ສະໜາມເທັນນິດ ພູຜາ ເປີດໃຫ້ບໍລິການສັງຄົມຢ່າງເປັນທາງການ

0
1966

ເປີດໃຫ້ບໍລິການແກ່ສັງຄົມຢ່າງເປັນທາງການແລ້ວ ສະໜາມກິລາເທັນນິດ ພູຜາ ເຂດບ້ານດອນນົກຂຸ້ມ ເມືອງສີສັດຕະນາກ ນະຄອນຫຼວງວຽງຈັນ ໃນວັນທີ 11 ມີນາ ຜ່ານມາ, ໂດຍໃຫ້ກຽດເຂົ້າຮ່ວມຂອງທ່ານ ປອ. ບຸນເຫຼືອ ສິນໄຊວໍລະວົງ ຮອງລັດຖະມົນຕີ ກະຊວງການເງິນ ທັງເປັນປະທານສະຫະພັນດອກປີກໄກ່ແຫ່ງຊາດລາວ, ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ທັງເປັນປະທານສະຫະພັນເທັນນິດແຫ່ງຊາດລາວ ແລະ ທ່ານ ພອນເພັງ ຈັນທະວົງ ປະທານສະໂມສອນ ເທັນນິດ ພູຜາ ພ້ອມດ້ວຍແຂກຖືກເຊີນ ແລະ ບັນດານັກກິລາເທັນນິດອະດີດທີມຊາດລາວ ແລະ ນັກກິລາເທັນນິດທີມຊາດລາວ ຊຸດປັດຈຸບັນ ຕະຫຼອດຮອດສື່ມວນຊົນເຂົ້າຮ່ວມ.

ສະໜາມເທັນນິດ ພູຜາ ແຫ່ງນີ້ ໄດ້ເລີ່ມສ້າງຕັ້ງມາແຕ່ ປີ 2019 ຄັ້ງນັ້ນ ໄດ້ກໍ່ສ້າງພຽງແຕ່ 2 ສະໜາມເທົ່ານັ້ນ ໃນເນື້ອທີ່ທັງໝົດ 8 ພັນຕາແມັດ ຫຼື ປະມານ 5 ໄລ່ ແຕ່ຍ້ອນຄວາມຮຽກຮ້ອງຕ້ອງການຂອງນັກກິລາເທັນນິດ ກໍຄື ລູກຄ້າທຸກທ່ານ ຈຶ່ງໄດ້ກໍ່ສ້າງສະໜາມເທັນນິດ ທີ່ໄດ້ມາດຕະຖານອີກ 1 ສະໜາມຂຶ້ນມາໃໝ່

ຊຶ່ງມີເປົ້າໝາຍຫຼັກ ເພື່ອເປີດບໍລິການຮັບໃຊ້ໃຫ້ແກ່ສັງຄົມຜູ້ທີ່ມັກຮັກໃນການຫຼິ້ນກິລາເທັນນິດ ໄດ້ອອກກຳລັງກາຍເປັນປະຈຳ ແລະ ເປັນປົກກະຕິ ແນໃສ່ສົ່ງເສີມໃຫ້ສຸຂະພາບແຂງແຮງ ພ້ອມທັງເປັນການສົ່ງເສີມການພັດທະນານັກກິລາເທັນນິດເປົ້າໝາຍຂອງສະໂມສອນ ເພື່ອກຽມສົ່ງເຂົ້າຮ່ວມແຂ່ງຂັນທຸກລາຍການຂອງສະຫະພັນເທັນນິດນະຄອນຫຼວງວຽງຈັນ ແລະ ສະຫະພັນເທັນນິດແຫ່ງຊາດລາວ ຈັດຂຶ້ນໃນປີນີ້ ແລະ ຕໍ່ໜ້າ ສົ່ງເສີມເຂົາເຈົ້າສາມາດກ້າວສູ່ທີມຊາດໃນອະນາຄົດ.