ເປີດແລ້ວໃຫ້ທ່ຽວຄືນແລ້ວ! ອຸທິຍານແຫ່ງຊາດນໍ້າແອດ-ພູເລີຍ

0
778

ພາຍຫລັງຢຸດໃຫ້ບໍລິການຊົ່ວຄາວໄດ້ໄລຍະໜຶ່ງ ຍ້ອນມາດຕະການປ້ອງກັນພະຍາດໂຄວິດ-19, ກິດຈະກໍາການທ່ຽວຊົມສັດປ່າຢູ່ອຸທິຍານແຫ່ງງຊາດ ນໍ້າແອດ-ພູເລີຍ ກັບມາເປີດໃຫ້ບໍລິການນັກທ່ອງທ່ຽວເປັນປົກກະຕິແລ້ວ ໂດຍມີ 2 ກິດຈະກໍາຄືເກົ່າ.

ທ່ານ ພອນສັກ ອິນທະວົງ, ຮັບຜິດຊອບວຽກງານທ່ອງທ່ຽວອຸທິຍານແຫ່ງງຊາດນໍ້າແອດ-ພູເລີຍ ໃຫ້ສໍາພາດວ່າ: 2 ກິດຈະກໍາທີ່ເປີດໃຫ້ບໍລິການນັກທ່ອງທ່ຽວ ຕັ້ງແຕ່ວັນທີ 23 ມັງກອນ 2022 ລວມມີ: ການລ່ອງເຮືອຕາມນໍ້າເນີນຈາກບ້ານສົ້ນຂົວເມືອງ ແລ້ວ ລ່ອງລົງມາເພື່ອເບິ່ງສັດປ່າທີ່ລົງມາແຄມນໍ້າໃນຍາມຄໍ່າຄືນ ຈາກນັ້ນພັກຢູ່ບັງກະໂລແລ້ວລ່ອງເຮືອເດີນທາງກັບໃນຕອນເຊົ້າ ເຊິ່ງ ກິດຈະກໍານີ້ໃຊ້ເວລາ 2 ມື້ 1 ຄືນ. ສ່ວນອີກ 1 ກິດຈະກໍາ ແມ່ນການຍ່າງປ່າພູເລີຍ-ປຸ່ງນຽດ ທີ່ມີຄວາມສູງແຕ່ 300 ແມັດ -2.200 ແມັດ ເພື່ອຊົມສັດປ່າມີໃຫ້ເລືອກແຕ່ 2 ມື້ 1 ຄືນ ຈົນຮອດ 5 ມື້ 4 ຄືນ ເຊີ່ງມີຈຸດເລີ່ມຕົ້ນຢູ່ 3 ບ້ານ ຄື: ບ້ານສາກົກ ແລະ ບ້ານນໍ້າປຸ່ງ ເມືອງຮ້ຽມ ແຂວງຫົວພັນ ແລະ ບ້ານນາແວນ, ເມືອງວຽງຄໍາ ແຂວງຫຼວງພະບາງ ຫຼັງຈາກນັ້ນພັກຂ້າງຄືນທີ່ເຮືອນນົກທີ່ໄດ້ຈັດກຽມໄວ້ໃນປ່າ.

ທ່ານ ພອນສັກ ອິນທະວົງ ໃຫ້ຮູ້ຕື່ມວ່າ: ກິດຈະກໍາທ່ຽວຊົມສັດປ່າຢູ່ອຸທິຍານແຫ່ງງຊາດນໍ້າແອດ-ພູເລີຍ ເປີດໃຫ້ບໍລິການມາດົນກ່ອນການລະບາດຂອງພະຍາດໂຄວິດ-19 ໂດຍສະເພາະນັກທ່ອງທ່ຽວຕ່າງປະເທດນິຍົມໄປຫຼາຍຈົນໄດ້ຮັບຄວາມສົນໃຈ, ສຳຫຼັບກຸ່ມຄົນທີ່ເຂົ້າຮ່ວມບໍລິການທັງ 2 ກິດຈະກໍາ ແມ່ນປະຊາ ຊົນພາຍໃນ 4 ບ້ານ ທີ່ຜ່ານການເຝິກອົບຮົມດ້ານຕ່າງໆ ທີ່ກ່ຽວຂ້ອງຈາກຄະນະຮັບຜິດຊອບອຸທິຍານດັ່ງກ່າວຢ່າງລະອຽດ ແລະ ຈັດເປັນຫລາຍກຸ່ມບໍລິການ ເປັນຕົ້ນ: ກຸ່ມນໍາທ່ຽວ, ກຸ່ມແຕ່ງກິນ, ກຸ່ມເປ້ເຄື່ອງ, ກຸ່ມຊັກ, ກຸ່ມເຮືອນຮັບແຂກ, ກຸ່ມຫັດຖະກໍາແລະ ອື່ນໆ.

ນອກຈາກນີ້ ມີ 26 ບ້ານພາຍໃນ 3 ເມືອງທີ່ຢູ່ໃກ້ຄຽງອຸທິຍານແຫ່ງງຊາດນໍ້າແອດ-ພູເລີຍ ໄດ້ຮັບຜົນປະໂຫຍດນໍາຄື: ເມືອງຮ້ຽມ ແລະ ເມືອງຫົວເມືອງ, ແຂວງຫົວພັນ ແລະ ເມືອງວຽງຄໍາ, ແຂວງຫລວງພະບາງ ເຮັດໃຫ້ເຂົາເຈົ້າມີຫລາຍຮັບໂດຍກົງ ແລະ ມີຊີວິດການເປັນຢູ່ທີ່ນັບມື້ດີຂຶ້ນ.

ແຫຼ່ງຂ່າວ: Lao Nationnal Radio, ມົດແດງນ້ອຍ