2 ແຂວງໃນລາວໄດ້ຮັບທຶນໂຄງການ​ພະລັງງານ​ໄຟຟ້າ​ແສງຕາ​ເວັນ

0
1268

ພິທີ​ເຊັນ​ເອກະສານ​ເຈດ​ຈຳນົງ ສະໜອງ​ອຸປະກອນ​ໄຟຟ້າ ​ແລະ ​​ເງິນທຶນ ​ເພື່ອ​ພັດທະນາ​ໂຄງການ​ພະລັງງານ​ໄຟຟ້າ​ແສງຕາ​ເວັນ ຢູ່​ ແຂວງ​ອັດ​ຕະປື ​ແລະ ​ແຂວງ​ບໍລິ​ຄຳ​ໄຊ ​ໄດ້​ມີ​ຂຶ້ນ ​ໃນ​ວັນ​ທີ 29 ກັນຍາ 2017 ນີ້ ຢູ່ ນະຄອນຫລວງ​ວຽງ​ຈັນ ລະຫວ່າງ​ ທ່ານ ຫາ​ລີ ອາ​ຈູ​ຕັງ (Hari Achuthan) ປະທານບໍລິສັດ ຄອນ​ວອດ​ທ ພະລັງງານ ຈຳກັດ ກັບ​ ທ່ານ ວາວ​ເຕີ ວັນ​ເວີສ ປະທານ​ບໍລິສັດ ​ເຈ​ເນ​ໂຣ ອີ​ເລັກ​ຕຼິກ ​ແລະ ທ່ານ ບີ​ລີ ​ເບ​ດສ ຕາງໜ້າ​ທະນາຄານ​ ຄາ​ເທ ຢູ​ໄນ​ເຕັດ ຈາກ​ປະ​ເທດ​ໃຕ້​ຫວັນ, ​ໂດຍ​ມີ​ ພາກສ່ວນ​ກ່ຽວຂ້ອງທັງ​ສອງ​ຝ່າຍ ​ເຂົ້າ​ຮ່ວມເປັນ​ສັກຂີ​ພິຍານ.

​​ໂຄງການ​ດັ່ງກ່າວ, ບໍລິສັດ​ເຈ​ເນ​ໂຣ ອີ​ເລັກ​ຕຼີກ ຈະ​ເປັນ​ຝ່າຍ​ສະໜອງ​ບັນດາ​ອຸປະກອນ​ໄຟຟ້າຕ່າງໆ ​ເປັນ​ຕົ້ນ​ເຄື່ອງ​ຄບ​ຄຸມ​ໄຟຟ້າ, ອຸປະກອນ​ໄຟ​ຟ້າ​ເພື່ອ​ສ້າງສາ​ຍສົ່ງ ​ແລະ ສະຖານີສ່ວນ​ທະນາຄານ ຄາ​ເທ ຢູ່​ໄນ​ເຕັດ ຈະ​ຊ່ວຍ​ໃນ​ດ້ານ​ການ​ສະໜອງ​ທຶນຮອນ ​ໃຫ້​ກັບ​ໂຄງການ ​ແລະ ບໍລິສັດດີ​ຈີ​ໂຄ​ເລັກ ຈາກ​ສະຫະລັດ​ອາ​ເມ​ລິ​ກາ ຈະ​ເຮັດ​ໜ້າ​ທີ່​ໃນ​ການ​ສຶກສາ​ຄວາມ​ເປັນ​ໄປ​ໄດ້ ລວມ​ເຖິງການ​ສຶກສາວິ​ໄຈ​ ຜົກະທົບ​ຕໍ່​ສິ່ງ​ແວດ​ລ້ອມ-ສັງຄົມ ​ແລະ ບັນດາ​ການ​ສຶກສາ​ທາງ​ວິຊາ​ການ​ ທີ່​ກ່ຽວຂ້ອງ​ກັບ​ໂຄງການ.

ໂຄງການ​ພະລັງງານ​ໄຟຟ້າ​ແສງຕາ​ເວັນ ແມ່ນ​ການ​ລົງທຶນຂອງ​ສະຫະລັດອາ​ເມ​ລິ​ກາ ມີມູນ​ຄ່າ​ຫລາຍ​ກວ່າ 400 ລ້ານ​ໂດ​ລາ​ສະຫະລັດ, ຈະ​ເລີ່​ມລົງມື​ກໍ່ສ້າງ​ພາຍ​ໃນ​ປີ 2019 ຢູ່​ເຂດ​ ບ້ານ​ນ້ຳ​ເດື່ອ ​ເມືອງ​ປາກ​ກະດິງ ​ແຂວງ​ບໍລິ​ຄຳ​ໄຊ, 50 MW ​ແລະ ຢູ່​ແຂວງ​ອັດ​ຕະປື 250 MW. ​ໂຄງການ​ດັ່ງກ່າວ, ຈະ​ຊ່ວຍ​ເພີ່ມ​ຄວາມ​ຫລາກ​ຫລາຍ​​ ໃນດ້ານ​ການຜະລິດ​ພະລັງງານ​ໄຟຟ້າ​ຂອງ​ລາວ ​ທັງ​ເພີ່ມ​ທະວີການ​ຜະລິດ​ພະລັງງານ​ໃນ​ລະດູ​ແລ້ງ ​ແລະ ຈະ​ສ້າງ​ໂອກາດ​ທາງ​ທຸລະ​ກິດ ​ໃຫ້​ກັບນັກ​ທຸລະ​ກິດລາວ ​ແລະ ສະຫະລັດ​ອາ​ເມ​ລິ​ກາ ຕື່ມ​ອີກ.

 

ແຫລ່ງຂ່າວ: ທະນູ​ທອງ ພາບປະກອບ: ​ເກດສະໜາ (ສຳນັກຂ່າວສານປະເທດລາວ)

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.