ອິນເດຍຈະສຳຫຼວດດວງອາທິດຄັ້ງທຳອິດໃນປີ 2020

0
134

ສຳນັກຂ່າວຕ່າງປະເທດລາຍງານເມື່ອວັນທີ 16 ມິຖຸນາຜ່ານມາທີ່ນະຄອນຫຼວງນິວເດລີ ປະເທດອິນເດຍ ໂດຍອ້າງການເປີດເຜີຍຂອງ ກ. ສິວານ ປະທານອົງການວິໄຈອະວະກາດອິນເດຍ (ISRO) ທີ່ລະບຸວ່າ ອິນເດຍຈະປະຕິບັດພາລະກິດທາງອະວະກາດ “ອາດິຕຢາ-ແອລ1” (Aditya-L1) ເພື່ອການສຶກສາດວງອາທິດເປັນຄັ້ງທຳອິດຂອງປະເທດພາຍໃນປີ 2020 ທີ່ຈະມາເຖິງນີ້.

ໂດຍເປົ້າໝາຍຂອງພາລະກິດດັ່ງກ່າວກໍເພື່ອສັງເກດການດວງອາທິດຢ່າງຕໍ່ເນື່ອງດ້ວຍຍານອະວະກາດອາດິຕຢາ-ແອລ1 ຊຶ່ງຈະປະຕິບັດການຢູ່ໃນໂຄໂຣນາ “Corona” (ຊັ້ນບັນຍາ ກາດນອກສຸດຂອງດວງອາທິດ)  ທັງນີ້ ສິວານ ຍັງກ່າວອີກວ່າ “ດວງອາທິດຍັງມີອີກຫຼາກຫຼາຍຢ່າງໃຫ້ພວກເຮົາໄປຄົ້ນຫາ” ຂະນະທີ່ຍານອະວະກາດລຳນີ້ຈະຖືກສົ່ງເຂົ້າສູ່ວົງໂຄຈອນຮາໂລ (halo orbit) ບໍລິເວນຈຸດລາກຮອງ 1 (L1) ຊຶ່ງຫ່າງຈາກດາວໂລກ 1,5 ລ້ານກີໂລແມັດ ເພື່ອເປັນຂໍ້ມູນ ແລະ ປະໂຫຍດຕໍ່ການສັງເກດດວງອາທິດຢ່າງຕໍ່ເນື່ອງ.

ນອກຈາກນີ້ ອົງການວິໄຈອະວະກາດຂອງອິນເດຍກໍພວມວາງແຜນການກໍ່ສ້າງສະຖານີອະວະກາດຂອງອິນເດຍພາຍໃນປີ 2030 ອີກດ້ວຍ ຊຶ່ງປັດຈຸບັນອິນເດຍກຳລັງມຸ່ງໝັ້ນກັບ ການສົ່ງຍານອະວະກາດໄປດວງຈັນຄັ້ງທີ 2 ໃນຊື່ ຈັນທຣາຍານ-2 (Chandrayaan-2) ຊຶ່ງເປັນຍານອະວະກາດລຸ້ນປັບປຸງໃໝ່ຈາກຈັນທຣາຍານ-1 ເມື່ອປະມານ 10 ຜ່ານມາກ່ອນທີ່ຈະປ່ອຍຂຶ້ນສູ່ອະວະກາດໃນວັນທີ 15 ກໍລະກົດນີ້.

 

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: sanook.com

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.