ເມືອງລະຄອນເພັງກວດພົບ 51 ຮ້ານຂາຍສິນຄ້າໝົດອາຍຸ

ໜັງສືພິມວຽງຈັນທາມ ລາຍງານວ່າ ຫ້ອງການສາທາລະນະສຸກເມືອງລະຄອນເພັງ ແຂວງ ສາລະວັນ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ລົງກວດກາອາຫານ ແລະ ເຄຶ່ອງດື່ມຕາມທ້ອງຕະຫຼາດ ແລະ ຮ້ານຂາຍເຄຶ່ອງຍ່ອຍຕ່າງໆ, ຊຶ່ງການລົງໄປຕິດຕາມຄັ້ງນີ້ ໄດ້ກວດພົບ 51 ຮ້ານ ທີ່ມີສີນຄ້າບາງຊະນິດ ບໍ່ຮັບປະກັນຄຸນນະພາບ ຫຼື ໝົດອາຍຸນໍາໃຊ້ ເຊັ່ນ: ອາຫານປະເພດກະປ໋ອງ, ໝີ່, ນົມ, ນໍ້າແປບຊີ, ເຄື່ອງດື່ມຕ່າງໆ ແລະ ເຄື່ອງສຳອາງທີ່ມີສານຕ້ອງຫ້າມຈໍານວນໜື່ງ, ລວມມູນຄ່າທັງໝົດທີ່ຢືດໄດ້ ຫຼາຍກວ່າ 10 ລ້ານກີບ.

ພິທີທໍາລາຍສິນຄ້າດັ່ງກ່າວ ໄດ້ຈັດຂຶ້ນ ຫວ່າງບໍ່ດົນມານີ້ ຢູ່ເດີ່ນຂອງຫ້ອງການສາທາລະນະສຸກເມືອງ, ໂດຍການເຂົ້າຮ່ວມຂອງທ່ານ ພູວຽງ ຜີ່ນຄຳຜີວ, ຫົວໜ້າຫ້ອງການສາທາລະນະສຸກເມືອງ, ພ້ອມດ້ວຍຄະນະກຳມະການຄຸ້ມຄອງ, ຕີດຕາມ ກວດກາ, ສະກັດກັ້ນ ເຄື່ອງອຸປະໂພກ ແລະບໍລິໂພກ, ເຄື່ອງສໍາອາງທີ່ຕ້ອງຫ້າມ ແລະ ສີນຄ້າໝົດອາຍຸ ຂັ້ນເມືອງເຂົ້າຮ່ວມ.

ເພື່ອເຮັດໃຫ້ປະຊາຊົນຊາວເມືອງລະຄອນ ເພັງໄດ້ບໍລິການຊົມໃຊ້ ສິນຄ້າ ທີ່ຮັບປະກັນຄຸນນະພາບ ແລະ ຖືກຕ້ອງຕາມລະບຽບກົດໝາຍ, ດັ່ງນັ້ນ ຈຶ່ງຮຽກຮ້ອງໃຫ້ຜູ້ປະກອບການຖືສຳຄັນໃນການປະຕິບັດລະບຽບກົດໝາຍ ແລະ ກວດກາເບີ່ງສີນຄ້າກ່ອນທີ່ຈະນໍາມາວາງ ຂາຍ, ໂດຍສະເພາະວັນເດືອນປີຜະລິດໃຫ້ລະອຽດເພື່ອໃຫ້ໄດ້ຮັບສີນຄ້າທີ່ດີ ມີຄຸນນະພາບ ແລະ ປອດໄພຕໍ່ສຸຂະພາບ.

 

ຮຽບຮຽງຂ່າວ: ພຸດສະດີ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.