ອິນໂດເນເຊຍ ເລັ່ງຕິດຕາມກຸ່ມສໍາຜັດໃກ້ຊິດກັບຜູ້ຕິດເຊື້ອໂຄວິດ-19 ໂອໄມຄຣອນພາຍໃນປະເທດ

0
574

ເວັບໄຊ້ຂ່າວຕ່າງປະເທດ ໄດ້ລາຍງານວ່າ: ໃນວັນທີ 28 ທັນວາ 2021 ປະເທດອິນໂດເນເຊຍພົບຜູ້ຕິດເຊື້ອໂຄວິດ-19 ສາຍພັນໃໝ່ ໂອໄມຄຣອນ ເປັນຄົນທໍາອິດໃນປະເທດ ທີ່ຖືເປັນຜູ້ຕິດເຊື້ອຄົນທໍາອິດທີ່ບໍ່ມີປະຫວັດການເດີນທາງອອກນອກປະເທດ ໃນຕອນນີ້ທາງເຈົ້າໜ້າທີ່ສາທາລະນະສຸກອິນໂດເນເຊຍກໍາລັງຕິດຕາມຫາຜູ້ສໍາຜັດໃກ້ຊິດ ເພື່ອສະກັດກັ້ນການແຜ່ລະບາດຂອງໂຄວິດ-19 ໂອໄມຄຣອນ.

ເຈົ້າໜ້າທີ່ກະຊວງສາທາລະນະສຸກຂອງອິນໂດເນເຊຍໄດ້ອອກມາຊີ້ແຈງວ່າ ພົບຜູ້ຕິດເຊື້ອໂຄວິດ-19 ໂອໄມຄຣອນໃນປະເທດ ເປັນຄົນທໍາອິດ ເປັນຜູ້ຊາຍ ອາຍຸ 37 ປີ ເຊິ່ງເດີນທາງມາຈາກເມືອງເມດັນ ເມືອງທີ່ໃຫຍ່ທີ່ສຸດທີ່ຢູ່ໃນແຂວງ ສຸມາດຕາເໜືອ ແລະ ໄດ້ໄປກິນເຂົ້າໃນຮ້ານອາຫານແຫ່ງໜຶ່ງໃນຈາກາຕາ ໃນຕົ້ນເດືອນທັນວາທີ່ຜ່ານມາ.

ນອກຈາກນັ້ນ, ຜູ້ຕິດເຊື້ອຄົນນີ້ບໍ່ເຄີຍມີປະຫວັດເດີນທາງໄປຕ່າງປະເທດໃນໄລຍະທີ່ຜ່ານມາ ແລະ ບໍ່ໄດ້ຕິດຕໍ່ໂອ້ລົມກັບຄົນຕ່າງຊາດ ແລະ ເປັນການຕິດເຊື້ອທີ່ບໍ່ສະແດງອາການ ແລະ ຖືກກັກໂຕໃນສະຖານກັກໂຕໃນເມືອງຈາກາຕາ. ທັ້ງນີ້ ປະເທດອິນໂດເນເຊຍ ເປັນປະເທດທີ່ມີປະຊາກອນຫຼາຍທີ່ສຸດເປັນອັນດັບທີ 4 ຂອງໂລກ ໂດຍມີຈໍານວນປະຊາກອນປະມານ 270 ລ້ານຄົນ ແລະ ພົບຜູ້ຕິດເຊື້ອໂຄວິດ-19 ໂອໄມຄຣອນທີ່ເດີນທາງມາຈາກຕ່າງປະເທດແລ້ວ 47 ຄົນ.