕູ້​ເອ​ທີ​ເອັມ (ATM) ທັງ​ຫມົດ 12 ຕູ້, ໃນ​ນັ້ນມີ​ຢູ່​ເມືອງ​ນ້ຳ​ບາກ ແລະ ເມືອງ​ນານ, ພ້ອມ​ດຽວ​ກັນ​ຍັງ​ຂະຫຍາຍ​ໄດ້ 4 ຫນ່ວຍ​ບໍລິການ, 3 ຫນ່ວຍ​ແລກປ່ຽນ​ເງິນຕາ ແລະ ອອກ​ບັດ ATM ໄດ້​ທັງ​ຫມົດ 3.200 ບັດ, ທ່ານ ສົມ​ຈັນ ສົມບູນ​ສີ ກ່າວ.

ທີ່ມາhttp://www.ecom.org.la