ລາວສະກາຍເວ ຄວ້າທີ 1 ບານສົ່ງຊາຍ ຊີງຂັນປະທານ ສບສ ຄັ້ງທີ 4 ປະຈຳປີ 2022

0
244

ສະໂມສອນ ບານສົ່ງໃນຮົ່ມ ທີມລາວສະກາຍເວ ກາຍເປັນທີມທຳອິດທີ່ສາມາດລົ້ມທີມຍັກໃຫຍ່ແຊ໋ມ 3 ສະໄໝ ເບີໜຶ່ງຂອງວົງການບານສົ່ງລາວ ຢ່າງ ສະໂມສອນ ກະຊວງປ້ອງກັນປະເທດ ຫຼື ກອງທັບ ໄປແບບຂາດຮອຍ 3-0 ເຊັດ 25-20, 25-16 ແລະ 25-23 ຄະແນນ ຄວ້າແຊ໋ມການແຂ່ງຂັນກິລາບານສົ່ງໃນຮົ່ມຊາຍ ທົ່ວປະເທດ ຊີງຂັນປະທານສະຫະພັນບານສົ່ງແຫ່ງຊາດລາວ (ສບສ) ຄັ້ງທີ 4 ປະຈຳປີ 2022 ສະໄໝທຳອິດໄປຄອງຢ່າງຍິ່ງໃຫຍ່. ຂະນະທີ່ ສາວກອງທັບ ຄອງແຊ໋ມບານສົ່ງໃນຮົ່ມຍິງ 4 ສະໄໝຕິດຕໍ່ກັນ.

ການແຂ່ງຂັນກິລາບານສົ່ງໃນຮົ່ມຍິງ-ຊາຍ ທົ່ວປະເທດ ຊີງຂັນປະທານ ສບສ ຄັ້ງທີ 4 ປະຈຳປີ 2022 ໄດ້ມີຂຶ້ນ ລະຫວ່າງວັນທີ 29 ຕຸລາ ຫາ 4 ພະຈິກ ຜ່ານມາ ທີ່ສະໜາມກິລາໃນຮົ່ມ ກອງທັບ (ຫຼັກ5), ໃຫ້ກຽດເປັນປະທານຂອງ ທ່ານ ຈັນສະໝອນ ຜ່ອງຈັນທາ ປະທານສະຫະພັນບານສົ່ງແຫ່ງຊາດລາວ, ມີທ່ານ ສຸລິຍາ ແກ້ວພິລາວົງ ຫົວໜ້າຫ້ອງການ ສູນກາງຊາວໜຸ່ມປະຊາຊົນ ປະຕິວັດລາວ ທັງເປັນຮອງປະທານ ສບສ, ທ່ານ ປອ ອິນຕອງ ເລີດສິນໄຊ ຄະນະບໍດີຄະນະວິທະຍາສາດການກິລາ-ກາຍະກຳ ມຊ ແລະ ທ່ານ ພົນຈັດຕະວາ ຈັນດີ ສຸລິວົງສັກ ຮອງຫົວໜ້າກົມໃຫຍ່ພະລາທິການກອງທັບ, ຜູ້ຊີ້ນຳວຽກງານກິລາກອງທັບຮ່ວມ ຊຽງຂວາງ ເກມ ພ້ອມດ້ວຍຜູ້ຕາງໜ້າຄະນະກຳມະການໂອແລມປິກແຫ່ງຊາດລາວ, ກົມກິລາລະດັບສູງ, ກົມກິລາມວນຊົນ, ພະລະ ແລະ ສິລະປະສຶກສາ, ບັນດາພາກສ່ວນທຸລະກິດໃຫ້ການສະໜັບສະໜູນ ກໍຄື ບໍລິສັດ ເບຍລາວ ຈຳກັດ ຕະຫຼອດຮອດຄະນະນຳ, ຄູຝຶກ, ນັກກິລາ ແລະ ກອງເຊຍເຂົ້າຮ່ວມຢ່າງເປັນຂະບວນການຟົດຟື້ນ.

ການແຂ່ງຂັນກິລາບານສົ່ງໃນຮົ່ມຍິງ-ຊາຍ ລາຍການດັ່ງກ່າວ ຈັດຂຶ້ນ ກໍເພື່ອສ້າງຂະບວນການສະເຫຼີມສະຫຼອງວັນສຳຄັນຕ່າງໆຂອງພັກ ແລະ ຂອງຊາດ ແລະ ເປັນການທົດສອບທີມ ແລະ ຄະນກຳມະການຕັດສິນ ກຽມຮອງຮັບມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າພາບ ໃນທ້າຍປີນີ້. ພ້ອມກັນນັ້ນ, ກໍຍັງເປັນການທົດສອບຄວາມສາມາດຂອງນັກກິລາ ເພື່ອເລືອກເຟັ້ນນັກກິລາຜູ້ມີພອນສະຫວັນດີເດັ່ນກຽມຮັບໃຊ້ທີມຊາດເຂົ້າຮ່ວມແຂ່ງຂັນລາຍການຕ່າງໆ ໃນຕໍ່ໜ້າ ລາຍການດັ່ງກ່າວມີ 16 ທີມເຂົ້າຮ່ວມ, ໃນນັ້ນ ປະເພດທີມຊາຍ ມີ 10 ສະໂມສອນ ແລະ ທີມຍິງມີ 6 ສະໂມສອນ ທັງສອງລາຍການດັ່ງກ່າວ ຈັດແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ສະເພາະທີມຊາຍ ສາຍ ກ ປະກອບມີ ຮອງແຊ໋ມເກົ່າ ລາວສະກາຍເວ, ແຂວງບໍ່ແກ້ວ, ວິທະຍາໄລພະລະສຶກສາ, ໂຄດ-ອັບ ວີຊີ, ສະໂມສອນ ວຽງຈັນ; ສ່ວນ ສາຍ ຂ ມີ ກະຊວງປ້ອງກັນປະເທດ ແຊ໋ມເກົ່າ, ນະຄອນຫຼວງວຽງຈັນ, ອອດດີ້ ສະປອດ, ເລັບ ເຟັດທູຣີ ແລະ ບີແກນ ສະປອດ. ຂະນະທີ່ ທີມຍິງ ສາຍ ກ ມີ ນະຄອນຫຼວງວຽງຈັນ, ມາດເຕີ ເຊເວັ້ນ ແລະ ສະໂມສອນ ວຽງຈັນ; ສາຍ ຂ ມີ ກະຊວງປ້ອງກັນປະເທດ ແຊ໋ມເກົ່າ, ກົມໃຫຍ່ການເມືອງກອງທັບ ແລະ ດີເວີເກີນ.

ຜ່ານການແຂ່ງຂັນຜົນປະກົດວ່າ: ໂດຍສະເພາະຄູ່ຊີງຊະນະເລີດປະເພດທີມຊາຍ ເປັນການໂຄຈອນມາພົບກັນເປັນຄັ້ງທີ 4 ແລະ ກໍເກີດການພິກລ໋ອກຂຶ້ນ ເມື່ອທັບນັກຕົບໜຸ່ມລາວ ສະກາຍເວ ເຂັ່ນຟອມເກັ່ງປາບທີມຍັກໃຫຍ່ ຢ່າງ ກອງທັບ ເບີ 1 ຂອງວົງການບານສົ່ງລາວ ໄປແບບຂາດຮອຍ 3-0 ເຊັດ 25-20, 25-16 ແລະ 25-23 ຄະແນນ ຄວ້າຂັນແຊ໋ມລາຍການນີ້ເປັນສະໄໝທຳອິດ ຊຶ່ງເປັນຂັນເງິນນໍ້າໜັກ 1 ກິໂລກຣາມ ໄປຄອງ ສ່ວນກອງທັບ ໄດ້ພຽງທີ 2, ທີ 3 ຕົກເປັນຂອງສະໂມສອນ ນະຄອນຫຼວງວຽງຈັນ ແລະ ທີ 4 ທີມ ໂຄດ-ອັບ ວີຊີ ຂະນະທີ່ແຊ໋ມປະເພດທີມຍິງຕົກເປັນຂອງ ສາວກອງທັບ ສາມາດຮັກສາແຊ໋ມ 4 ສະໄໝຕິດຕໍ່ກັນ, ທີ 2 ກົມໃຫຍ່ການເມືອງກອງທັບ, ທີ 3 ສະໂມສອນ ນະຄອນຫຼວງວຽງຈັນ ແລະ ທີ 4 ສະໂມສອນ ວຽງຈັນ.
ສຳລັບລາງວັນຊະນະເລີດ ທັງຍິງ-ຊາຍ ໄດ້ຮັບຂັນລາງວັນ 1 ໜ່ວຍ (ຂັນເງິນນໍ້າໜັກ 1 ກິໂລກຣາມ) ພ້ອມເງິນສົດ 12 ລ້ານກີບ, ຮອງຊະນະເລີດ ໄດ້ຮັບເງິນສົດ 9 ລ້ານກີບ, ອັນດັບທີ 3 ໄດ້ຮັບເງິນສົດ 6 ລ້ານກີບ ແລະ ອັນດັບທີ ໄດ້ຮັບເງິນສົດ 4 ລ້ານກີບ ຂະນະທີ່ທີມກິລາບານສົ່ງຈາກຕ່າງແຂວງ ທີ່ເຂົ້າຮ່ວມລາຍການນີ້ ກໍໄດ້ຮັບເງິນອຸດໜູນທີມລະ 3 ລ້ານກີບ.
ລາຍການນດັ່ງກ່າວ ໄດ້ຮັບການສະໜັບສະໜູນຫຼັກຈາກບໍລິສັດ ເບຍລາວ ຈຳກັດ ຈຳນວນ 231 ລ້ານກີບ, ບໍລິສັດ ລາວມິລາໂຄ ຈຳກັດ ຊຸກຍູ້ 20 ລ້ານກີບ, ລັດວິສາຫະກິດ ລາວສະກາຍເວ ຊຸກຍູ້ 5 ລ້ານກີບ ແລະ ທ່ານ ຮສ.ປອ ຄຳຜາດ ສຸຣິນພູມີ ອະດີດນັກກິລາບານສົ່ງທີມຊາດລາວ 1 ລ້ານກີບ. ນອກຈາກນັ້ນ, ກໍຍັງມີບໍລິສັດ ອິນດີ້ ຈຳກັດ, ບໍລິສັດ ເອັດພີພີ ຈຳກັດ ແລະ ບໍລິສັດ ເຄພີວາຍ (KPY) ພາກສ່ວນລະ 10 ລ້ານກວ່າກີບ.
ແຫຼ່ງ: ໜັງສືພິມສຶກສາ-ກິລາ ລາຍວັນ