ວັງວຽງຈະໃຊ້ງົບ 20ລ້ານໂດລາ ປັບປຸງເສັ້ນທາງຮ່ອມໃນເມືອງວັງວຽງໃຫ້ດີຂຶ້ນ

ວິທະຍຸກະຈາຍສຽງແຫ່ງຊາດລາວລາຍງານໃຫ້ຮູ້ວ່າ ອົງການປົກຄອງແຂວງວຽງຈັນຈະນຳໃຊ້ງົບປະມານ 20 ລ້ານໂດລາສະຫະລັດ ຫຼື 176 ຕື້ກີບ ເພື່ອປັບປຸງບັນດາເສັ້ນທາງຮ່ອມ ພາຍໃນເມືອງ ວັງວຽງໃຫ້ດີຂຶ້ນກ່ວາເກົ່າ, ຊຶ່ງຈະເປັນການປະກອບສ່ວນໃນການຊ່ວຍດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດໃຫ້ເຂົ້າມາຢ້ຽມຢາມ ແລະ ທ່ອງທ່ຽວພາຍໃນເມືອງວັງວຽງໃຫ້ຫຼາຍຂຶ້ນກ່ວາເກົ່າ.

ທ່ານ ຄໍາພັນ ສິດທິດໍາພາ, ເຈົ້າແຂວງໆວຽງຈັນ ໃຫ້ຮູ້ວ່າ: ງົບປະມານຈໍານວນດັ່ງກ່າວ ເປັນສ່ວນໜຶ່ງຂອງງົບປະມານທີ່ລັດຖະບານກູ້ຢືມມາຈາກຕ່າງປະເທດໃນອັດຕາດອກເບ້ຍຕໍ່າ ເພື່ອໃຫ້ແຂວງວຽງຈັນ ນຳມາປັບປຸງພື້ນຖານໂຄງລ່າງ ກໍ່ຄື ບັນດາທາງຮ່ອມພາຍໃນເມືອງວັງວຽງ ໃຫ້ດີຂຶ້ນກ່ວາເກົ່າ.

ປະຈຸບັນ, ຂະແຫນງການທີ່ກ່ຽວຂ້ອງຂອງແຂວງພວມສໍາຫຼວດບັນດາເສັ້ນທາງທີ່ຈະຕ້ອງປັບປຸງໃໝ່ຢູ່, ຊຶ່ງຄາດວ່າຈະໄດ້ຮັບການລົງມືຈັດຕັ້ງປະຕິບັດພາຍໃນປີນີ້ ແລະ ຈະໃຫ້ສໍາເລັດພາຍໃນປີ 2023. ຖ້າຫາກບັນດາເສັ້ນທາງຮ່ອມໄດ້ຮັບການປັບປຸງສໍາເລັດ ກໍ່ຈະປະກອບສ່ວນເຮັດໃຫ້ເມືອງວັງວຽງ ມີໂສມໜ້າໃໝ່ທີ່ດີຂຶ້ນກ່ວາເກົ່າ.

ທ່ານເຈົ້າແຂວງໆວຽງຈັນ ໃຫ້ຮູ້ຕື່ມວ່າ: ຄຽງຄູ່ກັບການປັບປຸງພື້ນຖານໂຄງລ່າງແລ້ວ, ອົງການປົກຄອງແຂວງວຽງຈັນ ຍັງມີແຜນທີ່ຈະເພີ່ມກິດຈະກໍາການທ່ອງທ່ຽວຢູ່ເມືອງວັງວຽງໃຫ້ຫຼາຍຂຶ້ນກ່ວາເກົ່າ, ເນື່ອງຈາກວ່າ ປະຈຸບັນນີ້, ມີນັກລົງທຶນກຳລັງດຳເນີນການສຶກສາຄວາມເປັນໄປໄດ້ໃນການກໍ່ສ້າງກະຕ່າລອຍຟ້າເພື່ອຊົມທີວທັດຂອງເມືອງວັງວຽງທີ່ຄ້າຍຄືການບໍລິການຢູ່ຕ່າງປະເທດ ແລະ ກິດຈະກໍາອື່ນໆອີກ.

 

ຮຽບຮຽງຂ່າວ: ພຸດສະດີ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.