ລັດຖະບານ ເລັ່ງແກ້ໄຂບັນຫານ້ຳມັນເຊື້ອໄຟ ໃຫ້ພຽງພໍຕໍ່ການຊົມໃຊ້

0
217

ລັດຖະບານເລັ່ງແກ້ໄຂບັນຫານ້ຳມັນເຊື້ອໄຟຢູ່ລາວ ແລະ ບັນຫາຂອງລາຄານ້ຳມັນ ເພື່ອເຮັດໃຫ້ປະຊາຊົນໄດ້ນຳໃຊ້ນ້ຳມັນໃນລາຄາປົກກະຕິ ແລະ ພຽງພໍກັບຄວາມຕ້ອງການ, ເຊິ່ງລັດຖະບານໄດ້ແບ່ງໄລຍະໃນການແກ້ໄຂບັນຫາມີ 3 ໄລຍະຄື: ໄລຍະສັ້ນ, ໄລຍະກາງ ແລະ ໄລຍະຍາວ.

ໃນວັນທີ 10 ພຶດສະພາ, ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຖະແຫຼງການຕາມຄຳຊີ້ນຳຂອງທ່ານນາຍົກລັດຖະມົນຕີວ່າ: ລັດຖະບານໄດ້ເລັ່ງແກ້ໄຂບັນຫາໄລຍະສັ້ນຄື ເຮັດໃຫ້ປະຊາຊົນໄດ້ໃຊ້ນ້ຳມັນຢ່າງພຽງພໍ ເຊິ່ງລັດຖະບານຈະໄດ້ສະໜອງເງິນຕາຕ່າງປະເທດ ໃຫ້ບາງບໍລິສັດທີ່ນຳເຂົ້ານ້ຳມັນເຊື້ອໄຟໃຫ້ໄດ້ 50% ຂຶ້ນໄປ, ສ່ວນໄລຍະກາງ ລັດຖະບານຈະເຈລະຈາແຫຼ່ງນ້ຳມັນອື່ນທີ່ສາມາດສະໜອງນ້ຳມັນໃຫ້ໄດ້ ທີ່ຜ່ານມາລາວນຳເຂົ້ານ້ຳມັນຈາກ ສິງກະໂປ, ໄທ ແລະ ວຽດນາມ, ແລະ ການແກ້ໄຂບັນຫາໄລຍະຍາວ ລັດຖະບານຈະສະໜອງແກ້ໄຂບັນຫາສະໜອງເງິນຕາຕ່າງປະເທດ ໃຫ້ທຸກບໍລິສັດນຳເຂົ້ານ້ຳມັນ ໃຫ້ໄດ້ 100% ເພື່ອເຮັດໃຫ້ນ້ຳມັນພຽງພໍກັບຄວາມຕ້ອງການ.

ທ່ານ ຄຳແພງ ໄດ້ກ່າວຕື່ມອີກວ່າ: ປະເທດລາວໄດ້ມີການນຳເຂົ້ານ້ຳມັນຈາກຕ່າງປະເທດ 100% ເນື່ອງຈາກລາຄານ້ຳມັນຕະຫຼາດໂລກທີ່ດີດໂຕຂຶ້ນສູງ ແລະ ບວກກັບອັດຕາເງິນເຟີ້ໃນປະເທດ ຈຶ່ງເຮັດໃຫ້ປະເທດລາວບໍ່ມີເງິນຕາຕ່າງປະເທດທີ່ຈະຊື້ນ້ຳມັນມາໃຫ້ປະຊາຊົນຊົມໃຊ້.

ແຫຼ່ງຂ່າວຈາກຂ່າວປະເທດລາວ