“ໄພລັດ” ນັກກີລາໂວວີນາມລາວກັບເສັ້ນທາງສູ່ມືອັນດັບ 1 ໂວວີນາມແຫ່ງອາຊຽນ

0
403

ທ້າວ ໄພລັດ ທຳມະວົງສາ ນັກກີລາໂວວີນາມລາວ ເຈົ້າຂອງຫຼຽນຄຳຊີເກມ 2 ສະໄໝຊ້ອນ (2011 ແລະ 2013) ປັດຈຸບັນຖືກຈັດອັນດັບໃຫ້ເປັນມື 1 ປະເພດຟ້ອນມີອຸປະກອນ (ກະບອງ) ຊາຍດ່ຽວ ຈາກການຈັດອັນດັບຂອງສະຫະພັນໂວວີນາມແຫ່ງອາຊຽນ ຄັ້ງຫຼ້າສຸດ.

ໂດຍທ່ານ ວຽງສຸກ ຮັງເງິນ ຄູຝຶກທີມຊາດໂວວີນາມລາວ ຢືນຢັນວ່າ ທ້າວ ໄພລັດ ໄດ້ຖືກຍົກໃຫ້ເປັນມື 1 ຂອງພາກພື້ນອາຊຽນ ສະເພາະປະເພດຟ້ອນມີອຸປະກອນ (ກະບອງ) ຈາກຜົນງານໂດດເດັ່ນຄວ້າຫຼຽນຄຳໄດ້ທຸກລາຍການທີ່ເຂົ້າຮ່ວມການແຂ່ງຂັນ ນັບຕັ້ງແຕ່ປິ 2011 ສ່ວນປະເພດອື່ນໆເຊັ່ນ ຟ້ອນດາບຄູ່ດ່ຽວ ແລະ ອື່ນໆ ແມ່ນຍັງບືນກັນຂຶ້ນເປັນອັນດັບ 1,2,3 ແລະ 4 ໄດ້ແກ່: ລາວ, ກຳປູເຈຍ, ມຽນມາ ແລະ ຫວຽດນາມ.

ທ້າວ ໄພລັດ ທຳມະວົງສາ ໄດ້ໃຫ້ສຳພາດຕໍ່ສຳນັກຂ່າວເສດຖະກິດ-ການຄ້າວ່າ ກ່ອນຈະມາເປັນນັກກີລາໂວວີນາມນີ້ ຕົວເອງໄດ້ຫຼິ້ນກີລາເທຄວັນໂດ ຈາກສະໂມສອນສີທອງ ເຊິ່ງມີອາຈານ ແກ້ວອຸດົມ ສີຫາລາດ ເປັນຜູ້ຊຸກຍູ້ໃຫ້ມາຫຼິ້ນກີລາເທຄວັນໂດກ່ອນທີ່ຈະມາຫຼິ້ນກີລາໂວວີນາມ ໂດຍຜົນງານທີ່ໂດດເດັ່ນແມ່ນສາມາດຍາດໄດ້ຫຼຽນທອງປະເພດຟ້ອນມີອຸປະກອນ (ກະບອງ) ທີ່ຫວຽດນາມ, ໄດ້ຫຼຽນຄຳ 2 ສະໄໝກໍຄືໃນປີ 2011 ທີ່ອິນໂດເນເຊຍ ແລະ 2013 ທີ່ມຽນມາ ໃນປະເພດຟ້ອນກະບອງ ແລະ ຫຼ້າສຸດໄດ້ 2 ຫຼຽນຄຳໃນການແຂ່ງຂັນລະດັບອາຊຽນທີ່ມຽນມາ ແລະ ອິນໂດເນເຊຍ.

ທ້າວ ໄພລັດ ກ່າວຕໍ່ອີກວ່າ ອຸປະສັກຂອງກີລານີ້ແມ່ນເປັນກີລາທີ່ຍາກສົມຄວນ ຕ້ອງອາໄສການຝຶກຊ້ອມຢ່າງຕໍ່ເນື່ອງ ເຖິງແມ່ນວ່າພວກເຮົາຈະບໍ່ມີສະໜາມຝຶກຊ້ອມ ແລະ ມີວຽກຫຼາຍຢ່າງທີ່ເຮັດໃຫ້ການຝຶກຊ້ອມບໍ່ຕໍ່ເນື່ອງ ແລະ ອີກຄວາມທ້າທາຍໜຶ່ງແມ່ນຕ້ອງໄດ້ແຂ່ງຂັນແບບຖີ່ໆ ໂດຍສະເພາະແມ່ນຄົນທີ່ແຂ່ງຂັນ 2 ລາຍການ ຫຼັງຂຶ້ນແຂ່ງຂັນປະເພດຕໍ່ສູ້ແລ້ວ ກໍ່ຕ້ອງຂຶ້ນລາຍການມາແຂ່ງຂັນປະເພດຟ້ອນອີກ ເຊິ່ງເຮັດໃຫ້ເມື່ອຍຫຼາຍ ແລະ ຕ້ອງອາໄສຄວາມແຂງແຮງ.

ທ້າວ ໄພລັດ ເກີດວັນທີ 8 ກຸມພາ 1989 ທີ່ບ້ານ ຮ່ອງສຸພາບ ເມືອງ ໄຊເສດຖາ ນະຄອນຫຼວງວຽງຈັນ, ເລີ່ມຫຼິ້ນກີລາໂວວີນາມຄັ້ງທຳອິດເມື່ອປີ 2011 ສາມາດຫຼິ້ນໄດ້ທັງປະເທດຟ້ອນມີອຸປະກອນ (ກະບອງ) ແລະ ປະເພດຕໍ່ສູ້ ແລະ ເຄີຍຂຶ້ນແຂ່ງຂັ້ນປະເພດຕໍ່ສູ້ລຸ້ນ 64 ກິໂລກຣາມ ໂດຍຜົນງານທຳອິດສາມາດຄວ້າອັນດັບ 3 ໃນໂວວີນາມ ຊິງແຊັມໂລກ ທີ່ປະເທດຫວຽດນາມ ຈາກປະເພດຟ້ອນດ່ຽວມີອຸປະກອນ (ກະບອງ) ກ່ອນຈະມາສ້າງຊື່ສຽງໃຫ້ເປັນທີ່ຮູ້ຈັກຈາກຜົນງານຍາດໄດ້ຫຼຽນຄຳຊີເກມ 2011 ແລະ 2013.

 

 

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ເສດຖະກິດ-ການຄ້າ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.