ຢູເຄຣນຖືກລູກສອນໄຟຍິງໃສ່ ເສຍຊີວິດແລ້ວ 23 ຄົນ

0
366

ທາງການຢູເຄຣນເປີດດຜີຍວ່າ ມີລູກສອນໄຟຍິງໃສ່ເມືອງທີ່ໃກ້ກຸງຄີຟ ຖືກອາຄານທີ່ຢູ່ອາໄສ ເຮັດໃຫ້ມີຜູ້ເສຍຊີວີດແລ້ວ 23 ຄົນ ບາດເຈັບອີກຈຳນວນຫຼາຍ.

ອ້າງອີງຈາກ  ABC News Australia ໄດ້ລາຍງານວ່າ: ລັດຖະບານຢູເຄຣນໄດ້ກ່າວວ່າ ກອງທັບທະຫານຣັດເຊຍ ຍິງລູກສອນໄຟ ມິສໄຊ 3 ລູກ ໃສ່ເມືອງວິນນິດເຊຍ ທາງຕະເວັນຕົກສຽງໃຕ້ຂອງກຸງຄີຟ ໃນວັນທີ 14 ກໍລະກົດ 2022 ເຮັດໃຫ້ມີຜູ້ເສຍຊີວິດຢ່າງໜ້ອຍ 23 ຄົນ ໃນນັ້ນມີເດັກນ້ອຍ 3 ຄົນ ແລະ ມີຄົນບາດເຈັບອີກ 66 ຄົນ ກຳລັງຮັບການຮັກສາທີ່ໂຮງໝໍ.

ເຈົ້າໜ້າທີ່ຢູເຄຣນລະບຸວ່າ ຈາກການໂຈມຕີດັ່ງກ່າວ ມັນຖືກບ່ອນຈອດລົດໃນເຂດອາຄານສຳນັກງານແຫ່ງໜຶ່ງ ໃນເວລາ 10:50 ໂມງ ຕາມເວລາທ້ອງຖິ່ນ ແລະ ສ້າງຄວາມເສຍຫາຍແກ່ອາຄານທີ່ຢູ່ອາໄສ 3 ຫຼັງໃນເຂດຕອນກາງຂອງເມືອງວິນນິສເຊຍ.

ຂະນະທີ່ລັດຖະມົນຕີກະຊວງພາຍໃນເປີດເຜີຍວ່າ ມີຜູ້ຖືກຈັບ ຫຼັງຈາກການໂຈມຕີດັ່ງກ່າວນີ້ ປະມານສິບຄົນ ແລະ ກຳລັງຖືກຕຳຫຼວດ ແລະ ເຈົ້າໜ້າທີ່ຄວາມໝັ້ນຄົງກວດສອບຢູ່.