ເດນມາກປະກາດຍົກເລີກມາດຕະການປ້ອງກັນໂຄວິດ-19 ພາຍໃນປະເທດ

0
187

ເວັບໄຊ Sanook ລາຍງານ: ລັດຖະບານເດນມາກປະກາດຍົກເລີກມາດຕະການປ້ອງກັນໂຄວິດ-19 ພາຍໃນປະເທດທັງໝົດ ພ້ອມເຜີຍວ່າ ເຊື້ອໂຄວິດຈະບໍ່ແມ່ນໄພອັນຕະລາຍຮ້າຍແຮງຕໍ່ສັງຄົມອີກຕໍ່ໄປ ເຊິ່ງໄດ້ເປີດໂອກາດໃຫ້ປະຊາຊົນກັບມາໃຊ້ຊີວິດປົກກະຕິອີກຄັ້ງໃນຮອບສອງປີ ນັບແຕ່ມີການແຜ່ລະບາດຂອງເຊື້ອໄວຣັສໂຄໂຣນ່າ.

ປະກາດດັ່ງກ່າວໄດ້ເລີ່ມຈັດຕັ້ງປະຕິບັດເປັນທາງການນັບແຕ່ວັນທີ 10 ກັນຍາເປັນຕົ້ນໄປ ເຊິ່ງລັດຖະບານເຊື່ອໝັ້ນວ່າ ຫົວໃຈຫຼັກຂອງການຍົກເລີກມາດຕະການໂຄວິດຄັ້ງນີ້ ກໍແມ່ນ “ວັກຊີນ” ແລະ “ຄວາມເຊື່ອໝັ້ນ” ທີ່ປະຊາຊົນ ແລະ ລັດຖະບານມີຕໍ່ກັນ ຂະນະທີຈຳນວນປະຊາກອນທີ່ສັກວັກຊີນຄົບສອງເຂັມບັນລຸ 73%, ສ່ວນຜູ້ທີ່ມີອາຍຸ 65 ປີຂຶ້ນໄປ ແມ່ນໄດ້ຮັບວັກຊີນຄົບສອງເຂັມກວມ 96%. ການຍົກເລີກມາດຕະການປ້ອງກັນໂຄວິດ-19 ໃນເດນມາກລວມມີ: ບໍ່ມີການຮັກສາໄລຍະຫ່າງທາງສັງຄົມ, ບໍ່ຈຳເປັນສວມໃສ່ຜ້າປິດປາກ-ດັງ ຍົກເວັ້ນສະໜາມບິນ ລວມທັງຈຸດກວດເຊື້ອ ແລະ ໂຮງໝໍ, ແລະ ບໍ່ຈຳເປັນຕ້ອງສະແດງພາສປອດວັກຊີນ.

ຢ່າງໃດກໍຕາມ, ຈຳນວນຜູ້ຕິດເຊື້ອລາຍວັນໃນເດນມາກຂະນະນີ້ມີປະມານ 500 ຄົນຕໍ່ວັນ ໂດຍມີອັດຕາການແຜ່ເຊື້ອທີ່ 0.7, ໝາຍຄວາມວ່າ ຜູ້ຕິດເຊື້ອໂຄວິດ 1 ຄົນ ສາມາດແຜ່ເຊື້ອໄປສູ່ຄົນອື່ນໄດ້ 0.7 ຄົນ ແລະ ມີແນວໂນ້ມຫຼຸດລົງເລື້ອຍໆ.