ຣັດເຊຍໃຫ້ຄຳໝັ້ນວ່າຈະສົ່ງລະບົບລູກສອນໄຟໃຫ້ເບລາລຸດຊີ

0
224

ຜູ້ນຳຣັດເຊຍປະກາດແຜນສົ່ງລະບົບລູກສອນໄຟ ທີ່ມີຄວາມສາມາດໃນການຍິງອາວຸດນິວເຄຣຍ ໃຫ້ແກ່ເບລາລຸດຊີ ແລະ ກຽມຊ່ວຍດັດແປງເຄື່ອງບິນຮົບໃຫ້ອີກດ້ວຍ.

ຈາກການລາຍງານສຳນັກຂ່າວ ບີບີຊີ ລາຍງານວ່າ: ໃນວັນທີ 25 ມິຖຸນາ 2022 ທ່ານ ວະລາດິເມຍ ປູຕິນ  ປະທານາທິບໍດີຣັດເຊຍ ໄດ້ໃຫ້ຄຳໝັ້ນວ່າ ພວກເຂົາຈະຈັດສົ່ງລະບົບລູກສອນໄຟໃກ້ ອິສການເດີ (Iskander)  ເຊິ່ງມີຄວາມສາມາດໃນການຕິດຕັ້ງຫົວຮົບນິວເຄຣຍໄດ້ ໃຫ້ແກ່ປະເທດເບລາລຸດຊີ ພາຍໃນອີກບໍ່ເທົ່າໃດເດືອນທາງໜ້າ.

ທ່ານ ປູຕິນ ໄດ້ອອກມາຖະແຫຼງຂ່າວ ຮ່ວມກັບທ່ານ ອະເລັກຊານເດີ ລູຄາເຊັນໂກ ປະທານາທິບໍດີເບລາລຸດຊີ ທີ່ນະຄອນເຊັນ ປີເຕີເບີກ ໂດຍທ່ານ ປູຕິນ ໄດ້ລະບຸວ່າ “ໄດ້ຕັດສິນໃຈໃນການສົ່ງມອບລະບົບລູກສອນໄຟ ພາຍໃນອີກບໍ່ເທົ່າໃດເດືອນທາງໜ້າ ໃຫ້ແກ່ເບລາລຸດຊີ” ແລະ ໄດ້ກ່າວເພີ່ມອີກວ່າ ຈະຊ່ວຍດັດແປງເຮືອບິນຮົບ ຊູ-25 ຂອງເບລາລຸດຊີ ໃຫ້ທັນສະໄໝ ເພື່ອທີ່ຈະໃຫ້ເຮືອບິນນີ້ຈະໄດ້ສາມາດບັນທຸກອາວຸດນິວເຄຣຍໄດ້.