ໂຈນໃຈກ້າບຸກດ່ຽວປຸ້ນທະນາຄານໄດ້ເງິນໄປຫຼາຍຮ້ອຍລ້ານກີບ ແຕ່ກໍ່ຖືກຈັບໄດ້

ໃນວັນທີ 4 ຕຸລາ 2017,  ກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ໄດ້ຖະແຫຼງ ການກ່ຽວກັບ ການຈັບກຸມຜູ້ຖືກຫາກໍ່ເຫດ ປຸ້ນໜ່ວຍບໍລິການ ຂອງທະນາຄານ ແຫ່ງໜຶ່ງຢູ່ເຂດບ້ານວຽງຈະເລີນ ເມືອງໄຊເສດຖາ ນະຄອນຫຼວງວຽງຈັນ ພ້ອມເງິນ 200 ລ້ານກວ່າກີບ.

ພັທ ຄຳເກີ່ງ ຈັນສຸລິມາດ ຫົວໜ້າກອງບັນຊາການ ປກສ ເມືອງ ໄຊເສດຖາ  ໄດ້ຖະແຫຼງຂ່າວວ່າ: ໃນເວລາ 11:45 ໂມງຂອງວັນ ທີ 27 ກັນຍາ 2017 ເກີດເຫດຄົນຮ້າຍເປັນຊາຍ 1 ຄົນ ໄດ້ຂັບຂີ່ລົດຈັກມາ ຈອດຢູ່ໜ້າທະນາຄານ ແລະ ໄດ້ເອົາປືນເຂົ້າໄປປຸ້ນເອົາເງິນ ຢູ່ໜ່ວຍບໍລິການຂອງທະນາຄານແຫ່ງໜຶ່ງ; ຫຼັງຈາກນັ້ນເຈົ້າໜ້າທີ່ໄດ້ລົງເກັບ ກໍາຂໍ້ມູນຫຼັກຖານຢູ່ສະຖານທີ່ເກີດເຫດ ແລະ ສືບຮູ້ວ່າ: ຜູ້ກໍ່ເຫດ ຊື່ທ້າວ ບຸນຈັນ ຫຼື ຕຸ້ຍ ອາຍຸ 41 ປີ ພັກເຊົາຢູ່ ບ້ານດອນກອຍ ເມືອງສີສັດຕະນາກ ໄດ້ເອົາຕົວຫຼົບໜີ ໄປບວດຢູ່ວັດແຫ່ງໜຶ່ງເຂດເມືອງໄຊທານີ; ຈາກນັ້ນ ຕົກ ມາຮອດວັນທີ 3 ຕຸລາ 2017 ເຈົ້າໜ້າ ປກສ ເມືອງ ໄດ້ສົມທົບກັບພາກສ່ວນທີ່ກ່ຽວຂ້ອງເຂົ້າກັກຕົວຜູ້ຖືກຫາ ພ້ອມທັງກວດຄົ້ນທີ່ພັກພົບເຫັນເງິນ 40 ລ້ານກີບ, ເງິນ ບາດ 52.000 ບາດ ແລະ ເງິນ ໂດລາ 3.460 ໂດລາ ມາສອບສວນ.

ທ້າວ ບຸນຈັນ ສາລະພາບ ວ່າ: ໃນວັນ 20 ກັນຍາຜ່ານມາ, ໄດ້ຊື້ປືນປອມຢູ່ຕະຫຼາດແຫ່ງໜຶ່ງ ແລ້ວ ມາກໍ່ເຫດປຸ້ນ ເອົາເງິນຢູ່ໜ່ວຍບໍລິການຂອງທະນາຄານແຫ່ງໜຶ່ງໄດ້ເງິນກີບ 90 ລ້ານກີບ, ເງິນບາດ 117.850 ບາດ ແລະ ເງິນໂດລາ 10.672 ໂດລາ ແລ້ວເອົາຕົວຫຼົບໜີໄປທາງບ້ານດົງຄຳຊ້າງ ແລະ ນໍາລົດ ຈັກ ໄປດັດແປງສະພາບເພື່ອ ປົກ ປິດການກະທໍາຜິດ. ຫຼັງຈາກນັ້ນ ຈຶ່ງນໍາເອົາ ເງິນສ່ວນໜຶ່ງໄປ ຈ່າຍຫຼິ້ນກິນຟຸມເຟືອຍ ແລະ ເອົາຕົວຫຼົບໜີໄປ ບວດຢູ່ວັດແຫ່ງໜຶ່ງໃນເວລາ ຕໍ່ມາຈຶ່ງຖືກ ເຈົ້າໜ້າທີ່ຈັບຕົວໄດ້.

 

 ແຫລ່ງຂ່າວ: ໜັງສຶພິມປ້ອງກັນຄວາມສະຫງົບ

2 COMMENTS

  1. ທ່ານຂຽນຂ່າວ ບໍ່ຢາກບອກວ່າທະນາຄານໃດ ແຕ່ພາບທີເອົາຂື້ນມີໂຣໂກ ກາທະນາຄານສົ່ງເສີ່ມກະສິກຳ ໂຊໃຫ້ເຫັນຢ່າງຈະແຈ້ງ 555….ອາດຈະລືມປິດຈຸດນີ້ໄປແມ່ນບໍ !​555…

  2. ການ​ໃຫ້​ຂ່າວຕ້ອງບອກ​ສະ​ຖານ​ທີ່​ເກີດ​ເຫດ​ໃຫ້​ຈະ​ແຈ້ງ​ເພື່ອ​ໃຫ້​ຜູ້​ອ່ານ​ຮູ້ ແລະ ເຂົາ​ໃຈ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.