ຫາລືຜົນ​ກະທົບ​ຈາກ​ໂຄງການ​ເຂື່ອນ​ໄຟຟ້າ​ນ້ຳ​ງຽບ

0
1340
ໂຄງການ​ເຂື່ອນ​ໄຟຟ້າ​ນ້ຳ​ງຽບ
ໂຄງການ​ເຂື່ອນ​ໄຟຟ້າ​ນ້ຳ​ງຽບ

​ໃນ​ວັນ​ທີ 9 ພຶດສະພາ​ຜ່ານ​ມານີ້, ຢູ່​ສະ​ໂມ​ສອນ​ແຂວງ​ບໍລິ​ຄຳ​ໄຊ, ອຳນາດ​ການ​ປົກຄອງ​ແຂວງ​ໄຊ​ສົມບູນ, ບໍລິ​ຄຳ​ໄຊ, ຜູ້​ພັດທະນາ​ໂຄງການ​ພັດທະນາ​ເຂື່ອນ​ໄຟຟ້າ​ນ້ຳ​ງຽບ 1 ​ແລະ ປະຊາຊົນ​ທີ່​ໄດ້​ຮັບ​ຜົນ​ກະທົບ​ຈາກ​ໂຄງການ​ດັ່ງກ່າວ,​ໄດ້​ຮ່ວມ​ກັນປຶກ ສາ​ຫາລື​ກ່ຽວ​ກັບ​ຄວາມ​ຄືບ​ໜ້າ ​ແລະ ການ​ແກ້​ໄຂ​ຜົນ​ກະທົບ​ດ້ານ​ສິ່ງ​ແວດ​ລ້ອມ ​ແລະ ສັງຄົມ,ໂດຍ​ການ​ເປັນ​ປະທານ​ຂອງ​ທ່ານ ດຣ ສົມບັດ ​ເຢຍລີ​ເຮີ ​ເຈົ້າ​ແຂວງ​ໄຊ​ສົມບູນ.

ທ່ານ ​ໂຢຊິ​ຮິ​ໂລ ຢາ​ມາ​ບາ​ຢາ​ຊິ ອຳນວຍ​ການ​ບໍລິສັດ​ໄຟຟ້າ​ນ້ຳ​ງຽບ1ກ່າວ​ວ່າ: ​​ໂຄງການ​​ໄຟຟ້າ​ນ້ຳ​ງຽບ1 ​ແມ່ນ​ການ​ຮ່ວມ​ທຶນ​ລະຫວ່າງ​ບໍລິສັດ​ການ​ໄຟຟ້າ​ຄັນ​ໄຊ​ຂອງ​ຍີ​ປຸ່ນ,ການ​ໄຟຟ້າ​ສາກົນ​ອີ​ເກັດ(EGAT) ​ແລະ ລັດ​ວິ​ສາ​ຫະກິດ​ຖື​ຮຸ້ນ​ລາວ (LHSE), ​ມີອ່າງ​ເກັບ​ນ້ຳ​ຍາວ 70 ກິ​ໂລ​ແມັດ,ກວມ​ເນື້ອທີ່ 6.500 ​ເຮັກ​ຕ້າ,ຕົວ​ເຂື່ອນ​ສູງ 150 ​ແມັດ,​ກຳລັງ​ຕິດຕັ້ງ 260 ​ເມ​ກາ​ວັດ ເພື່ອ​ຜະລິດ​ກະ​ແສໄຟຟ້າ​ສະໜອງ​ໃຫ້​ພາຍ​ໃນ ​ແລະ  ສົ່ງອອກ ຊຶ່ງພາຍຫລັງ​ເຂື່ອນ​ດັ່ງກ່າວ​ກໍ່ສ້າງສຳ​ເລັດ​ຈະ​ສ້າງ​ປະ​

ໂຫຍ​ດ​ຄື: ​ເສຍ​ພັນທະ​ໃຫ້​ລັດຖະບານ​ຫລາຍ​ກວ່າ 600 ລ້ານ​ໂດ​ລາ​ສະຫະລັດ​ຕະຫລອດ​ໄລຍະ​ສຳ​ປະທານ 27 ປີ, ພ້ອມນີ້, ຍັງຈະ ປະກອບສ່ວນກໍ່ສ້າງ​ພື້ນຖານ​ໂຄງ​ລ່າງ​ເຊັ່ນ: ຖະໜົນຫົນທາງ, ຊົນລະປະທານ, ​ເຮືອນ​ຊານບ້ານຊ່ອງ​ຂອງ​ປະຊາຊົນ, ປັບປຸງ​ລະ ບົບ​ນ້ຳ​ສະອາດ ​ແລະ ​ໄຟຟ້າ, ສ້າງ​ວຽກ​ເຮັດ​ງານ​ທຳ​​ໃຫ້ແຮງ​ງານ​ທ້ອງ​ຖິ່ນເພື່ອສົ່ງ​ເສີມ ​ແລະ ພັດທະນາ​ຊີວິດ​ການ​ເປັນ​ຢູ່​ຂອງ​ປະ ຊາຊົນດີຂຶ້ນ.

ທ່ານ ກາ​ເສມ ຊັດ​ທອງ ຮັບ​ພິຊອບ​ວຽກ​ສິ່ງ​ແວດ​ລ້ອມ ​ແລະ ສັງຄົມ ຂອງ​ບໍລິສັດ ກ່າວ​ວ່າ: ​​ໂຄງການ​ດັ່ງກ່າວ ກວມ​ເອົາ​ພື້ນທີ່​ຈຳນວນໜຶ່ງຂອງ​ເມືອງບໍລິຄັນແຂວງ​ບໍລິ​ຄຳ​ໄຊ ​ແລະ ​ເມືອງຮົ່ມ,ທ່າໂທມ​ແຂວງ​ໄຊ​ສົມບູນ  ​ເຊິ່ງມີທັງໝົດ 25 ບ້ານ​ໄດ້​ຮັບ​ຜົນ​ກະທົບ.ແຕ່​ແນວ​ໃດ​ກໍ​ຕາມ ໂຄງການ​ໃຫ້​ຄຳ​ໝັ້ນສັນຍາ​ກັບ​ລັດຖະບານ ​ແລະ ອຳນາດ​ການ​ປົກຄອງ​ທ້ອງ​ຖິ່ນວ່າ​ຈະ​ປະ ຕິບັດຕາມກົດໝາຍ,ລະບຽບການ ​ແລະ ຂໍ້​ກຳນົດ​ຕ່າງໆ​ຂອງລາວ ​ແລະ ສາກົນ​ວາງ​ອອກ​ຢ່າງ​ເຂັ້ມງວດ ​ໂດຍ​ສະ​ເພາະຈະ​​ເອົາ​ໃຈ​ໃສ່​ໃນມາດ​ຕະການ​ປົກ​ປັກ​ຮັກສາ​ສິ່ງ​ແວດ​ລ້ອມ ​ແລະ ສັງຄົມ ​ເຊັ່ນ:ການປົກ​ປັກ​ຮັກສາ​ຊັບພະຍາກອນປ່າ​ໄມ້ ​ແລະ ຊີວະ​ນາໆ​ພັນໃນ​ໄລຍະ​ກໍ່ສ້າງ, ການ​ຍົກຍ້າຍ​ຈັດ​ສັນບ້ານ​ປະຊາຊົນ,ການ​ຊົດ​ເຊີຍ ​ແລະ ອື່ນໆ.

​ໃນກອງປະຊຸມໄດ້ຍົກບັນຫາຜົນກະທົບຕໍ່ສິ່ງແວດລ້ອມ ແລະ ສັງຄົມ,ວິທີການແກ້ໄຂ,ແຜນຍົກຍ້າຍຈັດ ສັນຟື້ນຟູຊິວິດ ການເປັນຢູ່ຂອງປະຊາຊົນ ແລະ ອື່ນໆ,ແຕ່ແນວ​ໃດ​ກໍ​ຕາມ, ສິ່ງ​ທີ່ຜູ້​ເຂົ້າ​ຮ່ວມ​ສ່ວນ​ຫລາຍ​ໃຫ້​ຄວາມ​ສົນ​ໃຈ ຍັງ​ແມ່ນ​ມາດ​ຕະ ການ​ລະອຽດກ່ຽວ​ກັບ​​ແຜນ​ງານ​ຫລຸດຜ່ອນ​ຜົນ​ກະທົບ, ການ​ຕັດ​ໄມ້​ໃນ​ຂອບ​ເຂດ​ອ່າງ​​ເກັບ​ນ້ຳ​,ການຈັດ​ສັນພື້ນທີ່​ຍົກຍ້າຍໃໝ່​ລວມ​ເຖິງ​ບັນຫາ​ການຊົດ​ເຊີຍ​ໃຫ້ປະຊາຊົນ​ທີ່​ໄດ້​ຮັບ​ຜົນ​ກະທົບ.

ທີ່ມາ http://laophatthananews.blogspot.com/2014/05/1_12.html