ລັດຖະບານຮັບຮອງເອົາ 16 ບັນຫາສຳຄັນໃນການຮັບມືກັບພະຍາດໂຄວິດ–19

ໜັງສືພິມເສດຖະກິດ-ການຄ້າລາຍງານໃຫ້ຮູ້ວ່າ ລັດຖະບານໄດ້ຈັດກອງປະຊຸມສະໄໝສາມັນ ປະຈໍາເດືອນມີນາ 2020 ຂຶ້ນໃນວັນທີ 18 – 19 ມີນາ ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ພ້ອມດ້ວຍແຂກທີ່ຖືກເຊີນເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຕົກລົງ ແລະ ຮັບຮອງບັນຫາສໍາຄັນຕ່າງໆ ລັດຖະບານເຫັນດີຮັບຮອງເອົາ 16 ບັນຫາສຳຄັນ ໃນການຮັບມືກັບພະຍາດໂຄວິດ–19 ທີ່ກຳລັງລະບາດຢູ່ຫຼາຍປະເທດມີດັ່ງນີ້:

1. ໃຫ້ຄະນະສະເພາະກິດ ຊີ້ນຳການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດທີ່ມີ ທ່ານ ສົມດີ ດວງດີ ຮອງນາຍົກລັດຖະມົນຕີ, ເປັນຫົວໜ້າຄະນະນັ້ນປັບປຸງການຈັດຕັ້ງຄະນະສະເພາະກິດ ໂດຍເພີ່ມຕົວແທນຂອງຂະແໜງການທີ່ເຮັດວຽກຕົວຈິງເຂົ້າຕື່ມ ແລະ ແບ່ງຄວາມຮັບຜິດຊອບໃຫ້ລະອຽດຈະແຈ້ງ.

2. ເຫັນດີໃຫ້ແຕ່ງຕັ້ງຄະນະສະເພາະກິດ ເພື່ອແກ້ໄຂຜົນກະທົບທາງດ້ານເສດຖະກິດຈາກການແຜ່ລະບາດຂອງພະຍາດໂຄວິດ – 19 ໂດຍມອບໃຫ້ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເປັນປະທານ ແລະ ໃຫ້ປະກອບຄະນະຈາກຂະແໜງການທີ່ກ່ຽວຂ້ອງ.

3. ໃຫ້ກະຊວງສຶກສາທິການ ແລະ ກີລາ ອອກຂໍ້ແນະນຳລະອຽດກ່ຽວກັບການປິດສະຖານສຶກສາຕ່າງໆ ໂດຍໃຫ້ມີມາດຕະການຄຸ້ມຄອງຢ່າງລະອຽດຈະແຈ້ງ, ຈະຈັດການຮຽນ – ການສອນແນວໃດ ສຳລັບໂຮງຮຽນທີ່ມີເງື່ອນໄຂໃນການຮຽນທາງໄກ ຫຼື ກະກຽມການສອນທົດແທນໃນເວລາພັກແລ້ງ. ໃຫ້ປຶກສາຫາລືກັບກະຊວງໄປສະນີ, ໂທລະຄົມມະນາຄົມ ແລະ ການສື່ສານນຳໃຊ້ການສອນທາງໄກດ້ວຍລະບົບອອນລາຍ, ໃຫ້ຄົ້ນຄວ້າຫຼຸດຄ່າອິນເຕີເນັດ ເພື່ອປະກອບສ່ວນຊ່ວຍການສຶກສາທາງໄກໃນໄລຍະນີ້.

4. ໃຫ້ແຕ່ລະກະຊວງ, ອົງການ ອະນຸຍາດໃຫ້ລັດຖະກອນທີ່ມີລູກຮຽນຢູ່ໂຮງລ້ຽງເດັກ ແລະ ໂຮງຮຽນອະນຸບານຜັດປ່ຽນກັນພັກເບິ່ງແຍງລູກຫຼານຢູ່ເຮືອນ, ບໍ່ໃຫ້ເອົາລູກໄປຫ້ອງການ.

5. ໃຫ້ກະຊວງສາທາລະນະສຸກ ກະກຽມຄວາມພ້ອມທາງດ້ານບຸກຄະລາກອນ, ອຸປະກອນການແພດ ແລະ ສະຖານທີ່ ເພື່ອຮອງຮັບໃນກໍລະນີມີການລະບາດຂອງພະຍາດໂຄວິດ – 19 ຢູ່ ສປປ ລາວ. ໃນນີ້, ໃຫ້ຄັດເລືອກເອົານັກສຶກສາແພດສາດ ເຂົ້າຮ່ວມໃນທີມງານປະຈຳຢູ່ຈຸດຕ່າງໆ.

6. ກະຊວງກະສິກຳ ແລະ ປ່າໄມ້ ເພີ່ມທະວີການຊີ້ນຳຢ່າງຕິດແທດ ຕໍ່ການຊຸກຍູ້ການຜະລິດກະສິກຳທີ່ເປັນສິນຄ້າ ເຊິ່ງມີຕະຫຼາດຮັບຮອງແລ້ວ ແລະ ການຜະລິດ ເພື່ອຮັບໃຊ້ຊີວິດການເປັນຢູ່ຂອງປະຊາຊົນ; ສຶກສາອົບຮົມ ແລະ ປຸກລະດົມຂະບວນການຜະລິດຕາມຈິດໃຈເພິ່ງຕົນເອງ ກຸ້ມຕົນເອງ ຂອງປະຊາຊົນບັນດາເຜົ່າໃຫ້ຫຼາຍຂຶ້ນ.

7. ກະຊວງພະລັງງານ ແລະ ບໍ່ແຮ່ ຮີບຮ້ອນຈັດຕັ້ງປະຕິບັດລາຄາໄຟຟ້າໃໝ່ທີ່ລັດຖະບານໄດ້ຕົກລົງແລ້ວ; ຊຸກຍູ້ໃຫ້ຜູ້ລົງທຶນທີ່ຄ້າງຊຳລະຄ່າສຳປະທານໂຄງການຕ່າງໆໄປປະຕິບັດພັນທະດັ່ງກ່າວໃຫ້ກະຊວງການເງິນຢ່າງຄົບຖ້ວນຕາມກົດໝາຍ ແລະ ລະບຽບການ; ກຽມພ້ອມສະໜອງໄຟຟ້າໃຫ້ມີສະຖຽນລະພາບປົກກະຕິ.

8. ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເອົາໃຈໃສ່ຕິດຕາມກວດກາຢ່າງເຂັ້ມງວດ ສະຖານບັນເທີງ, ຮ້ານຄາຣາໂອເກະ, ຮ້ານນວດຕ່າງໆໃຫ້ປິດຕາມທີ່ລັດຖະບານໄດ້ຕົກລົງຊີ້ນຳໄປນັ້ນ. ພ້ອມກັນນີ້, ໃຫ້ຮີບຮ້ອນສົມທົບກັບຜູ້ປະກອບການຖືໂອກາດນີ້ປັບປຸງ ແລະ ກະກຽມສະຖານທີ່ທ່ອງທ່ຽວໄວ້ຮອງຮັບ ພາຍຫຼັງພະຍາດລະບາດສາມາດຄວບຄຸມໄດ້ໃນທົ່ວໂລກ, ເອົາໃຈໃສ່ຊີ້ນຳ ແລະ ຄຸ້ມຄອງການຖະແຫຼງຂ່າວ, ອອກຂ່າວ ກ່ຽວກັບການປະຕິບັດມາດຕະການຕ່າງໆທີ່ລັດຖະບານວາງອອກໃຫ້ຖືກຕ້ອງ, ທັນການ, ແກ້ໄຂຂ່າວທີ່ບໍ່ມີມູນຄວາມຈິງໃຫ້ທັນເວລາ.

9. ກະຊວງການຕ່າງປະເທດ ແລະ ກະຊວງປ້ອງກັນຄວາມສະຫງົບ ເອົາໃຈໃສ່ຄຸ້ມຄອງດ່ານ ຕາມມາດຕະການທີ່ລັດຖະບານໄດ້ວາງອອກ.

10. ກະຊວງປ້ອງກັນຄວາມສະຫງົບໃຫ້ເພີ່ມທະວີການປະຕິບັດບົດບາດໜ້າທີ່ຂອງຕົນໃນການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພທົ່ວສັງຄົມ; ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງຕິດຕາມກວດກາ ແລະ ແກ້ໄຂການລະເມີດຕໍ່ມາດຕະການຕ່າງໆທີ່ລັດຖະບານວາງອອກຢ່າງເຂັ້ມງວດຕາມກົດໝາຍ ແລະ ລະບຽບການ.

11. ກະຊວງອຸດສາຫະກຳ ແລະ ການຄ້າ ປະສານສົມທົບກັບພາກສ່ວນກ່ຽວຂ້ອງປຶກສາຫາລື ແກ້ໄຂບັນຫາຕ່າງໆ ກ່ຽວກັບການຂົນສົ່ງສິນຄ້າເຂົ້າ – ອອກຜ່ານດ່ານສາກົນໃຫ້ທັນເວລາ, ຮັບປະກັນການສະໜອງສິນຄ້າທີ່ຈຳເປັນຕ່າງໆໃຫ້ແກ່ການດຳລົງຊີວິດຂອງປະຊາຊົນບັນດາເຜົ່າ; ແກ້ໄຂການສວາຍໂອກາດກັກຕຸນສິນຄ້າ, ຂຶ້ນລາຄາສິນຄ້າ ແລະ ການລະເມີດອື່ນໆ ທາງດ້ານການຄ້າໃຫ້ເຂັ້ມງວດ, ທັນເວລາ.

12. ກະຊວງແຮງງານ ແລະ ສະຫວັດດີການສັງຄົມ ຈັດສັນແຮງງານໃຫ້ແກ່ໂຄງການຕ່າງໆທີ່ຍັງມີຄວາມຕ້ອງການ; ຄຸ້ມຄອງແຮງງານທີ່ມາຈາກຕ່າງປະເທດໃຫ້ເຂັ້ມງວດ ຕາມມາດຕະການຕ່າງໆທີ່ລັດຖະບານໄດ້ວາງອອກ.

13. ກະຊວງໂຍທາທິການ ແລະ ຂົນສົ່ງ ເອົາໃຈໃສ່ສົມທົບກັບພາກສ່ວນກ່ຽວຂ້ອງຄຸ້ມຄອງການກໍ່ສ້າງທາງລົດໄຟ ແລະ ທາງດ່ວນຕາມແຜນທີ່ໄດ້ກຳນົດໄວ້; ຄຸ້ມຄອງການບິນໃຫ້ໄປຕາມລະບຽບການທີ່ລັດຖະບານໄດ້ວາງອອກ.

14. ໃຫ້ອຳນາດການປົກຄອງທ້ອງຖິ່ນທຸກຂັ້ນເອົາໃຈໃສ່ຈັດຕັ້ງປະຕິບັດມາດຕະການຂອງລັດຖະບານ ກ່ຽວກັບການປິດດ່ານທ້ອງຖິ່ນ ແລະ ດ່ານປະເພນີຊົ່ວຄາວຢ່າງເຂັ້ມງວດ, ຄຸ້ມຄອງການສະຫຼອງປີໃໝ່ໃຫ້ຖືກຕ້ອງຕາມແຈ້ງການ ສະບັບເລກທີ 397/ຫສນຍ ລົງວັນທີ 19 ມີນາ 2020. ພ້ອມກັນນັ້ນ, ກໍໃຫ້ເອົາໃຈໃສ່ຊຸກຍູ້ຊີ້ນຳການຜະລິດສິນຄ້າ, ການຜະລິດສະບຽງອາຫານຢູ່ໃນທ້ອງຖິ່ນຂອງຕົນ ຮັບປະກັນບໍ່ໃຫ້ມີຜົນກະທົບທີ່ບໍ່ດີຕໍ່ການດຳລົງຊີວິດຂອງປະຊາຊົນບັນດາເຜົ່າ.

15. ອົງການແນວລາວສ້າງຊາດ, ສະຫະພັນນັກຮົບເກົ່າລາວ, ອົງການຈັດຕັ້ງມະຫາຊົນທຸກຂັ້ນ ແລະ ອົງການຈັດຕັ້ງທາງສັງຄົມ ຕ້ອງເປັນເຈົ້າການເຂົ້າຮ່ວມຂະບວນການປ້ອງກັນ, ສະກັດກັ້ນ ແລະ ຕ້ານການລະບາດຂອງພະຍາດໂຄວິດ – 19. ພ້ອມທັງປຸກລະດົມ ແລະ ຊຸກຍູ້ປະຊາຊົນບັນດາເຜົ່າ, ນັກທຸລະກິດທັງພາກລັດ ແລະ ເອກະຊົນ ເພື່ອເສີມຂະຫຍາຍກຳລັງແຮງສັງລວມຂອງຊາດ ສະກັດກັ້ນ ແລະ ຕ້ານພະຍາດດັ່ງກ່າວ, ທັງຊຸກຍູ້ການຜະລິດປົວແປງຊີວິດການເປັນຢູ່ຂອງປະຊາຊົນ.

16. ທຸກໆກະຊວງ – ອົງການ ແລະ ທ້ອງຖິ່ນ ຕ້ອງຕັ້ງໜ້າເປັນເຈົ້າການຈັດຕັ້ງປະຕິບັດບົດບາດ, ໜ້າທີ່ຂອງຕົນ ແລະ ປະກອບສ່ວນຢ່າງຫ້າວຫັນເຂົ້າໃນຂະບວນການປ້ອງກັນ, ສະກັດກັ້ນພະຍາດໂຄວິດ – 19 ໃຫ້ໄດ້ຮັບຜົນຕາມມາດຕະການຕ່າງໆທີ່ລັດຖະບານໄດ້ວາງອອກ.

 

ຮຽບຮຽງຂ່າວ: ພຸດສະດີ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.