ມຽນມາຂໍຄວາມຊ່ວຍເຫຼືອຈາກນາໆຊາດ ຫຼັງຄວບຄຸມສະຖານະການໂຄວິດບໍ່ໄດ້

0
510

ວັນທີ 28 ກໍລະກົດ 2021 ສໍານັກຂ່າວຕ່າງປະເທດ (AFP) ລາຍງານວ່າ ລັດຖະບານທະຫານມຽນມາແມ່ນກໍາລັງຊອກຫາຄວາມຊ່ວຍເຫຼືອຈາກນານໆຊາດ ເພື່ອຊ່ວຍຫຼຸດຜ່ອນການລະບາດຂອງພະຍາດ ໂຄວິດ-19 ຫຼັງພົບກັບບັນຫາໃນການຮັບມືກັບຈໍານວນຜູ້ຕິດເຊື້ອທີ່ເພີ່ມຂຶ້ນສູງຂຶ້ນເລື້ອຍໆ.

ໂຮງໝໍຫຼາຍແຫ່ງໃນມຽນມາ ບໍ່ມີອຸປະກອນການແພດພຽງພໍທີ່ຈະຮັບມືກັບຈໍານວນຜູ້ຕິດເຊື້ອ ອີກທັງຍັງມີບຸກຄະລາກອນການແພດຈໍານວນໜຶ່ງ ທີ່ອອກຈາກວຽກເພື່ອປະທ້ວງການລັດຖະປະຫານເມື່ອວັນທີ 1 ກຸມພາ 2021 ທີ່ຜ່ານມາ.

ການອອກຄໍາສັ່ງໃຫ້ປະຊາຊົນນັບລ້ານຢູ່ໃນບ້ານ ບໍ່ສາມາດເຮັດໃຫ້ຫຼຸດຜ່ອນຈໍານວນຜູ້ຕິດເຊື້ອລົງໄດ້ ພ້ອມຍັງມີຜູ້ເສຍຊີວິດອີກເປັນຈໍານວນຫຼາຍ ຈົນເຮັດໃຫ້ເຕົາຫຼໍ່ບໍ່ພຽງພໍ ແລະ ຍັງຕ້ອງຂໍຄວາມຊ່ວຍເຫຼືອຈາກອາສາສະໝັກໃນການເຄື່ອນຍ້າຍສົບຂອງຜູ້ເສຍຊີວິດອອກມາຈາກໃນບ້ານອີກດ້ວຍ.

ພົນເອກ ມິນອອງລາຍ ໄດ້ຂໍຄວາມຮ່ວມມືຈາກນາໆຊາດ ໂດຍມີການຕິດຕໍ່ໄປຍັງຊາດອາຊຽນ ແລະ ພັນທະມິດ ເພື່ອຄວບຄຸມ, ປ້ອງກັນ ແລະ ຫຼຸດຜ່ອນຜົນກະທົບທີ່ເກີດຈາກ ໂຄວິດ-19 ໂດຍໄດ້ເພີ່ມການຈັດຫາວັກຊີນຜ່ານທາງການບໍລິຈາກ ແລະ ພັດທະນາໂຮງງານຜະລິດວັກຊີນຂອງຕົນເອງພາຍໃຕ້ການສະໜັບສະໜຸນຂອງລັດເຊຍ.