ຫຼາຍປະເທດໃນອາຊີ ອອກຂໍ້ຈຳກັດການເດີນທາງໃໝ່ເພື່ອເຝົ້າລະວັງ “ໂອມີຄຣອນ”

0
156

ຫຼາຍປະເທດໃນອາຊີປາຊີຟິກ ເຊັ່ນ ຍີ່ປຸ່ນ, ຟີລິບປິນ, ສິງກະໂປ ລວມທັງອົດສະຕາລີ ໄດ້ມີການນຳໃຊ້ ຫຼື ພິຈາລະນາຂໍ້ຈຳກັດການເດີນທາງຄັ້ງໃໝ່ທີ່ເຂັ້ມງວດຂຶ້ນ ພ້ອມຂະຫຍາຍເວລາເປີດປະເທດ ທັງນີ້ເພື່ອເພື່ອເປັນການປ້ອງກັນພະຍາດໂຄວິດສາຍພັນໃໝ່ ຢ່າງ “ໂອມີຄຣອນ”.

ເວັບໄຊ Aljazeera ລາຍງານວ່າ: ຍີ່ປຸ່ນປະກາດຫ້າມນັກທ່ອງທ່ຽວຕ່າງປະເທດເດີນທາງເຂົ້າຍີ່ປຸ່ນໃນອາທິດຜ່ານມາ ທັງທີ່ຫາກໍອອກນະໂຍບາຍຜ່ອນຜັນຂໍ້ຈຳກັດການເດີນທາງສຳລັບຜູ້ຖືວິຊາ ລວມເຖິງນັກເດີນທາງເພື່ອທຸລະກິດໄລຍະສັ້ນ ແລະນັກສຶກສາ ຂະນະທີ່ອົດສະຕາລີ ກໍໄດ້ປະກາດເລື່ອນກຳນົດການອະນຸຍາດໃຫ້ຜູ້ເດີນທາງ ແລະນັກສຶກສາເຂົ້າປະເທດຈົນຮອດວັນທີ 15 ທັນວາ. ສຳລັບຟີລິບປິນກໍໄດ້ອອກຂໍ້ຈຳກັດໃໝ່ ໂດຍສັ່ງຫ້າມບໍ່ໃຫ້ນັກເດີນທາງຈາກ 7 ປະເທດໃນເອີຣົບ ເຂົ້າປະເທດຂອງຕົນໄດ້, ສ່ວນສິງກະໂປ ກໍໄດ້ເລື່ອນການເປີດ “ຊ່ອງທາງການເດີນທາງ” ທີ່ຍົກເວັ້ນການກັກຕົວສຳລັບປະເທດສະຫະລັດອາຫຼັບເອມີເຣດ, ກາຕ້າ, ແລະ ຊາອຸດີ ອາຣາເບຍ.

ການປະກາດດັ່ງກ່າວສືບເນື່ອງມາຈາກການຄົ້ນພົບສາຍພັນໂອມີຄຣອນ ເຊິ່ງເຊື່ອວ່າເປັນພະຍາດໂຄວິດສາຍພັນໃໝ່ທີ່ມີຄວາມໄວໃນການແຜ່ເຊື້ອສູງກວ່າສາຍພັນເດລຕ້າ ເຮັດໃຫ້ຫຼາຍປະເທດມີຄວາມກັງວົນ ພ້ອມກຽມຮັບມືໃນການປ້ອງກັນບໍ່ໃຫ້ພະຍາດດັ່ງກ່າວລະບາດເປັນວົງກວ້າງ.